《台文通訊精選》

 | | | 轉寄

一個好所在

作者 趙水生 2008.06.08

有一個好所在，有山也有水，想beh紹介hō͘ ta̍k家知，這個所在tō是竹山。

竹山這個充滿庄腳古早味ê山城，純情樸素，風景、古蹟、特產真suí真特別，一四界攏是竹á，是上大ê特色。

竹山ê景緻有夠讚，透早peh-tsiūⁿ山頂ê路nih，tshìn-tshái看你tō會tàng看著suí-tang-tang ê 風景。假使運氣好，tn̄g著天氣清爽無半跡雲ê時陣，你猶看會著竹山城ê全景。到下晡，koh uì 99 khám 行落去，行到一大遍田園，看著日頭落山ê景色，實在會kap「關山日落」相比phīng｡

講著古蹟，李勇廟、紅旗公廟、德山嚴、林家古厝…tsē kah hō͘你算bē了。先來講紅旗公廟，廟內服祀ê是滿清時代ê『捕快』，因為tī林kí埔（竹山古早名）『捕快』kap pháiⁿ人發生一場tshia-piàⁿ，suah來慘死，在地人為著感謝伊保護地方ê恩情，才來起廟紀念，接受香煙祭拜。這個神明手gia̍h ê家私（武器）是長鎗，威風十足。Koh來講林家古厝，姓林ê tī竹山是大家族。早當時林家ê祖先是一位秀才，替竹山人做真tsē代誌。林家古厝hō͘政府鑑定做古蹟了後，因為保護無好勢，厝內ê太師椅kap真tsē古物suah攏hō͘賊á偷the̍h去。所以林家才koh收回權利，經過tsûn年921地動，古厝化作平地，tō按呢消失去a。

最後來紹介竹山ê名產。上蓋有名ê是竹山蕃薯。有一個傳說，講嘉慶君遊台灣時，有食過竹山蕃藷，o-ló竹山蕃藷好食。皇帝嘴，講話算話，竹山蕃藷好食ê名聲，也tō按呢響起來。

竹山是一個好所在。有閑來竹山tshit-thô，有影無影，看「前山第一城」你tō知。