《台語荒漠甘泉（全羅版）》

 | | | 轉寄

"Tshing-tsá peh khí"

作者 陳清俊 翻譯 2013.04.14

listen
Sì ge̍h tsa̍p-sì (Sì ge̍h tsa̍p-sì ji̍t)

"In-uī Tsú beh pún-sin tuì thiⁿ lo̍h-lâi, ū tuā âu-kiò, ū tsì tuā thiⁿ-sài ê siaⁿ, iā ū Siōng-tè ê sàu-kak, tsiū hiah ê sio̍k Ki-tok í-king sí ê lâng, beh tāi-sing khí-lâi. Āu-lâi lán iáu ua̍h-teh ê lâng beh kap in siū tsiap-la̍p tī hûn-lāi, ji̍p khong-tiong ngiâ-tsih Tsú; án-ni lán tsiū íng-uán kap Tsú saⁿ-kap tī-teh." (I Thiap-sat-lô-nî-ka 4:16-17)

"Thiⁿ phú-kng" (Lō͘-ka 24:1) á-sī "thiⁿ iáu-bē kng," (Iok-hān 20:1) Iâ-so͘ tuì sí koh-ua̍h. Tsí-ū tshiⁿ-sîn, bô thài-iông tsiò tī I ê hûn-bōng, tng hûn-bōng khui ê sî, Iâ-lō͘-sat-líng ê iā-bō͘ iáu-bē bô khì, bîn-tsiòng iáu teh hó khùn. Tī àm-mî iáu teh hó khùn ê sî, Tsú koh-ua̍h lah. I ê koh-ua̍h pīng bô phah tshíⁿ tsuân-siâⁿ ê an-bîn.

Tī thàu-tsá, thiⁿ iáu-bē kng, tsí-ū tshiⁿ-sîn teh tsiò ê sî, Ki-tok ê sin-thé, tsiū-sī I ê kàu-huē, kap I tsi̍t-tsuê ua̍h khí-lâi, I ê sìng-tô͘ beh tshíⁿ khí-lâi. Hit mî, o͘-àm ê kiáⁿ iáu tī sí-bông tiong khùn, sìng-tô͘ bô tshá tio̍h jīm-hô lâng, tsuân sè-kài iā bô thiaⁿ tio̍h in ê siaⁿ-im, sìng-tô͘ peh khí-lâi. Iâ-so͘ bat hō͘ sìng-tô͘ tsīng-tsīng tó tī in ka-kī ê hûn-bōng lāi, tshin-tshiūⁿ iⁿ-á tī lāu-bú ê huâi-lāi, sî tsi̍t ē kàu, I iā beh tsīng-tsīng un-jiû kiò in peh khí-lâi. Tuì muí tsi̍t ê, beh sù in ua̍h-miā ê uē, "tó tī tîn-ai ê ah, lín tio̍h tsing-sîn khí-lâi tshiùⁿ-kua." (Í-sài-a 26:19) Thàu-tsá, tē it khai-sí ê îng-kng tsiò tī in ê bōng, sìng-tô͘ tī siōng-tsá ê hiok-kng tiong, tang-hng ê hûn tiām-tiām teh thuân-tshut koh-ua̍h ê sìn-sit. Tshing-tsá ê khì-bī, i ê an-lîng, i ê tshing-sin, tiⁿ-bi̍t ê thiàⁿ-thàng, an-siông ê sûn-kiat, tshiong-muá liáu hi-bāng, lóng sio̍k-tī in.

Ah! tsit ê hok-khì kap tú-tú kè ê àm-mî sī ū juā-tuā ê tuì-pí! Tsit ê tsiok-hok kap tú-tú thuat-lī ê hûn-bōng sī ū juā-tuā ê tsha-pia̍t! In puāⁿ sin-tsiūⁿ ê thô͘-hún, tû-khì uē pháiⁿ ê mi̍h, tuà tio̍h îng-kng ê sin-thé tsiūⁿ khí-lâi, "tī khong-tiong kap Tsú saⁿ tú-tio̍h." "Kng-kng ê khé-bîng-tshiⁿ" (Khé-sī-lio̍k 22:16) beh ín-tshuā in kiâⁿ tsi̍t tiâu tsuân-sin ê lō͘, thàu-tsá ê tshiⁿ kng beh tshin-tshiūⁿ Pik-lī-hîng ê tshiⁿ tshuā lō͘ kàu Siōng-tè ê bīn-tsîng. "Kui-mî sui-jiân ū thî-khàu, Tsá-khí sî tsiū ū huaⁿ-hí." (Si-phian 30:5) --- Sìng-si tsok-tsiá Horatius Bonar

Huah Hô-sàn-ná, tuì thiⁿ kàng,
Îng-kng ê sìng-tô͘ kap thiⁿ-sài saⁿ-tâng,
Un-tián kap îng-kng uî-suî muí tsi̍t phāng,
Iâ-so͘ lâi tsiap, sio̍k I ê lâng.

"Tio̍h, guá kín-kín kàu. À-bīng; Tsú Iâ-so͘ ah, lí tio̍h lâi." (Khé-sī-lio̍k 22:20)
Ū tsi̍t ê sū-ping án-ni kóng, "Guá sí liáu, m̄-thang pûn song-tsòng ê kua, ài kā guá pûn khí-tshn̂g, thàu-tsá khí-lâi ê hō."


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org