《台文通訊精選》

 | | | 轉寄

來去Hawaii結婚！

作者 陳柏壽 2007.09.16

『Gokikkong Omededogozaimas! 』主持婚禮ê牧師照英文字母唸了，結婚結束啦！公司準備ê超大型ê limoosine停tī門口; 一批出去，另外一批入來。入來到出去，前後bē超過30分鐘。

「Hawaii是山明水秀，人傑地靈ê好所在，充滿著Romantic ê氣氛。」Tse是作日本生理ê結婚公司tī各地報紙、雜誌，甚至飛機頂ê電影ê廣告。莫怪日本青年舊年有七萬對tī海外結婚，其中七成以上是來Hawaii結ê｡有人講東京都有23區，Hawaii是東京都ê第24區，專門hō͘人結婚用ê。

頂番我有寫一篇『啊那無欲啊那！』描寫來Hawaii生活趁食真無簡單。但是這種「結婚公司」是百業蕭條中ê「一枝獨秀」，發展真緊，無人通比。是本地上蓋好經營ê大企業。

公司hak有真tsē 2/30呎長ê超大型轎車。Hit種車tī紐約kap東京真少有，若有，就是黑社會大lô͘-muâ ê標記車，普通人真少坐。 Tī Hawaii，這種車是用來載新娘、新郎ê專用車，內底是闊bòng-bòng,排一kuá假花，二人坐tī內面，感覺真大pān,駛tī路頂，一隻車佔二、三隻車ê路面。Hawaii ê人已經習慣這種光景，kap這種車共存生活。

公司差不多是無本生理，買空賣空，純服務業。經理是專門去登廣告，tshuē顧客ê線路。另外就是Limoosine司機、攝影師、專門唱Hawaii歌ê歌手。另外就是專門kā人結婚ê職業「結婚牧師」kap專門kā人彈結婚進行曲ê職業「結婚琴手」。

因為是專門結婚ê職業牧師，所以日本話無必要會通，kan-nā 照字母唸ê「証婚辭」唸會通，就有飯好食。這種牧師大部份攏無teh牧會，只要去州政府登記一個號碼，就有資格。親像teh看病人按呢，半點鐘完成一對，有一日結婚十外場ê牧師，「生理」會使講真好，收入mā真kuân。

若是會曉彈琴，尤其是彈管風琴ê人，來tsia是真好，因為真需要這種職業ê琴手。禮拜日尤其是琴手欠人。每一場ê婚禮攏彈仝款ê曲，一日若彈十擺，一年就彈幾千擺。所以in是控制結婚式時間ê主腦，in若彈khah緊，結婚典禮就khah緊完成。結婚公司ê琴手一般彈琴攏彈真緊，新郎kap新娘著三步作二步行，親像機器teh行路。

另外結婚公司攏有安排一位在地ê查某人來唱Hawaii ê「結婚祝歌」。用本地原住民ê詞kap調。無人聽有伊是teh唱啥，調mā無清新ê氣味，有時仔hō͘人感覺去葬式唱khah得當。

想起來mā真可憐：咱作父母ê,kā in tshiâⁿ大漢啦，taⁿ遇著娶嫁ê人生第一大代誌ê時，in suah來「離鄉背井」，去到一個青疏ê所在，tī一間青疏ê建築物，tī一位完全無熟悉ê青疏ê牧師ê面前，依賴一位心靈已經痲痺ê琴手kap歌手，完成in ê「人生大事」。

因為結婚公司真欠會曉講日語ê牧師，所以真tsē人來邀請我做這種頭路。有真tsē擺我去見習這種婚禮，看著牧師若huah講：「新郎、新娘入場，親人朋友請起立！」ê時，只有我kap hit位駛車ê司機khiā起來，全教會攏空空無人。牧師講：「親人朋友致謝詞！」mā攏無人出聲。我ê心肝頭，看著hit二位青年ê面，著tsat起來。

我想起古早細漢tī古坑溪邊厝莊ê日子。若有啥物家庭beh結婚，十日前、八日前全莊tō攏知透透。一年前tō「送定」，全莊各口灶攏食人ê大餅。結婚hit日，全莊ê人攏出動，gín-á tī街仔路走來走去，辦桌mā攏佔大路街仔辦，無人敢講話。全莊ê人為著hit對新人歡喜。

阮gín-á 人攏tuè tī新娘轎ê後面，沿路走沿路huah：『新娘suí噹噹，褲底破一空，後壁爆(pōng)米芳，爆一下新子婿無頭鬃！』面攏lu入去轎內，偷看新娘外suí!新娘beh離開親父母，一邊歡喜，一邊悲傷，mā有新娘teh流目屎ê。但是人人攏知，he是一種幸福ê目屎，因為伊有親成五十、朋友七十、厝邊隔壁一百ê祝福。 是按怎tī人生上蓋重要ê結婚禮典ê時，將家己父母、親成、朋友放棄一邊，離開草根大漢ê故鄉，來到這個青疏ê Hawaii呢？ 是m̄是結婚典禮已經m̄是啥物「人生大事」呢？是m̄是基督教ê人文思想，已經將原本真重要ê聖禮典ê一種，世俗化作有也好無也無要緊ê儀式呢？

有人講tī日本故鄉結婚著開500-1000萬日圓ê費用，負擔bē起，所以來Hawaii。一、二千kho͘美金就會tàng解決。實在講起來，我tī日本莊腳，結婚真樸素，但是真有情，mā m̄免開啥物大錢。「錢，無應該hō͘人作心靈形骸化ê藉口。

Hawaii已經有真tsē大間教會，週間租人作結婚專用ê場所。結婚公司企業化，mā建真tsē小小ê教會tī海邊，hit種教會真suí，但是無人teh作禮拜，只有專門hō͘人結婚，連禮拜早起mā teh結婚。 In唯一ê理由是：Tsia ê無信主ê青年來「教會」結婚，就有機會來接受福音。這種講法，就是最大ê問題。In beh結婚以前，toh知影一、二千kho͘ hō͘這種結婚公司去處理，就一切ok。In心目中對教會ê第一擺ê印象，亦就是第一大ê誤解，就是用「錢」ê目睭來看教會，用世俗ê眼光來款待教會ê聖禮典。

Hia ê暝日輪流teh「處理」結婚典禮ê牧師、司琴、歌手本來是面對著一對心靈上敏感，內心上充實，上熱情ê青年。但是因為結婚典禮ê職業化，雙方面ê心靈自動化儀式化，完全無法度達到結婚ê美麗、淨化、心靈ê提昇、心靈ê誓約ê境界。莫怪大部份這種青年tī典禮完成，踏出教會門口ê瞬間，mā kā教會講「 Sayonara！」啦。

我相信這種「時行」無juā久一定會傳染去台灣。台灣ê青年男女已經開始有人成群結黨來去Hawaii結婚啦！我做一位台灣教會ê牧師，苦勸恁m̄-thang來。恁若真正hiah-nih愛來tsia結婚，mā m̄-thang交hō͘「結婚公司」去處理。恁thang kap本地唯一ê台灣教會連絡，但是ài先kap我有一個約束：提早幾日到位，我beh kap恁好好講道理、準備心;認耶穌基督作恁兩位一世人ê救主、受洗禮。然後我才會歡喜kā恁主持恁ê結婚典禮。M̄免錢。若無這種ê覺悟，請恁一定tī家己所疼ê故鄉，完成恁ê人生大事。