《台文通訊精選》

 | | | 轉寄

愛永遠bē suah

作者 蔡岱安 2009.02.22

按呢ê一張批，我早就想beh寫--a，希望我所寫--ê ，會tàng表達出我ê心意。

我定定teh想，親像你按呢疼我，beh叫我按怎無愛--你-neh？

Kap阿斐結婚了後，有一擺，我家己轉去台灣看你。Beh轉--來ê時，你堅持beh去火車頭送我。上車進前，你kap我相(sio)攬，tsim我ê嘴phué｡上車了後，我坐tī窗á邊，ia̍t手叫你先走。你khiā tī月台頂，攏無beh離開，我kā手tah tī玻璃窗á,感覺真虧欠teh kap你相辭。

你突然間走--過-來，kā你ê手kap我ê手相tha̍h,gia̍h頭對我笑，不管四圍ê人，用無聲ê話，隔一層窗á門，m̄甘對我「講」再會。火車開始慢慢á tín動，你tè火車行，火車緊，就tuì行變走，hit年，你六十歲--a，細漢koh sán,鬢邊ê頭毛攏白--a，koh按呢tuè火車一直行、一直走。

車--裡ê人，真好奇，問--我：「伊敢是你ê老母？」

我搖頭：「M̄是，是我ê ta家。」目屎忍bē tiâu,一直流--落-來。

咱「ta家新婦」，抑是講「母女」ê關係，真早就開始。阿斐大學畢業做兵以前，kā我介紹hō͘你。伊tī我beh出國以前，請假出來kap我訂婚。

出國以後，我每兩禮拜寫一張批hō͘外家厝kap你。外家厝ê批有去無回，顛倒你定定回批hō͘我，鼓勵我這個猶未過門ê新婦，替我ê留學生活加油。

阿斐退伍了後也來美國。阮ê學業結束了後，你等待真久ê婚禮舉行--a，婚禮訂tī我學期考試了後。我ê父母因為身體ê關係，bē tàng來參加，你叫我安心，免煩惱，飛來Boston做新娘就好。你kap阿爸提早來美國準備，連我ê新娘衫，mā攏替我準備好勢。

你定定講你是仝一日teh嫁查某kiáⁿ kap娶新婦。

無m̄ tio̍h,我tī你另外一個後生ê厝，你kā我親像嫁查某kiáⁿ仝款，嫁--出-去。

婚禮hit日，你比我koh khah緊張。透早就來lòng我ê門，叫我起床，親像親生ê老母，替我化妝、穿新娘衫，掛你送--我ê珍珠耳鉤、phuàh liān｡你tī我ê身軀邊，無閒tshih-tshih，koh照風俗，m̄肯hō͘新郎看著新娘，早早就催家己ê後生出門去教堂，tī hia慢慢á等候新娘。

你koh叫你ê小弟來做「母大舅」，開新娘車。Beh去教會以前，你吩咐我ài khà電話轉去台灣，感謝父母教養ê恩情。你也親嘴kā我ê父母講，你tī上帝ê面前下願，永遠會kā我這個新婦當做查某kiáⁿ來疼。

你無白賊，婚禮結束了後，你牽我ê手，kā我講：「kiáⁿ兒是上帝ê禮物，父母只是暫時看顧。今á日，我ê kiáⁿ beh離開父母，kap你結合，成做一體，以後，就拜託你--a。」

婚禮了後，你就轉去台灣，m̄ bat koh來美國，kā後生放心交託hō͘我。

你無來美國，阮只好轉去台灣看你。阿斐因為工作ê關係，bē tàng ta̍k年轉去看你，就派我做代表。雖然kan-na我一個人，你猶是三頓飯攏準備足phong-phài,也無hō͘我做家事，煮飯、洗碗、洗衫，你攏家己來，koh kā我ê洋裝、外衫，偷偷á熨hō͘好，khǹg tiàm我ê眠床頭。

