《台語荒漠甘泉（全羅版）》

 | | | 轉寄

“Uá-khò Tsú, Sim pîng-an”

作者 陳清俊 翻譯 2008.01.06

listen


Tsiaⁿ ge̍h tshue la̍k. (It ge̍h la̍k ji̍t)

“Lí tuì tsuí-tiong king-kè, Guá tik-khak kap lí saⁿ-kap tī-teh; lí king-kè kang-hô, tsuí tik-khak bô im-ba̍t lí;”(Í-sài-a 43:2)

Bô kiâⁿ kàu bô lō͘, Siōng-tè bô khui lō͘; bô kàu bô huat-tō͘, I ê pang-tsān bô hián-lō͘; bô tú-tio̍h that-gāi, I bô tsiong khùn-lân î-khai. Tng lí tsin-tsiàⁿ su-iàu pang-tsān ê sî, I ê tshiú tsik-sî kàu-uī, bô iân-ngō͘.

Tsin-tsuē lâng lóng huân-ló tsìn-tsîng, buē kàu ê sū hiān-tsāi tsiū teh tshau-huân, hi-bōng Siōng-tè hō͘ lâng ê tsiân-tô͘ sī pîⁿ-tháⁿ ê tuā-lō͘, it-sing sūn-lī, sūn-ì, bô-hong bô-íng ê lō͘-kìng. Tsóng-sī Siōng-tè ê ìng-ún sī: tú-tio̍h khùn-lân ê sî, I uē tsi̍t-pō͘ tsi̍t-pō͘ tshuā lí kiâⁿ, thè lí khui-lō͘. Tng kha ta̍h tio̍h tuā-tsuí ê sî, Siōng-tè ê ìng-ún tsiah uē si̍t-hiān, bô kín, iā bô bān.

Ū lâng sin-thé ióng-ióng tsiū teh huân-ló sí-āu ê tāi-tsì; án-ni, thài uē thang hióng-siū Siōng-tè só͘ hō͘ lâng “Hiān-kim ê un-tián” -- Tsāi-siⁿ ho̍k-bū jîn-kûn kap siā-huē. (J.R.Miller)

Tng lí kiâⁿ tī tuā-tsuí,
Hân-líng tuā-íng thang kiaⁿ-uì,
Iâ-hô-hua tsuè lí ê an-uì,
I ê ìng-ún kā lí pau-uî.
Tuì Tsú ê tshuì,
Sī sìn-si̍t, tsin-si̍t ê tsua̍t-tuì
“Tng lí kiâⁿ tī tuā-tsuí,
buē tîm lo̍h-khì, I uē kā i puah-khui”

Tsin-tsuē tshì-thàm ê khó͘-hái,
Iu-siong, siū-khì, thòng-khó͘, pi-ai,
Put-thîng ê tshì-liān kap hām-hāi,
Siong-sim sit-tsì muá pak-lāi.
Lán tsai I ê uē sī siōng tsán
Tsiah-ê tsai-lān buē iâⁿ lán,
Tuā-íng hong-lōng sī I só͘ ān,
I uē tshuā lán kàu pîng-an.

Tuā huí-huāi-sìng ê tsu-na-mí,
Tsuí-té lāi ê suân-tsuí khiⁿ,
Tshin-tshiūⁿ hái-iûⁿ tshim ê tsai-hō
Iā buē kā lán im-sí.
Siōng-tè ê ìng-ún khak-si̍t,
O-ló Tsú, I ê uē sìn-si̍t,
Bián-kiaⁿ sìⁿ-miā uē sit-khì,
I kóng,
“Lí uē pîng-an tuì tsuí-lāi peh-khí”
-- Annie Johnson Flint


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw