《台文通訊精選》

 | | | 轉寄

江文也ê人生交響曲

作者 多城客 2007.04.01

最近重讀「江文也的生平與作品」，心內koh一遍感慨萬千，真久真久無法度平靜落來。

江文也，這位台灣人ê蕭邦，對大部份ê台灣人，甚至台灣音樂界少年一輩來講，可能是一個真生疏，m̄-bat聽過ê名。

江文也是台北縣淡水人，1910年出世。13歲ê時去日本讀冊，中學畢業了，進入工業學校學習電氣工程。因為對音樂有真大ê興趣，江文也利用課外ê時間去東京上野音樂學校選修聲樂，唱ê是男中音。工業學校畢業了後，正式投入音樂，tī日本樂壇大師山田耕作ê門下，學習作曲，tī hia奠立伊以後出名國際作曲界ê基礎。

江文也正式開始音樂生活ê頭兩年，tō得著兩遍ê日本全國音樂比賽ê聲樂獎。1934年到1937年四年中間，伊連續四擺得著音樂比賽ê作曲獎。

1936年，江文也以管弦樂「台灣舞曲」，參加柏林奧運文藝比賽，得著特別獎，hō͘伊晉級變做國際級ê作曲家。兩年後，伊ê鋼琴曲「斷章小品」koh得著威尼斯第四屆國際音樂節作曲獎。Tuì hit陣開始，伊ê名聲愈來愈透，作品hō͘人介紹去巴黎、日內瓦、紐約各地。這時江文也猶未三十歲。

Hit時陣，江文也ham半世紀前大部份ê台灣知識份子仝款，認為中國ê北京是台灣文化kap東方文明ê原鄉。伊tī 1938年離開日本籍ê貴族夫人，去北京師範大學音樂系擔任作曲教授，走tshuē伊文化ê回歸，從事中國古早民俗音樂ê研究。Tse是伊一生生命kap作曲ê轉換點。1938年到1948年，是伊去中國了ê黃金時代，伊ê創作生活非常豐富，大型ê民族樂派作品一直繼續出爐。這個期間ê作品有管弦樂曲「孔廟大成樂章」、「第一交響曲」、「第二交響曲-北京」；歌舞劇「大地之歌」、「香妃傳」；宗教音樂「聖詠作曲集」、「彌撒曲」；民俗音樂「中國民歌一百曲集」kap 根據唐詩、宋詞譜曲ê作品一百五十首…等等。

「祖國」五千年文化優良ê傳統tō是「政治tshuā頭，外行ê人領導內行ê」。江文也這位一生無插政治ê音樂工作者，想bē到tī「祖國」ê政治大風湧內底，會變kah一生殘枝敗葉。

1950年代，中國ê反右運動中，江文也因為出身是台灣人，去過日本留學，參加過國際性ê比賽，koh是天主教徒，所以hō͘人掛「老牌漢奸，右派份子」ê罪名。Tuì hit陣開始，伊kap外面ê關係完全切斷，ham日本ê音樂界kap台灣ê親tsiâⁿ朋友失去連絡，伊ê名tī 中國ê音樂界完全消失，作品受禁，bē-tàng 出版也bē-tàng演出。

「文化大革命」ê期間，伊不時受著批抨，受著鬥爭，伊ê身體、心靈受著真大ê創傷。大部份ê手稿tī這個期間流失無去。伊ê gín-á自細漢開始taⁿ知影in老pē是音樂家，m̄-koh攏m̄-bat聽過伊ê音樂。五個gín-á除了上大漢ê以外，攏受排斥tī大學門外。伊ê中國籍夫人吳韻真女士，無法度tio̍h-ài拍賣收藏ê冊、唱片、音響、鋼琴、樂譜等等來維持生活。無鋼琴ê江文也，kā食飯桌á當做鋼琴，十個指頭仔tiàm桌頂彈，真tsē曲是按呢寫出來ê。文化大革命ê尾期，五、六十歲ê江文也hō͘人送去河北定縣ê農場勞動，tī農地挖土、擔土，體力bē kham得，suah幾擺中風，兩擺吐血。文化革命結束了後，江文也受批准轉去北京，m̄-koh身體已經拖磨kah非常虛弱，因為食藥m̄ tio̍h，伊ê病愈來愈重。

這個期間ê江文也，開始對「祖國」ê一切感覺非常失望，漸漸體會著家己ê原鄉是台灣，也引起懷念故鄉ê情思。伊作曲ê風格tuì早期ê西洋樂風，到中期ê民族音樂，koh再轉變做鄉土音樂。伊全心研究整理台灣ê民間音樂，所寫ê思鄉曲有管樂五重奏「幸福的童年」、鋼琴曲「鄉土節令詩曲」、管絃樂「白鷺的幻想」…..等等。江文也tī 67歲ê時，開始創作伊懷鄉ê第五首交響曲「阿里山的歌聲」，m̄-koh猶未完成以前tō腦充血，真可惜，這首曲變做伊ˆ「未完成交響曲」。

1981年tuà tī 美國ê畫家謝里法，tī台灣報紙發表一篇「故土的呼喚 - 記臥病北平的台灣鄉土音樂家江文也」ê文章，hō͘這位台灣人有史以來上優秀ê作曲家江文也，若親像tâi tī斷層內ê枯籐，koh再重新出土。伊ê音樂也重新復活，tī美國、香港、台灣各地演出。M̄-koh這陣江文也已經倒tī眠床，無法度講話。

1983年「台美基金會」kā人文獎頒hō͘ 江文也。仝hit年，咱這代ê音樂大師tō tiām- tiām離開世間。

江文也是一位真有天份，多才多藝ê音樂作曲家。 Tī 西洋ê音樂史，m̄-bat有人親像伊按呢，受著hiah-ni̍h殘忍ê迫害。當年，伊若是無迷失tī尋根ê路途頂，踏出錯誤ê hit一步，相信伊ê成tō會koh khah大，伊ê音樂會koh流傳khah闊。

江文也「祖國」ê夢到路尾是破滅ê。伊所承受ê是台灣人ê原罪，伊所tú著ê是台灣人共同命運ê縮影。咱若回想江文也ê一生，才koh倒轉來看今á日台灣人ê「大陸熱」ê時，敢真正bē hō͘人心寒，感慨萬千？!