《台語荒漠甘泉（全羅版）》

 | | | 轉寄

Siōng-tè ê liâm-á-to

作者 陳清俊 翻譯 2007.11.11

listen
Tsa̍p-it ge̍h tsa̍p-it (Tsa̍p-it ge̍h tsa̍p-it ji̍t)

"I beh kàng-lîm tshin-tshiūⁿ hō͘ lo̍h tī í-king kuah ê tsháu." (Si-phian 72:6)

A-mô͘-sū kóng-tio̍h "kā ông kuah tsháu" (A-mô͘-sū 7:1) ê sū. Lán tī thiⁿ nih ê Ông ū tsin tsuē liâm-á, sî-siông īng lâi kuah-tsháu. Liâm-á tī to-tsio̍h buâ ê siaⁿ sī ū-kò tsin-tsuē ê hue-tsháu beh siū kuah khí-lâi. Sui-bóng tī tsá-khí-sî bō͘-sīng bí-lē, bô kuí tiám-tsing āu, tsiū siū kuah, tó lo̍h-khì, ko͘-ta.

Jîn-sing tiong, lán tio̍h ióng-kám bīn-tuì thòng-khó͘ ê liâm-á, sit-bāng ê tsián-to, kap sí-bông ê uan-to. Tsháu nā bô put-tuān ê kuah, tsiū bô tshiⁿ-tshuì pîⁿ-pîⁿ nńg-nńg tsíng-tsê hó-khuàⁿ. Siâng-khuán, lán nā bô jím-siū Siōng-tè liâm-to ê siu-tsíng, tsiū buē ua̍h tshut pîng-hîng, un-jiû, tông-tsîng pa̍t-lâng ê sing-ua̍h.

Sìng-king tiong siông-siông tsiong lâng pí-phīng tsháu, Siōng-tè ê îng-iāu pí-phīng tsuè hue ê tshàn-lān. Tsháu kuah liáu-āu, tsháu-hio̍h iáu teh lâu tsiap, pún ū hue ê só͘-tsāi iā lóng bô-khì lah. Siōng-tè bí-hó kàng hō͘ ê sî tsik-sî kàu, só͘ lo̍h ê sī iù-iù un-luán ê sio hō͘.

Tshin-ài ê lîng ah, Siōng-tè teh kuah lí! Thiⁿ-tíng ê ông tuà liâm-á lâi. Bo̍h-tit kiaⁿ I ê liâm-á, in-uī suà-bé tè lâi ê, sī tsu-lūn ê suè-hō͘. --- F.B. Meyer

Bû-tsîng iu-siong ê íng,
Phah tī ta-sò hong-bô͘ ê hái-huāⁿ tíng,
Khuàⁿ bô hi-bāng ê tsiân-tîng,
Ná tshin-tshiūⁿ po̍k-hong-hō͘ íng-uán buē thîng.

Sè-tsiūⁿ huan-lo̍k ê pue,
Tam buē-tio̍h ua̍h-miā bí-lē,
Ǹg-bāng, tī put-an ê bîn-bāng tiong siau-thè,
Teh thí-tshiò lán ê sim-tē,

Siáng uē pîng-tsīng ià-siān sim-lîng ê tsí-khòng?
Siáng uē thiⁿ-pó͘ lāi-sim thòng-khó͘ hi-khong?
Siáng uē īng íng-uán pîng-an khin-khin ê siaⁿ kóng,
Pîng-tsīng hiong-kông ê pho-lōng?

Tsí ū I, siū-siong phuà-tshuì ê sim,
Tuà khó͘-tshó͘ ê si̍p-jī-kè, kap tshì-phè ông-bō,
I ê thiàⁿ huat-tshut hí-lo̍k siaⁿ-im,
Uī lán pàng-sat I ka-kī sìⁿ-miā lâi sí-bô.

Sù-hok ê Tuā-i-sing, tsiong lán ê tàⁿ tû khì,
Sù lán só͘ kiû ê pîng-an kam-tiⁿ,
Hō͘ lán khò-kūn I kàu tsá-khí-sî,
Só͘ ū hûn-bū im-iáⁿ lóng siau-lī.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw