《台文通訊精選》

 | | | 轉寄

受祝福ê人生

作者 翠華口講 秀滿整理 2007.04.08

我ê kiáⁿ逸民，出世tī 1976年11月24日。伊出世ê時kap一般ê gín-á無啥物無仝款，目睭大大蕊，真古錐，七坐八爬，伊mā攏照步來。因為我ài上班，就kā伊交hō͘我ê老母照顧。阿媽講這個gín-á真乖，炮á聲砰砰叫，伊mā真好睏，攏bē精神。逸民一歲ê時，雖然伊會tàng發真簡單ê音，無定著是做老母ê頂真，我感覺我ê gín-á親像bē曉講話。一日我tshuā伊去長庚病院檢查，醫生用真肯定ê口氣kā我講，你ê gín-á臭耳。就按呢，我抱我ê逸民離開病院，無一個醫生、護士、抑是社工人員kā我安慰、教我以後ê路ài按怎行，ài如何來教育我ê gín-á。

逸民細漢ê時，身體真弱，不時破病。兩歲ê時有一擺伊規身軀軟kô kô，kā我mo͘h tiâu-tiâu。我tshuā伊去台大、長庚做真tsē檢查，攏查無出原因。真無辦法，有一日聽講汐止有一間醫生館開幕，患者無真tsē，醫生比較khah有耐心聽我講逸民ê病情。伊聽了開藥á hō͘我，叫我轉去觀察gín-á食藥了後ê反應，隨時kap伊連絡，就按呢我kap hit個醫生通一日ê電話。到下晡5點，醫生kā我講：「我真確定你ê gín-á是糖尿病，你ài馬上tshuā伊去台大病院，我已經連絡我ê同事kā伊檢驗。」

隔轉日，早起九點，我接著台大病院khà來ê電話，通知逸民馬上入院。入院了後，馬上kā注射「胰島素」，真想bē到，一個月來軟kô kô ê gín-á，注射了後，hit日下晡就會tàng落來行路。病院ê醫生kā來探訪ê親成講：「若是koh拖一日，這個gín-á tō無命。」

因為是先天性糖尿病，逸民需要繼續注射胰島素來控制病情，劑量是台大病院開hō͘我。伊雖然大部份ê時間好好，每三、四個月tō休克一擺。後來，伊tī美國芝加哥ê兒童病院做檢查ê時，才發現伊所注ê劑量是所需要ê四倍tsē。經過調整，伊tō m̄ bat koh有休克、暈倒ê毛病，總是tse是以後ê代誌。

臭耳、bē曉講話、糖尿病、時常休克、暈去，但是逸民真乖，阮對伊ê疼愛仝款無減少。有一個拜六，伊有一蕊目睭紅紅，我隨tshuā伊去hō͘醫生看，醫生講：「Hō͘ lah-sap 手摸著，無要緊，真緊tō好。」但是我bē放心，我kap我ê頭家規暝無睏，看這個gín-á因為目睭疼，家己用手一直拍頭，我ê頭家也m̄甘，提綿á ùn黃藥水kā sip，至少涼涼，hō͘伊khah快活。隔轉日禮拜，醫生館無開，拜一透早我tō趕緊tshuā逸民去hō͘醫生看，想bē到，醫生講：「恁真假gâu，你ê gín-á已經青瞑a！」伊無愛koh講，就kā阮趕出來。我無相信這個事實，直接坐車去台北上出名ê林眼科。林醫師仝款講gín-á ê目睭已經青瞑。我m̄相信koh再tshuā逸民去台大病院，koh一擺確定逸民ê目睭青瞑，也查出伊另外一蕊有嚴重ê白內障需要開刀。對青瞑ê原因in無確定，但是ioh內面生bái物件。後來開刀檢查ê結果，發現目睭內面並無bái物件，只是急性ê青光眼，無緊急處理轉成ê青瞑。

一路行來，我開始對台灣ê醫生、醫療ê品質kap制度失望。台大病院本來有排手術白內障ê日期，經過考慮，我決定kā取消。另外一個失望是台灣ê特殊教育。雖然我ê gín-á臭耳、啞口、有糖尿病、一蕊目睭koh青瞑，我mā希望伊會tàng受教育。我知影海倫凱勒ê故事，我mā相信我ê gín-á真聰明，會tàng學習。我四界探聽啞口學校、kap一kuá教手語ê場所， 只要有人報，koh khah遠我tō tshuā逸民去。但是所有ê學校攏kā阮拒絕。In講：「拍bē贏人，beh按怎來讀冊？」「學校是beh收有成績會進步ê gín-á，你ê gín-á身體to顧bē好，阮bē-tàng收。」這個時陣ê逸民真sán、真弱，也莫怪無一間學校願意收，阮做父母ê看著真艱苦，真m̄甘。

1982年，逸民六歲，阮tshuā伊去日本，希望日本khah進步ê醫學對伊有幫助。Tī東京市郊外ê一間專門病院，我停留二個月。醫生做真tsē檢查kap研究，因為無十分把握，in m̄敢開刀，帶著真失望ê心情，阮koh倒轉來台灣。

Tī真m̄知影beh按怎ê時，有二個互相無熟sāi ê人kā阮介紹仝一位醫生，伊就是宜蘭真出名眼科醫生陳五福ê kiáⁿ婿，林逸民醫師。伊tī美國聖路易附近ê Woodriver Township Hospital服務。就按呢，阮tshuā逸民tī 1983年來到美國。

