《台文通訊精選》

 | | | 轉寄

若眠夢

作者 阿秀 2008.11.30

我有一個朋友kā我講---

伊細漢ê時，定定負責對付出現tī in tau規群ê káu-hiā｡因為按呢，伊希望出現ê káu-hiā lú大群lú好。有時伊會偷the̍h糖，kǹg tī灶腳ê土腳，siâⁿ káu-hiā｡伊對付in ê手法，上愛用火，因為火ê速度真緊，koh會有芳味。伊講hit當時，伊想小小ê我，單單用報紙，就會tàng燒死hiah tsē ê káu-hiā,突然間感覺家己真偉大。

國中ê時，伊學著protein驚燒m̄驚冰。伊mā是the̍h káu-hiā來做實驗，冷凍庫不時有伊khǹg ê káu-hiā｡伊講káu-hiā真實冰了會koh活--起-來，若是kā in khǹg tī電火ê頂面，一下手就燒--死，tse是伊tī桌á頂ê實驗。

我想這一、二工有人teh做實驗，in用美國人kap家己ê性命做實驗。這個實驗到底有啥物意義，無真清楚。人類生存ê任何目的，攏無需要用這款方式來證明。無定著你會講世間ê悲劇滿滿是，但是悲劇發生tī世界舞台ê中心，有伊特別ê效果。

Tī大樓倒落去ê所在， 有一個夢tuì hia飛--來---

Tse是一個天氣真好ê拜二早起，你帶著真歡喜ê心情去上班（因為blue Monday táⁿ過去）。Tī世貿大樓ê kuân樓頂，有一片真suí真大片ê玻璃窗。目睭看去，大西洋一片ê藍色，Hudson River ê帆船mā tī你ê目睭前慢慢駛出港口，雖然in聽無你ê聲，你也是kap in講：「Good Morning！」白色ê帆點tī藍色ê海，hō͘你想起生日暗會，tuì情人手中接著ê滿天星。

秘書送來一杯燒燒ê咖啡，一時辦公室有真厚ê咖啡芳。你kā白色ê牛奶精加入去，無想beh去lā,就親像無想beh馬上處理公事ê心情。你手phâng咖啡，目睭猶原看窗á外，白色ê牛奶精tī咖啡ê內底，家己thuàⁿ開… 啊！一個拜二，有日頭有活力ê早起。

你看著遠遠有海鳥teh飛……，其中一隻慢慢向你飛--來，lú飛lú近，lú來lú大。

目睭juê-juê--leh,koh看一遍，你才發現m̄是海鳥，是飛龍機，而且是民航機。你感覺真歡喜，tse是難得ê經驗，以前m̄-bat有飛龍機離大樓tsiah近，若有，mā是小型ê後面koh拖一條廣告ê布條á｡

這隻大飛鳥繼續向你飛來，你ê心情tuì歡喜變做懷疑。但是飛龍機並無tuè你ê心情轉越，你ê面uì紅變白。時間一秒一秒過去，白色ê牛奶精無koh散開，咖啡家己lak落土腳。你ê眼前一片烏，你無koh有感覺，kan-na會記得--- 一杯猶未lim真芳ê咖啡kap一隻真大隻向你飛--來ê---海鳥。