《台語荒漠甘泉（全羅版）》

 | | | 轉寄

"Tāng-tàⁿ piàn si̍t-kó͘"

作者 陳清俊 翻譯 2012.07.08

listen

Tshit ge̍h tshue-pueh (Tshit ge̍h pueh ji̍t)

"in beh tshin-tshiūⁿ ing-tsiáu thí-si̍t pe-kuâiⁿ." (Í-sài-a 40:31)

Ū tsi̍t ê ú-giân sī iú-kuan tsiáu-á án-tsuáⁿ tit-tio̍h si̍t ê sū. Tsiáu-luī pún-lâi sī bô si̍t ê, āu-lâi Siōng-tè tsō nn̄g-ki si̍t-kó͘, tī bô si̍t ê tsiáu-á tsîng kóng, tio̍h tsiong tsiah ê tàⁿ pē tī sin-tsiūⁿ.

Tsiáu ū hó ê nâ-âu huat-tshut suí-suí ê siaⁿ, ū bí-lē kok-sik ê mn̂g thang tī ji̍t-kng ē sih tsi̍t-ē sih tsi̍t-ē tsin kong-hui, tsóng-sī buē thang hiòng khong-tiong khì. Siōng-tè ài in tsiong kha tsîng ê tāng-tàⁿ taⁿ khí-lâi, in tiû-tû, liáu-āu tsiū tsiàu án-ni tsuè, īng tshuì kā tāng-tàⁿ hē tī ka-tsiah-phiaⁿ.

Tāi-sing, kám-kak tàⁿ ū khah tāng, tòng buē tiâu, tsiū tsiong tàⁿ khǹg tī khah tīng ê hing-khám tíng, tsit ê si̍t tsiū tiâu-tī hing-tsîng koh tióng-tuā. In tsin-kín tsiū tsai án-tsuáⁿ īng tsit-tuì si̍t-kó͘, tsiong in sàng kàu khong-tiong khì. Tàⁿ tsiâⁿ tsuè in ê si̍t lah.

Tse hō͘ lán thang ha̍k-si̍p ê kong-khò. Lán sī bô si̍t ê tsiáu, lán ê tsit-bū kap kang-tsok tsiū-sī Siōng-tè īng tse tsiong lán sàng ji̍p khong-tiong. Lán khuàⁿ tio̍h tàⁿ tsiah tāng, siūⁿ beh tô-siám thuat-lī, tsóng-sī lán nā tuà tsit ê tàⁿ, tsiong in hē tī sim lāi, in tsiū beh piàn tsiâⁿ si̍t, ū si̍t liáu-āu, lán uē hiòng Siōng-tè ê só͘-tsāi pe khì.

Pîng thiàⁿ-sim tsiong tàⁿ khuài-lo̍k lâi pē khí-lâi, nā-sī m̄-khíng pē ê lâng, tsiū sit-khì tsi̍t ê sîng-tióng ê hó ki-huē. --- J.R. Miller

Bô-lūn Tàⁿ juā tāng, Siōng-tè tshin-sin īng tsû-ài ê tshiú hē tī lán king-kah ê tàⁿ lóng sī tsi̍t ê tsiok-hok. --- Sìng-si tsok-tsiá Frederick William Faber


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org