Tī Woodriver Township Hospital，林逸民醫師kā逸民開刀，治好伊ê白內障。伊用冷凍治療ê方法治好逸民久久以來ê目睭ê疼。大家知影美國ê醫藥費真貴，逸民住院二、三日，差不多需要5萬kho͘美金，但是病院hō͘阮分期付款，一個月付100kho͘。手術了後，mā有真tsē社工人員來訪問我，問我ê需要kap討論逸民受教育ê問題，in提供真tsē特殊ê課程。我tī hia看著我ê gín-á ná來ná健康，有學習，有進步。日子過了真快樂，我就決定beh留落來，無愛koh轉去台灣。

Tī Woodriver雖然治好逸民ê目睭，總是所在生份，既然有beh留落來，我決定beh搬去芝加哥，至少有朋友tuà hia。Tī芝加哥我前後tuà三年，雖然阮無移民ê身份，但是美國政府認為阮需要特殊ê醫療照顧，阮攏繼續有提著移民局ê簽證。Hit時陣因為有外匯管制，匯美金出國真困難，阮ê生活並無富裕。母á kiáⁿ租一間小小ê房間tuà，總是精神上得著真大ê安慰，無論是tī醫療，抑是tī教育，逸民攏得著真好ê照顧。

我ê頭家因為做生理ê關係，常常tī北美洲走，mā熟sāi真tsē外國朋友。有一日伊tshuā加拿大朋友來芝加哥，這位加拿大朋友看著逸民ê情形，伊kā阮建議：「 Tī世界各國對特殊教育kap醫療作了上好ê國家tō是加拿大，恁ài馬上申請加拿大移民，我相信恁ê gín-á tī加拿大會tàng得著koh khah好ê照顧。恁若辦會出來，這世人恁ê永遠記tiâu我這個朋友。」伊走了，我kap我ê頭家參詳koh參詳。一方面為著逸民，一方面也考慮tī美國阮無移民ê身分，總m̄是久長ê辦法，tō決定透過這位加拿大朋友ê律師提出移民申請。逸民ê情形，阮並無瞞騙加拿大政府，律師送出去ê資料，厚厚一大tha̍h，包括逸民ê病歷。以阮ê情形，真可能辦bē出來。但是這個律師真gâu，盡力替阮爭取，最後逸民提著加拿大政府ê“Minister special permission”。阮一家(除了逸民，阮猶有一個真健康ê查某kiáⁿ，減逸民一歲)，tī 1986年，全家來到加拿大ê多倫多。

Tī多倫多安頓落來，阮就kā逸民送去啞口學校。我家己mā重新出發，讀英文，作生理。Ta̍k學期逸民tuì學校提轉來ê成績單攏是A，hō͘我一個錯覺，若準伊有進步。有一日，伊寫一句 sentence hō͘我，我驚一tiô，因為hit句根本bē通。我感覺這個教育bē使，一定ài有改變。我去拜訪老師，mā去tshuē校長，心內想一定有koh khah好ê方法會tàng教我ê gín-á。學校kā我解說，啞口gín-á因為無辦法了解抽象ê物件，進步kan-taⁿ會tàng到一個程度。但是我bē tàng接受學校ê解說，我想著海倫凱勒ê成功，是因為伊ê後壁有一位真好ê老師沙利文。我想我ê gín-á若準有這種一對一ê課程，伊ê進步會khah tsē，因為時常去學校kap老師、校長爭論，我變作一個無受歡迎ê家長。

無定是上帝ê tshuā路，有一日一個朋友kā我提起，有一個特別ê游泳池，專門hō͘啞口kap青瞑gín-á泅水。我 tsit-má已經bē記得tī tó位，我mā kan-taⁿ去一擺。Tō是hit日，逸民teh泅水ê時，我坐tī邊á等，我看著一個白人gín-á，伊掛耳機，mā有深度ê近視，但是有一個人kā tuè著，用手語kap伊溝通。我看著真奇怪，tō去問管理員，伊講，tse是“W. Ross, Mcdonald Stsool”啞口kap青瞑ê課程(Deaf blind Program)。伊hō͘我一張名單。

轉來了後，我就照名單，一個一個khà電話。每人攏真好禮，kā我說明課程，也約時間來阮tau拜訪。伊mā同意我ê看法，逸民需要一對一ê課程。最後校長親身來訪問，kā逸民測驗。伊mā同意我ê看法，也提供一對一ê課程。就按呢逸民搬去Brandford，tuà tī學校宿舍，接受新課程。

以後逸民ê進步ká-ná teh飛leh，伊ê聰明kap潛力tī這間學校充分發揮出來。伊會曉寫文章kap gâu畫圖，mā會tàng作手藝。伊有一台特殊ê機器叫TTY (Telephone Answering Matsine)，時常用來khà電話kap阮連絡。

今年熱天教會ê夏令會，tī Brandford附近ê Five uak lake舉行，芝加哥來ê許明昭牧師講：「認bat咱家己受祝福ê人生」。牧師講了，tsē tsē人問問題，翠華姐khiā起來講伊受祝福ê人生。雖然伊ê gín-á 無完全，但是因為這個gín-á，伊學習真tsē，全家koh khah相疼。也因為這個gín-á伊tuì台灣、美國來到加拿大tsiah-ni̍h suí、福利tsiah-ni̍h好ê國家。有人不時teh怨嘆加拿大稅金真重，但是咱交稅，交了真有價值，政府做真tsē代誌，有tsē tsē ê福利，tī咱四周圍。

Tse是我頭一擺熟sāi翠華姊，也是頭一擺聽著伊ê故事。Hit日下晡，教會青少年tī營地ê草á埔踢腳球，逸民kap伊ê白人朋友mā來參加。我看著逸民走真緊，跳真kuân，腳手真好。若準無人講，我絕對bē去注意逸民是一個特殊ê青年。

天tsiah-ni̍h藍，草tsiah-ni̍h青。聽著一個感動ê故事，抱著咱受祝福ê人生，阮駛車離開Five Uak Lake。