平常時，我一入門，你淺拖就the̍h到我ê腳前來。聽著我起床ê聲，趁我teh洗嘴、洗面ê時，就開始hiâⁿ滾水、煮咖啡、準備早頓。食飽了，水果馬上切好送--來。我beh出門，你一直交代，m̄-thang去熱--著，ài坐計程車，m̄-thang用行--ê｡出外一入門，猶未坐--落-來，一大杯冰涼ê蜜茶就phâng來我ê面前。Kap你做伙去教會禮拜，你也是驚我熱--著，the̍h週報，一直替我ia̍t風。行tī路--裡，您攏beh牽我ê手，koh顧我過大路。暗時beh睏以前，你替我tī房間內kā蚊á香點hō͘好。半眠我起來便所，你馬上醒--起-來，問我敢有睏好？有hō͘蚊á咬--著-無？敢ài koh我點蚊á香？抑是起來替我拍蚊？

真tsē代誌，寫也寫bē完，hō͘人感動，也無法度bē記--得。我親生ê老母，在生就定定對我講：「你ê ta家真好，連我也無法度親像伊hiah-nih-á周到，hiah-nih-á疼--妳。」

七年前，我ê老母過身，hit時你家己ê翁婿 ，就是我ê ta官也過身兩年--a。你一個人，透早坐火車來，tuè我送我ê老母到墓á邊。棺柴beh tâi--落-去ê時，你牽我ê手，流目屎，kap我做伙向我ê老母相辭。

喪事了後，我陪你轉去台南。因為心內艱苦，一直睏無好，您hō͘我過去kap你仝眠床睏，一直安慰我講，我bē孤單，因為我猶有你這位老母會繼續疼我。

Kap阿斐結婚十外年來，其實你家己mā bat遇著真tsē苦痛。代先是阿爸tio̍h癌，你驚阮煩惱，無kā阮講，一個人恬恬照顧。爸爸過身了後，阮希望你來美國做伙tuà,你獨身ê大姊忽然間中風，你堅持beh留tī台灣照顧伊。

今á日，你七十歲--a，雖然阮每一禮拜攏會khà電話hō͘你，知影你身體健康，總--是也會煩惱。你顛倒安慰阮講，有一工，你一定會來美國，m̄-kú,m̄是tsit-má｡你講教會生活無閒，上帝kap教會ê兄姊攏hō͘你平安喜樂，而且大姨過身了後，你開始kap以前女中ê同學定時聚餐，每一禮拜攏做伙去關仔嶺洗溫泉、唱歌開講，生活快樂滿足，無需要阮擔心。

其實阮ná會m̄知影你真正ê心思。你以前講--過，你結婚以後就kap ta家做伙tuà,中間也照顧過家己ê老母真tsē年。翁á某攏tī 一間細間房間內，se̍h來se̍h去，無家己ê空間。真tsē人「Tsē年媳婦變ta家」了後，攏beh愛kiáⁿ兒新婦好好á款待，但是你無仝，你不時teh替人想，會tàng獨立生活，就無愛uá靠別人。

我m̄是你ê親骨肉，koh有真tsē缺點，就因為我是你後生所選--ê,你就一心一意、無條件按呢疼我。

Tī阮ê婚禮，你kap阿爸送阮一本聖經，阿爸tī頂面題字：「我設使若會曉講人kap天使ê語言，若無仁愛，我就成做響ê銅器，tân ê鑼鈸(lô-pua̍h )。我設使做先知，明白攏總ê奧妙kap攏總ê知識（tsai-bat），koh設使有齊(tsiâu)備ê信，夠額來移山，若無仁愛，我就無算做是啥物。我設使盡所有ê賑濟，koh獻我ê身軀hō͘火燒，若無仁愛，就我無得到利益。仁愛是寬容、慈悲；仁愛是無怨妒；仁愛是無誇口、無行見笑ê事，無求家己ê利益，無緊受氣，無記得人ê pháiⁿ，無歡喜不義，是kap真理相kap歡喜；凡事忍受，凡事相信，凡事ǹg望，凡事吞忍。仁愛永遠bē無--去。」

婚後，真tsē人攏o-ló我kap阿斐是「模範夫妻」。阮這對平凡ê翁á某，設使知影按怎tī愛ê路程，互相扶持，互相相疼，互相原諒，he是因為阮有你這位「模範母親」，hō͘阮會tàng一直攏teh感受著啥物是永遠bē無--去、永遠bē停suah ê疼。

多謝你！

求上帝繼續保守你！

你ê新婦寫