《台文通訊精選》

 | | | 轉寄

未忘花

作者 陳雷 2006.06.04

我tī台大病院作實習醫師hit年，工作真tsē，學業也真重。Tī病院值班ê時，有時有護理系ê學生來實習。若是好運遇著好學生，伊tsē少會kā咱幫忙抽血、量血壓……。若是pháiⁿ運遇著bē曉ê學生，ta̍k項來請教，咱時間了真tsē，教伊khioh小便、洗皮膚……。設使he護士生作普通普通，咱頭殼內無烏白想，立場在在，有閒教khah tsē，無閒馬馬虎虎，應付會過。上困難ê就是，若是護士生作bē bái，又koh ta̍k項bē，a̍h就真pháiⁿ處理。咱看著伊，心內想東想西，伊若來請教，咱ná會講m̄?明明真無閒，mā是耐心笑面，臭ê芳ê攏照起工kā伊教。

Tī五西病房第一遍遇著伊，就是這款真食力ê情形。伊ê學業免論，是按怎考入來護理系，我m̄知。伊ê美麗，選校花、選寶島小姐猶有tshun。尤其是態度大方，bē曉就來請教。若是kā我看一下，我就kap伊去量血壓，kā我笑一下，我就kap伊去khioh小便……。後來，suah連醫生ê尊嚴kap 立場也放捨去，規氣親手替伊去作。一暗bú來，m̄知teh bú啥？頭殼內單單有這位小姐ê形影，坐tī我ê對面，khiā tī我ê身邊，佔去我ê空間……，一大堆自我滿意ê幻想，ná有心去看病人？天光來，教授巡病房，直直長長無歡喜ê面。我問題答bē出來，才親像酒醉醒過來，後悔ná會作出這款糊塗事。

以後有koh幾擺 ī病院ê走廊遇著伊，遠遠就向伊tàm頭，特別光彩ê笑容，我自然行慢落來，目睭去tshuē伊ê目睭，有講bē出來ê美感kap幸福感……。朋友知影我ê問題，kā我講，這位苗栗來ê客人美人，真tsē人teh追求伊，我若是有意思，排tī第十三號。

Hit時我少年無勇氣無血氣，聽著排tī十三號，腳軟手軟，這項代誌就按呢漸漸放無去，卻是也無後悔，伊ê印象並無離開去。幾十年來，有時tī生活壓力真大ê日子，我目睭kheh kheh，the tī胖椅頂，也會koh回想看著伊ê面容，猶原會感觸深深ê美麗kap幸福，世事ê重擔就會放輕--去，生活ê活力又koh出現來。無預料，hit件少年時ê糊塗事，suah變作了真難得寶貴ê記憶，親像人生行單調ê長路頂，罕罕一時，好運去看著一蕾路邊ê未忘花，hiah-nih美麗，久久bē bē記--得。甚至有時也會自問，行這條路敢就是beh來看這蕾花？到底tó一項看法khah tio̍h?我無答案。請問各位，tī你ê人生中，敢也有幾蕾ê未忘花？若是有，我beh招你來吟一首懷念未忘花ê詩：

人生比如海邊水，有時來有時去，有時沉落有時起；
人生比如滿天星，有粒光有粒暗，有粒向北有粒南；
人生比如夜凍露，有滴低有滴kuân ，有滴早去有滴慢；
人生比如蝴蝶夢，有時真有時假，有時歡喜有時望；
人生比如未忘花，有蕾白有蕾紅，有蕾未開有蕾芳。