《台語荒漠甘泉（全羅版）》

 | | | 轉寄

"Tsiām-sî ê thòng-khó͘"

作者 陳清俊 翻譯 2012.12.09

listen

Tsa̍p-jī ge̍h tshue-káu (Tsa̍p-jī ge̍h káu ji̍t)

"Guán ba̍k-nih kú khin-khin ê kan-khó͘ sī kā guán tsiâⁿ siōng-tíng-siōng íng-uán ê tuā îng-kng." (Ṳ Ko-lîm-to 4:17)

Lâng siông-siông án-ni mn̄g, "Uī-sím-mi̍h jîn-sing tshiong-muá tsiah-nih tsuē ê lâu huih-kuāⁿ, tsiah-nih tsuē ê lâu ba̍k-sái ê sū?" Tap-àn beh tī "tsiâⁿ" á-sī "Sîng-tsiū" ê sû tshē-tio̍h. In-uī tī tsiām-sî "khin-khin ê kan-khó͘," hō͘ lán "tsiâⁿ", "sîng-tsiū" bó͘-tsióng pó-kuì ê phín-tsit. Thòng-khó͘ kà lán m̄-nā sī sìng-lī ê tō-lō͘, koh ū sìng-lī ê tīng-lu̍t, tsiū-sī muí ê thòng-khó͘ lóng kâⁿ ū pò-siúⁿ. Sarah Adams tī 1840 nî ê tsàn-bí si-kua án-ni kóng,

Tsú, guá ài tsiū-kūn tsiū-kūn Lí,
Tio̍h tìng si̍p-jī-kè, mā kam-guān siū tìng-sí.

Hí-lo̍k ū-sî su-iàu thòng-khó͘ lâi tshui-sán. Fanny Crosby (1820-1915) sī Bí-kok tsàn-bí si-kua tù-tsok-ka, siá kè tshiau-kè nn̄g-tshing siú ê si-kua. Nā m̄-sī in-uī i ê sit-bîng (tshiⁿ-mî), i bô ki-huē īng ba̍k-tsiu him-sióng tio̍h tshiⁿ-tshiⁿ ê tshân-iá, âng-âng ê ji̍t-lo̍h, á-sī i lāu-bú ba̍k-tsiu nih-tsi̍t-ē nih-tsi̍t-ē ê piáu-tsîng, tsiū buē hō͘ i ê sim-lîng ū ti̍k-pia̍t ê sī-li̍k, kuan-tshat-li̍k kap lîng-kám lâi siá si-kua.

Ta̍t-tit an-uì ê sī thòng-khó͘ tsí sī thîng-liû tsi̍t-mî, tē jī kang tsá-khí tsiū lī-khui khì. Pí-kàu tn̂g-tn̂g ê jua̍h-thiⁿ, sai-pak-hō͘ sī hô-tíng ê té. Kì-tit "Kui-mî sui-jiân ū thî-khàu, tsá-khí sî tsiū ū huaⁿ-hí." (Si-phian 30:5) --- tuì "Mî-sî ê kua"

Thòng-khó͘ āu ū pîng-an tshut-hiān,
Sī hi-bāng pàng-hē, m̄-sī hi-bāng si̍t-hiān.
M̄-sī kî-thāi tī bîng-ji̍t ê pîng-tsīng,
Sī hong-thai āu ê an-lîng.

Pîng-an bô tī hiān-tsāi muá-muá hí-lo̍k,
Iā m̄-sī tī huaⁿ-hí thiàⁿ-thàng sing-ua̍h hīng-hok,
Sī tī sim-tiong ū khó-khò li̍k-liōng,
Tshiong-tu̍t, thòng-khó͘ tiong tit sing-tióng.

Pîng-an tsûn tī uân-tsuân ê hōng-hiàn,
Bô-siū ì-tsì, kám-tsîng só͘ kái-piàn,
Pîng-an m̄-sī tshut tuì pîng-tsīng ê Ai-tiân,
Sī tsāi Khik-se-má-nî hn̂g sìng-lī tshut-hiān.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org