《台語荒漠甘泉（全羅版）》

 | | | 轉寄

"Kan-lân lâi tit sin ê li̍k-liōng"

作者 陳清俊 翻譯 2012.07.29

listen

Tshit ge̍h jī-káu (Tshit ge̍h jī-tsa̍p-káu ji̍t)

"Lí bat ji̍p seh ê khò͘-pâng, … Tsiū-sī Guá só͘ siu-khǹg lâi thìng-hāu huān-lān ê sî." (Iok-pik-kì 38:22-23)

Lán ê tshì-liān sī hó ê ki-huē, tān-sī lán siông-siông kā i tòng-tsuè that-gāi. Nā-sī lán bîng-pi̍k khùn-lân sī Siōng-tè īng lâi tsìng-bîng I tuì lán ê thiàⁿ, muí tsi̍t ê that-gāi tsiū sī hioh-khùn ê só͘-tsāi, iā sī Siōng-tè tuì lâng hián-bîng giân-gú só͘ buē thang hîng-iông ê li̍k-liōng. Ká-sú lán tsù-ì I îng-kng tsok-uî ê kì-hō, muí tsi̍t phìⁿ hûn lóng sī ū khīng, muí tsi̍t tiâu khùn-lân ê suaⁿ-lō͘ lóng beh tsiâⁿ tsuè tsiūⁿ-kuâiⁿ, kái-piàn hîng-siōng, tit îng-kng ê lō͘.

Khuàⁿ lán ê kè-khì, uē huat-hiān, tng lán jím-siū siōng-tuā ê ap-li̍k, muí tsi̍t tiâu lō͘ lóng buē thong ê sî, tsiū-sī Thiⁿ-pē uī lán tsuè tsû-ài ê sū, sù lán siōng hong-hù un-tián ê sî.

Siōng-tè ê siōng bí-lē ê pó-tsio̍h, īng siōng tsho͘-ló͘ ê pau-tsong, īng siōng oh tuì-hù ê lâng sàng lâi ê. Tsóng-sī lán tī pau-tsong ê lāi-bīn uē huat-kiàn ông-kiong ê pó-puè kap Tsú sin-lông ê thiàⁿ.

Lán pit-su sìn-khò Tsú kiâⁿ tī o͘-àm tiong, sīm-tsì tī kan-lân ê tsîng-hîng iā īng bô iô-tāng ê sìn-sim tsun-kìng I. Tsit tsióng sìn-sim ê siúⁿ-sù ná tshin-tshiūⁿ tsi̍t tsiah uāⁿ-mn̂g ê tuā ing-tsiáu só͘ tit-tio̍h, tsiū-sī tiông-sin ū tshing-tshun kap sin ê khuì-la̍t. --- J.R. Macduff

Nā-sī lán uē khuàⁿ bī-lâi ê tāi-tsì,
Tshin-tshiūⁿ Siōng-tè án-ni,
Ká-sú só͘-ū ê hûn tshe-khui, im-iáⁿ bô khì,
Lán bô kiaⁿ hiān-tsāi ê siong-pi,
Muí ê huân-ló kín-kín tsiū buē-kì,
Ū tsuē-tsuē hí-lo̍k teh tán guá kap lí.

Nā-sī lán uē tsai bī-lâi ê tāi-tsì,
Tshin-tshiūⁿ Siōng-tè án-ni,
Uī-sím-mi̍h pó-puè sit-khì,
Uī-sím-mi̍h ba̍k-sái tsha̍p-tsha̍p-tih,
Uī-sím-mi̍h o͘-àm thàu-kàu kng-bîng;
Uī-sím-mi̍h àm-lō͘ kín-kín tit kng-liōng,
Jîn-sing ê óng-khut tit siu-tsìng,
Sìn-sim án-ni kóng.

Lán siông kóng, “lán beh khuàⁿ, beh tsai sī án-ni, …”
Tsóng-sī Siōng-tè īng thiàⁿ, tī lán lō͘-nih hē pò͘-lî,
Khuàⁿ buē tio̍h tsîng-bīn ū sím-mi̍h,
Ài lán kín-kín khîⁿ-tiâu tī I,
I tshuā lán kàu tsi̍t-sì.
Siong-sìn kap tsun-thàn I.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org