《台文通訊精選》

 | | | 轉寄

一個小公務員ê死

作者 Anton Pavlovits Tsikhov原作 2009.05.31

[翻譯文學]

阿旭 翻譯

Tī 一個真suí ê ing暗，這個bē-bái ê小公務員Ivan Tserviakov坐tī歌劇院ê第二排，用伊ê吊鏡teh看歌劇《Les Clotses de Corneville》。坐tī hia，伊感覺若親像是tī 7層天頂尾hiah-nih爽快。M̄-kú，無張持 (tī故事內底，咱定定會看著『無張持』這個詞。其實，作家講--ê攏真正確，人生本來tō充滿bē-tàng預料ê代誌)，無張持伊ê面皮皺作一球，目睭吊kuân，伊趕緊禁khuì，kā吊鏡the̍h--落-來，身軀àⁿ頭前，人擋buē-tiâu，ha-tshiù一聲！伊拍一個kha-tshiùⁿ。其實，咱mā無規定禁止人拍-kha-tshiùⁿ。Ta̍k個人攏會拍-kha-tshiùⁿ。作sit人會拍-kha-tshiùⁿ，警察會拍-kha-tshiùⁿ，樞密院ê高級顧問有當時á mā會拍-kha-tshiùⁿ。Tserviakov一點á mā無需要感覺pháiⁿ勢。伊用手巾á kā鼻á拭拭--leh，koh真有禮貌四界看--一-下，看伊有kā人攪擾--著-無！M̄-kú，伊看著tī伊頭前坐第一排ê一個老人，真認真teh拭伊ê hit粒光頭，koh用手套teh拭伊ê ām-kún，嘴--裡 sē-sē-唸。這時Tserviakov suah認著這個老人，伊tō是公路部ê Brizialov將軍。

「害--a，我ǹg伊拍-kha-tshiùⁿ！」Tserviakov teh想。「伊m̄是我ê頂司，m̄-kú按呢mā是m̄好，我tio̍h來去kā伊會失禮。」

Tserviakov嚨喉khe̍h--一-下，uá 頭前tī將軍ê hīⁿ孔邊細聲講：「大人，請你原諒，我拍-kha-tshiùⁿ去phùn著你。我是無張持…」

「無要緊，無要緊，--」

「看天公伯--a ê面子，請原諒，我…我…我m̄是刁故意--ê ---」

「O͘h，請你坐--落-來，我thang會tàng聽台á頂teh講啥物。」

Tserviakov suah錯亂gông-gia̍h--去。伊gōng-gōng á笑--leh笑--leh，koh換轉去看舞台頂teh搬戲。M̄-kú伊bē感覺自在teh歡喜看戲。伊lú坐lú不安。過--來搬戲中站hioh睏ê時，伊面皮kik kāu-kāu，行uá去Brizialov ê身軀邊，kā Brizialov念講：「大人，請原諒--我，我拍-kha-tshiùⁿ去phùn著你，m̄-kú，你知，我m̄是刁故意beh ---」

「Ah，好--a-lah！這項代誌我已經放buē記--得-a，ah你koh一直tsha̍p-tsha̍p講！」將軍擋buē-tiâu，煩kah嘴唇直直tshuah。

「伊嘴--裡講伊buē記--得，m̄-kú伊ê目神猶真pháiⁿ。」Tserviakov ná看將軍ê面ná按呢想，m̄信伊ê話。「伊根本to m̄ tshap--我，我一定ài kā伊解說清楚，我m̄是刁故意--ê，---拍-kha-tshiùⁿ是真自然ê代誌…若無，伊會想講我teh kā伊phuì嘴nuā。伊tsit-má無按呢想，以後的確會按呢想。」

轉去到厝--裡，Tserviakov kā in某講伊這項無禮貌ê代誌。伊感覺in某認為這項代誌伊太無小心。In某代先有一點á青驚，後--來知影Brizialov m̄是in翁 ê頂司，伊tō khah安心--lah。

「M̄-kú，你mā應該koh去kā伊會失禮。」in某講。「若無，伊suah會想講你tī大眾面前對伊無禮貌。」

「Tō是按呢！我有kā伊會失禮，m̄-kú伊真奇怪，連一句好話tō m̄講。講實在--ê，hit陣mā無時間thang講話。」

過一日，伊kā嘴鬚khau清氣，穿一su普通制服，koh去見Brizialov，beh kā解說。伊行入去Brizialov公館ê客廳，看著一大堆來請願ê人來tī hia。將軍已經開始teh接見hia-ê人。kap幾nā個請願者講話了，伊gia̍h頭看著Tserviakov。

