《台文通訊精選》

 | | | 轉寄

阮ê故鄉----艋舺

作者 Ông, bín-kak 2008.06.01

艋舺這個地名是按怎來ê,無kā研究，mā m̄-bat聽起老一輩ê人講起。大人一日顧三頓，四界奔波無閑，抑是無觀念，根本to m̄知影ài關心家己ê故事，suah變成無重要無kā gín-á傳教。所以到taⁿ若有人問我講：恁hia為啥物叫做艋舺，我攏嘴á開開，m̄知beh按怎回答。

不過有一項值得提起ê代誌，tio̍h是古早人流傳落來「一府、二鹿、三艋舺」ê俗語，會tàng看出hit當時阮ê故鄉----艋舺ê繁華情形，suah hō͘艋舺人感覺tsiâⁿ光榮tsiâⁿ hiâu-pai。 早期淡水河溪水tsiâⁿ深，大船會使得駛入來內底，所以當時政府tī艋舺有設渡船頭，專門處理船貨kap旅客通關ê khang-khuè,功能kap tsit-má ê海關仝款。因為按呢，店面、販á間真tsē,應付來來去去，唐山、台灣做生理ê人客。

台灣俗語有一句話：「有人ê所在tio̍h有生理做。」所以拍拳賣膏藥，huah lin-long賣雜細，王祿á仙，變猴弄ê各路英雄好漢，攏來鬥鬧熱。Tshit-thô看光景kap生理人，lām-lām做一夥，親像『清明上河圖』內ê景色仝款鬧熱。

艋舺tsit-má改叫做萬華。伊tī台北市小南門外淡水河一帶，kap板橋隔河遠遠相對。伊是下港火車駛入台北市ê門戶，來到艋舺著表示到台北a。艋舺區內有歷史足古ê清水祖師廟，青山王宮、龍山寺等等。特別龍山寺上出名，無分早暗，香火無斷，名聲thàng海外。廟口對面賣物食ê擔á,俗koh好食，大碗koh滿墘，愛食啥tō有啥，細漢時定定tuè阿母來tsia燒香拜乖，順續食點心。可惜tsit-má已經變做公園lo͘h，實在hō͘人懷念。

猶有華西街kap正á起好無外久ê環南綜合大批發市場。華西街是艋舺有名ê夜市á,海外ê觀光客用這個所在做參觀ê起點。在地人koh khah是挨挨陣陣來tsia tshit-thô｡環南綜合大批發市場是家庭主婦查某人上愛來ê所在，ta̍k項菜色攏有。市頭批發hō͘販á，市尾俗賣hō͘查某人。家庭主婦來到tsia，親像看著寶貝，ta̍k家大kuāⁿ細kuāⁿ，怨bē得加生兩支手鬥kuāⁿ。轉到厝內大粒汗細粒汗，皮包á一下摸，uâ!Ná會mo͘h-mo͘h？若tú-tshīng hō͘翁婿看著，「俗物，食破家」，貪俗，死好lah。可愛ê市場，有好mā有bái｡

年beh到lo͘h，初二是轉去外家ê日子。想著故鄉ê艋舺，心情親像阿兵哥a tih-beh退伍算饅頭按呢，一粒一粒算，一工等過一工，希望早一日轉去故鄉ê艋舺。