《台文通訊精選》

 | | | 轉寄

暗時ê後窗

作者 楊照陽 2006.06.11

阿草伯每一擺若講著伊ê阿良，伊就掠狂；m̄是因為伊賣二分祖公á留落來ê財產hō͘伊讀大學，畢業了後koh賣二分地hō͘伊去讀碩士、博士leh m̄甘。伊是leh氣in kiáⁿ kā伊講，tī台灣做助教、講師升到教授ài真久，不如hō͘伊去外國the̍h博士，轉來就升副教授，會khah緊出頭天。

Ná會知影得著統計學博士以後，觀念總改變。伊講美國教授kā伊講，有一個大型研究計劃需要伊留落來。伊講tī NASA太空總署內底，teh研究人造衛星飛行路線不斷修正，飛行中真tsē可能kap無可能發生ê代誌。雖然tse m̄是真深、真新ê研究問題，但是需要真tsē新人去發現新科技、新ê飛行工具種種ê新問題，ná知影koh過十外年。阿草伯腳khǹg tī長椅條(liâu)，嘴連幹kiāu，伊講飼kiáⁿ m̄知影有啥物路用，伊總是食台灣水kap台灣米大漢ê，食果子mā ài拜樹頭，伊轉來台灣做乞食，mā khah贏tī美國teh好額。

Tī半年前，阿良有拍電話轉來，伊講beh退休轉來tuà台灣故鄉，這擺m̄知有影無,...。阿良有講伊tsit-má是地球村ê一份子，伊是世界公民，科技是無國界，講真tsē大道理...阿草伯a愈想愈氣，阿良根本就是芎蕉(黃皮膚，白人思想) 。阿草伯真感慨leh講：「你看，tī大熊星座kap小熊星座下腳，hit粒北斗星，咱看會著，上蓋光，koh永遠kā出外人kap行船人指示北方ê方向。」

這時我注意著閃tī 阿草伯目睭ê光線，m̄知是遠遠星光ê反射抑是伊ê目屎。伊uan-na講，uan-na繼續看遠遠暗暝ê星：「阿良就親像一扇台灣ê後窗，講重要伊m̄是足重要，m̄-koh伊會使供給台灣通風kap光線。但是，我期待伊是一個奉獻者，ná親像一個大門。對一間孤魂厝來講，門ê貢獻khah tsē,親像恁tuà tī台灣teh拍拚ê人攏是一扇一扇ê門，阿良會使算是暗時ê後窗niā-niā。」

阿草伯冊讀無tsē，我聽kah花花。阿草姆a坐tī邊a teh泡茶hō͘阮lim，倒手the̍h正手ê衫á邊teh拭目屎。

我mā leh想，阿良為著beh khah緊踏入太空ê領域，伊tshuē著khah新khah大隻、行khah緊ê船，但是伊敢會記得，阿草伯、阿草姆提供ê旅費，kap hia ê kā伊歡送ê台灣人，m̄知伊敢bat眠夢著福爾摩沙--抑是美麗島從來m̄-bat入伊ê夢？