「大人，m̄知你會記--得buē，昨日tī『Arcadian』…」這個小公務員開始講：「我無張持拍-kha-tshiùⁿ去phùn著你，請你原諒---」

「免koh講--a!你來beh創啥？」

Tserviakov 緊張kah面反白，想講：「伊m̄ tshap--我！伊猶teh受氣， 我一定ài kā伊解說---」

將軍kap上續尾ê請願者講suah了以後，tō beh入去內面。Tserviakov趕緊走去伊ê面前，細聲kā naugh ：「大人！我pháiⁿ勢koh攪擾大人一擺。我kā你保證，我真後悔。我m̄是刁故意--ê。大人你一定ài了解---」

將軍氣kah強beh流目油，用手kā ia̍t走。

「先生，你teh講sńg笑！」按呢tō越入去內底。

「伊講我teh講sńg笑！」Tserviakov 想：「M̄-kú，tse ná是講sńg笑。伊是一個將軍，伊ná會m̄知！若是按呢，我無beh koh再請這個大面神--ê原諒！我tio̍h-ài kap伊爭一個道理。我tio̍h寫批hō͘伊，m̄-kú我bē koh再來這個所在。我tsiù-tsuā，若koh來，我hō͘你吊--死！」

Tserviakov 按呢ná想ná行轉去in tau。伊mā無寫批hō͘將軍。想--a想，伊一世人mā m̄知這張批beh按怎寫這張批。伊tio̍h-ài明á tsài家己親身koh去解說才會使。

「大人，我昨日來攪擾--你，」伊細聲按呢念，將軍感覺奇怪koh kā看，「m̄-kú我m̄是親像將軍所講--ê是teh『講sńg笑』，我是beh來請求你ê原諒，我ná有hiah好膽 拍-kha-tshiùⁿ做滾笑。講sńg笑是對人足無尊敬，我ná敢…」

「你kā我出--去！…出--去！」將軍大聲嚷，雄雄變面，氣kah一個面青筍筍。

「Haⁿh…你講啥物？」Tserviakov驚一tiô細聲nauh，強強beh昏--倒。

「你kā我出--去！」將軍大聲嚷koh大力tsàm腳。

Tserviakov ê胸坎若像beh爆炸。伊tuì大門顛出去到大路頂，hīⁿ á 無聽--著，目睭無看--著，tō按呢an路邊ná爬轉--去。Gāng-gāng爬到厝， phiaⁿ 落去膨椅內面，制服mā無thǹg，---tō按呢來死--去。

作者介紹: Anton Pavlovits Tsikhov (1860-1904)

Anton Pavlovits Tsikhov ê阿公是一個農奴，伊ê老pē是一個細間店á ê頭家。伊tī故鄉讀中學畢業，然後去Moscow入大學讀醫科。伊開始寫小說、趣味ê短文、笑話kap論文。Tī伊the̍h著醫學位ê時，伊ê興趣已經是tī寫作。伊ê成名作是1886年出版ê《Motley Stories》。1888年伊ê《In the Twilight》得著Pushkin ê文學獎。這本冊kap後來寫ê長篇小說《The Steppe》hō͘伊成做當時ê一流作家。M̄-kú伊tī 1896年寫ê第一本戲劇《The Sea Gull》顛倒大失敗。兩冬後，伊koh kā伊改寫，tī Moscow藝術劇院演出， hō͘伊恢復名聲。另外兩個劇本，《The Three Sisters》kap《The Tserry Ortsard》mā仝款真成功。伊kap女演員Olga Knipper結婚，m̄-kú 3年後伊tō因為著肺癆來過身。

Tī規個lua-siah（Russia)ê文學史上，Anton Tsikhov會使講是代表19世紀到20世紀主流文學過渡ê橋。伊ê作品kap當時ê『大作家』有真無仝款ê風格。伊mā ham當時前進ê『當代(Contemporary)』雜誌無牽連。『當代』雜誌tī 1840到1860年代支配著所有ê政治文學。一般講--起-來，tī伊ê作品內面，咱真少看著當時ê政治狀況。咱mā真少看著伊用生、死ê大問題來做題材。這種題材tī 早伊50年eLua5-siah文學界是上流行ê物件。伊無寫過長篇小說，有寫真tsē短篇小說，kā人無teh注意ê現實寫--出-來。伊tī 1880年開始寫作ê時，tú-tú好幾個Lua-siah『大作家』過身 (Dostuevsky 1881、Turgenev 1883) ，Tolstoy mā tī 1880聲明伊beh離開文壇。

1887年teh寫這篇小說ê時，伊真堅持講，文學ê目的應該是「真實koh無條件ê誠實」，藝術家應該「對伊ê良心kap責任負責」。可能因為伊有受過醫師訓練ê背景，仝hit年，伊koh聲明講：「作家應該親像化學家仝款客觀」。