《台語荒漠甘泉（全羅版）》

 | | | 轉寄

"Kap Tsú tâng-kiâⁿ"

作者 陳清俊 翻譯 2008.01.27

listen


Tsiaⁿ ge̍h jī-tshit (It ge̍h jī-tsa̍p-tshit ji̍t)

"ka-kī beh hō͘ lín tsiâu-tsn̂g, kian-kò͘, ióng-kiāⁿ." (I Pí-tik 5:10)

Lán kap Ki-tok beh kiàn-li̍p sin koh tshim-ji̍p kuan-hē ê tāi-sing, ài tshiong-hun liáu-kái, bîng-pi̍k tse sin kuan-hē tuì lán só͘ tit ê kuân-lī. Nā ū tsi̍t-si-si-á ê huâi-gî, lóng beh phò-huí lán ê sìn-sim. Tng lán tit-tio̍h liōng-kng, tit tshing-tshó, lán tsiū thang hó-táⁿ hiòng tsîng kiâⁿ. Lán kuat-tīng lán ê suán-ti̍k, tsiū kuat-ì hiòng tsìng-khak ê hong-hiòng khì tsuè, ū tshiong-tsiok ê sìn-sim kap ióng-khì khì tsuè, ná tshin-tshiūⁿ tuā tshiū tìng-kun tī tē tsi̍t-puaⁿ. Lán ê hiàn-sin ài tshin-tshiūⁿ sin-niû tī kiat-hun tián-lé sìng-tuâⁿ tsîng, tsiong ka-kī kau-thok hō͘ sin-lông tsi̍t-iūⁿ, tsiong-sing tsun-siú, bô pó-liû, bô hō͘-hué.

Jiân-āu sī kiàn-li̍p kap khó-giām ê sî-kî. Lán tio̍h khiā ún lán ê kha-pō͘, kian-tīng put-î, ti̍t-kàu sin ê kuan-hē khak-li̍p tiâu-tiâu, tsiâⁿ-tsuè sìⁿ-miā ê tsū-jiân huán-ìng. Ná tshin-tshiūⁿ guā-kho i-sing tsiap-kut āu, ài īng nn̄g-tè pang kā gia̍p-tiâu-tiâu, á-sī īng tsio̍h-ko khōng hō͘ i ân, tsiām-sî hō͘ i buē tín-tāng. Siōng-tè iā uē uī I ê kiáⁿ-jî tsng lîng-sìng ê pang, á-sī tsio̍h-ko, kiò in ha̍k-si̍p an-tsīng, tō͘-kè tē it kai-tuāⁿ sìn-sim ê khó-giām. Ū-sî tshì-giām sī kan-lân, tsóng-sī, "Koh bān hāng un-tián ê Siōng-tè, tsiū-sī bat tī Ki-tok tiàu lín tit-tio̍h I íng-uán ê îng-kng ê, tī lín tsiām-sî siū khó͘ ê liáu-āu, ka-kī beh hō͘ lín tsiâu-tsn̂g, kian-kò͘, ióng-kiāⁿ." (I Pí-tik 5:10) --- A.B. Simpson

Tī tsuē kap pīⁿ-thàng tse nn̄g hāng sū, ū siāng-khuán ê tsū-jiân-lu̍t, nā-sī suî khuân-kíng tshut-tsāi in kè-sio̍k khì, tsiū uē tîm-lo̍h tī tuā tshì-thàm-tsiá, mô͘-kuí ê kuân-sè ē. Tān-sī Ki-tok Iâ-so͘ iā ū tsi̍t-tiâu lîng-sìng kap jio̍k-sin sing-ua̍h-lu̍t, tsiū-sī khò-tio̍h Ki-tok, lán uē-thang khiā khí-lâi, tí-khòng pīng thâi-iâⁿ hit ê kā lán beh khiú lo̍h khì ê tsū-jiân-lu̍t.

Beh án-ni tsuè, lán su-iàu tsin-tsiàⁿ sio̍k-lîng ê li̍k-liōng, bo̍k-piau kian-tīng, li̍p-tiûⁿ khiā tsāi, sìn-sim ê si̍p-kuàn huán-ìng. Tshin-tshiūⁿ kang-tiûⁿ ê tiān-la̍t kiòng-ìng guân-lí tsi̍t-iūⁿ. Ài ki-khì tín-tāng, su-iàu sing khui khai-kuan, khui liáu-āu, khai-kuan iā ài it-ti̍t khǹg tī khui ê uī, án-ni, tiān-la̍t tsiū beh kiòng-ìng put-tuān. Koh tiōng-iàu ê sī ki-khì ài kap tiān-guân liân tsuè-hé, nā-sī ki-khì kap tiān-guân ê tsiap-tshiok uân-tsuân, tiān-la̍t beh î-tshî it-tshè ki-khì tsìng-siông ê ūn-tsok.

Ti lán kap Siōng-tè tâng-kiâⁿ ê sū, ū tsi̍t-tiâu sio̍k-lîng-lu̍t ài khì kíng-suán, siong-sìn, tsun-siú kap kian-tshî lo̍h-khì. Lán án-ni tsun-thàn, tsiū lán ê tsiâⁿ-sìng, i-tī ê sū, lóng beh tsìng-siông ūn-tsok. --- tuì "Tī tē ná tī thiⁿ"


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw