《台文通訊精選》

 | | | 轉寄

萬年溪

作者 蘇藤宗 2009.02.15

我有一個確定無法度達成ê夢，tō是tī最近ê將來thàn 2億5仟萬台幣。對這條bē少ê錢，我有一個計劃，m̄是為著我退休了後ê生活。我beh退休ê時，公司hō͘我ê退休金雖然少少--a，但是有夠維持我簡單ê生活方式。Tī幾年前(大概是1998年)轉去屏東以前，我mā m̄ bat夢想beh thàn khah tsē ê錢。大家猶會記tsit萬年溪--無？Hit一日，tī自由路行，看著受著傷害ê溪底，心肝感覺真痛。回想過去，有一種bē tàng避免ê心思來相tîⁿ，比較過去kap現在，也常常hō͘人感覺矛盾kap無一致。但是這個hō͘人感覺真寶貴ê物件變bái--去，實在hō͘人真傷心。

萬年溪以前有一個小水壩，有一個大約十尺kuân ê水門，一條小溝kā擋--起-來ê水引uì 屏東糖廠去。Tī上流屏東病院ê附近有一個o͘-sìm橋(吊橋)。水真清氣，lim hia ê水也bē感覺奇怪。水門附近是我gín-á ê時常常去siû水ê所在。平常攏有一kuá面熟m̄ bat名ê gín-á做伙siû｡大家攏thǹg褲lān teh siû (hit時陣我大概8、9歲)，peh上水門ê頂kuân,嘴huah講「lān-pha tēⁿ--leh，tshun死--ê｣，然後跳入去水深ê hit pîng｡有一日，一個gín-á講，泰山tī非洲hip電影，跳落去溪á水hō͘竹篙插--死。Hit個以後，一、二禮拜，無人敢tuì水門頂kuân跳落水。以後tsiah知影是一個謠言。Hit時陣是泰山電影ê時代(二屆Olympic游泳冠軍John Weismuller主演)，我想我看過伊ê每一phō泰山電影。有時陣，阮tō khiā tī水門頂，學泰山ê huah聲「O͘ ...O͘ ..O͘ O͘ ..」，然後跳落去水內底。Tī電影內底，泰山若是huah這個聲，tō是伊beh去救人，抑是伊tú著危險，beh叫伊ê動物朋友來鬥相工，伊ê大大小小ê朋友，包括象、獅、豹、猴tō攏趕--來。這時陣，電影觀眾大聲拍pho̍k á,我mā貢獻bē少ê phok á聲。若是講tse是hō͘人真興奮，實在是猶koh形容無夠。

一年大概有兩遍，m̄知啥物原因，水門會開起來放水，附近真tsē人tō集來掠魚、掠蝦。頂回轉--去(有二十幾年，政治ê因素無轉去台灣)，清氣ê水無--去，水門也生sian，kan-na有無真清氣ê烏窟á水kap pùn-sò,無水teh流。你會tàng想，這個情景hō͘我外傷心。轉來美國，我開始想，我若有2億5仟萬台幣，我tō會提來去hō͘蘇嘉全縣長，請伊koh提出來仝款ê數目，加--起-來5億，一定會tàng kā萬年溪整頓做一個真suí ê公園，也是對受傷害ê台灣環境ê一個小貢獻。我無真愛koh提起日本，但是tī日本坐火車經過溪á,你攏會看著清氣ê溪á底kap比較khah清氣ê溪á水。火車過溪攏會掠著我ê心，hō͘我心情平靜。火車過溪了後，我tō目睭kheh kheh，hō͘我ê心轉去清氣ê萬年溪kap下淡水溪( tsit-má叫做高屏溪)。中學時代，坐火車聽著kho͘-long kho͘-long過鐵橋ê聲，去高雄掃街á路、看電影，也是我有錢ê時真愛做ê代誌。

幾個月前，有台灣ê報紙teh報導講，屏東有一個文化保存計劃，準備beh重建o͘-sìm橋、糖廠ê一kuá日本宿舍、出名ê小提琴家李淑德ê舊厝，設立汪乃文紀念美術館。這個消息hō͘我真心動。我姊夫ê老父(pē)李志傳先生是一位教育先進，做過省立屏東女中校長真tsē冬，也是一位真出名ê作曲家。大家真熟ê｢台灣，台灣，咱台灣」tō是伊作曲，蔡培火先生作詞--ê｡伊也作屏東市歌kap一條用o͘-sìm橋做背景ê搖gín-á歌。汪乃文先生是一位真溫和ê美術家，tī屏東女中教美術幾十冬，教過我ê大姐kap小妹。伊bat阮厝ê人，所以有時陣會來阮tau開講。李淑德女士ê舊厝tī萬年溪邊，汪乃文ê古厝mā是tī附近。我ê萬年溪復活計劃(夢)對屏東文化復健有加分ê作用。

M̄-kú,我若有2億5仟萬台幣，我可能會改變我ê心思。

(這篇文章原文是用英文寫--ê,是作者經過e-mail送hō͘ tī台灣kap美國ê高中同學ê批。作者家己翻譯做台文。)