《台語荒漠甘泉（全羅版）》

 | | | 轉寄

"Khó͘-lān tiong ê an-tsīng"

作者 陳清俊 翻譯 2012.11.04

listen


Tsa̍p-it ge̍h tshue-sì (Tsa̍p-it ge̍h sì ji̍t)

"guá tī Ka-pa-lô͘ ê hô-piⁿ, siū-lia̍h ê lâng ê tiong-kan; hit-sî thiⁿ khui. Guá khuàⁿ-kìⁿ Siōng-tè ê īⁿ-siōng. ... Iâ-hô-hua ê tshiú hē tī i ê sin-tsiūⁿ." (Í-se-kiat 1:1-3)

Bô ū sím-mi̍h sî pí "siū-lia̍h" ê sî ê sìng-king uē-gú khah pó-kuì. Si-phian án-ni kóng, "guán bat tsē tī Pá-pí-lûn ê hô-piⁿ," (Si-phian 137:1) kám-khài ê si-kua. Iā khuàⁿ tio̍h Tsú tshuā guán tuì siū-lia̍h tiong kiù tshut-lâi ê hí-lo̍k, "Iâ-hô-hua tshuā hiah ê siū-lia̍h ê lâng tò-tńg lâi, ... tshin-tshiūⁿ lâm-hng ê khue-tsuí koh lâu." (Si-phian 126:1, 4)

Bat king-li̍k kè tuā khùn-khó͘ ê lâng, tsiū tsin oh tsiong i kap sìng-king pun-khui. Tsāi pa̍t-lâng khuàⁿ sìng-king kap kî-thaⁿ ê tsu bô sím-mi̍h hun-pia̍t, tsāi i khuàⁿ, tsiū tsuân-jiân ê bô siâng. Tng i ba̍k-sái tih tī sìng-king só͘ siá ê king-li̍k ji̍t-kì, hiah ê jī tsí-ū i khuàⁿ uē tio̍h, thong-kè tsiah ê jī-ia̍h, i huê kàu Siōng-tè tiān-īⁿ ê thiāu-á, "kàu Í-lîm, tī-hia ū ... tsuí-tsuâⁿ, ... tsó-tshiū." (Tshut-ai-ki̍p-kì 15:27) Muí ki thiāu, muí tsâng tshiū, tuì i lóng-sī i sìⁿ-miā tiōng-iàu sî-kî ê kì-ik.

Siūⁿ tio̍h lán siū-lia̍h uē tit hó-tshù, lán ài tsiap-siū tsit ê tsîng-sè, tsīn-liōng lī-iōng i. Uī tio̍h lán sit-lo̍h á-sī tuì lán sin-tsiūⁿ tshiúⁿ khì ê mi̍h huân-ló, pīng buē kái-siān lán ê tshù-kíng, huán-tńg uē tsó͘-tsí lán kái-siān só͘ tshun ê mi̍h. Lán ná tsing-tsat, khún-tîⁿ tī lán ām-kún ê soh tsiū ná ân.

Siâng-khuán, phî-khì bái ê bé siūⁿ beh ka-kī tsing-thuat bé-soh, tsí uē tsiong ka-kī lik-sí. Ū-la̍t ê tsing-siⁿ siūⁿ beh tsuāⁿ-lo̍h ām-kún ê kê, tsí uē siong tio̍h ka-kī ê king-kah. Lâng-lâng lóng tsai tsa̍p-pueh sè-kí Ing-kok bo̍k-su kiam tsok-ka, Laurence Sterne, ê phì-jū. Kóng, tsi̍t-tsiah pe̍h-thâu-khok-á kap tsi̍t-tsiah kim-si-tshiok siū kuaiⁿ tī lông-á lāi. Pe̍h-thâu-khok-á tsing-tsat beh pe tshut-khì, tsiū siong tio̍h i ê si̍t, iáu-sī kuaiⁿ teh huah kóng "guá buē-tàng tshut-khì, guá buē-tàng tshut-khì." Kim-si-tshiok an-tsīng khiā tī tshâ tíng, tshiùⁿ kua, pí tī guā-bīn tsū-iû pe ê hûn-tshiok só͘ tshiùⁿ ê kua khah hó thiaⁿ.

Tsai-lān lîm-kàu lán, pīng bô it-tīng sī bái, thê-tshíⁿ lán uē má-siōng jia̍t-jia̍t ǹg Siōng-tè kî-tó. Tuā-hō͘ tiong tī tshiū kha bih hō͘, bô it-tīng uē khuàⁿ-tio̍h tsuí-kó tī tshiū-tíng. Lán tsáu ǹg Siōng-tè, tī I ê si̍t-ē pì-ìm, tī hia lóng uē tshē tio̍h koh-khah tsuē só͘ m̄-bat khuàⁿ-kè, m̄-tsai ê mi̍h-kiāⁿ.

Siōng-tè tsiah-tio̍h khó-giām kap khó͘-lān tsiong I sin ê khé-sī sù hō͘ lán. Tshin-tshiūⁿ Ngá-kok, lán ài huâiⁿ-kè "Nga-po̍k ê tō͘-thâu" tsiah uē kàu Piān-í-lī, (Tshòng-sè-kì 32:22, 32) tī hia i kap Tsú sio-ián, iā siū I tsiok-hok, thang khua-kháu kóng, "Guá tng thâu tuì-bīn kìⁿ-tio̍h Siōng-tè, guá ê sìⁿ-miā iáu tit-tio̍h pó-tsuân." (Tshòng-sè-kì 32:30) Tsiong tsit ê kò͘-sū piàn-tsuè lí ê king-li̍k, tshin-ài siū-lia̍h ê lâng, Siōng-tè uē hō͘ lí "mî-sî tshiùⁿ-kua," (Iok-pik-kì 35:10) iā uē hō͘ lí ê "sí-ìm piàn-tsuè tsá-khí-sî." (A-mô͘-sū 5:8) --- Nathaniel William Taylor

Sūn-ho̍k Siōng-tè ê sìng tsí-ì, tsiū ū siōng nńg ê tsím-thâu thang khuà, an-bîn.

Guá ê sìⁿ-miā, guá ê pâng-king,
Tshiong-muá khuàⁿ buē-tio̍h ê kong-îng.
Hō͘ guá tī hùn-tàu tiong tìn-tsīng,
Hō͘ guá sim tī tang-thiⁿ iáu tshiⁿ-ling-ling,
Tng po̍k-hong-hō͘ sàu tī tsiu-uî khuân-kíng,
Ìng-ún ê tsiáu iáu tshiùⁿ-kua tī tshiū tíng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org