《台文通訊精選》

 | | | 轉寄

過年摸牛

作者 田土伯 2009.02.01

我細漢ê時，阮阿爸有飼一隻水牛teh tàu作sit。過年時阮ê厝邊頭尾攏會來拜託阮阿爸hō͘ in摸阮tau ê牛，beh討一個好頭彩。摸牛ê時ài ná摸ná唸有押韻ê好話，而且會使tuì牛頭摸到牛尾，規身軀攏會使據在你摸。

Tse tio̍h-ài看你hit年上蓋ǹg望得著啥物款物件來決定，但是kan-na會使摸一位nā-tiāⁿ。

下面是一般人上蓋愛摸ê部位kap順序：

摸牛嘴，大富貴。
摸牛頭，起大樓。
摸牛耳，食百二。
摸牛目，會發達。
摸牛鼻，好無比。
摸牛肚，好頭路。
摸牛腿，生雙對。
摸牛腳，得金角。
摸牛奶，出壯丁。
摸牛lān,中狀元。
摸牛lān-pha，緊做阿爸。

照阮阿爸ê統計，一般人上愛摸牛頭kap牛嘴，khah無人敢摸最後hit兩個部位。阮阿爸mā上驚人摸牛ê hit兩個重要部位，驚摸若無好勢，牛會起狂(kông)，烏白tsông,真危險。但是有一年，阮厝邊有一個真活骨ê猴gín-á,偷偷á去摸牛lān(牛ê生殖器)，hit年成實去hō͘伊考tiâu著台南一中ê狀元，mā是阮莊--裡有史以來第一位考著台南一中ê學生。這項代誌tī hit年馬上傳遍中南部。隔轉冬ê過年，差不多有百外個beh參加考試ê學生，透早五點半天未光ê時，tō來排列beh來阮厝摸牛lān｡阮阿爸驚一tiô,趕緊kā牛牽去藏，驚若hō͘ hiah-nih tsē人摸落到底，阮厝ê牛一定會變做m̄成(tsiâⁿ)牛，一定無法度koh再犁田。