《台文通訊精選》

 | | | 轉寄

『當醫生遇見Siki』

作者 阿秀 2007.11.18

【讀冊心得】

阮ê讀冊會，這個月讀ê冊是賴其萬醫生ê『當醫生遇見Siki』，猶未開始討論，就有人講起「最近醫生nái攏會寫冊？」是啊！讀冊會討論過ê醫生作家，tuì王溢嘉、候文詠、陳雷、王智弘到tsit-má ê賴其萬，寫冊ê醫生確實愈來愈tsē，但tse並無表示醫生無顧正業，醫生ê khang-khuè所接觸ê，有in無仝ê一面，koh加in個人ê感情kap思考，表達hō͘咱ê是專業、豐富、koh有人情味ê故事，『當醫生遇見Siki』就是一本按呢ê冊。

Siki是一字Indian ê單話，意思是「我關心你，你也關心我」。冊中描寫一個印地安女詩人介紹in印地安ê文化遺產ê時，伊講beh向世界各地ê人挑戰，tó一個文化會tàng親像in ê Siki，一個單字就會tàng表達「互相關懷」。賴醫生講伊想真久，確實無辦法tī台灣話、中國話、日本話、抑是英語tshuē著一個單字有tsiah深ê意思。我想tse mā是咱保存母語ê意義，相信tī台灣話中間，mā有簡簡單單ê一個字，無辦法用別種語言來代替。

「我關心你，你也關心我」，是這本冊ê第一主題。Tī咱ê日常生活，有病tshuē醫生，醫生關心咱，咱攏認為是真自然ê代誌。事實上，醫生有時mā需要咱ê關心。故事tuì賴醫師家己身体欠安，tī病院beh接受檢查講起。一個患者khà電話來，引出tsē tsē Siki ê故事，有美國ê，有台灣ê，有人物、有親情，mā有轉去台灣ê感想，。…

賴醫師tī美國23冬。當伊決定beh轉去台灣服務ê時，有真tsē選擇，後來伊決定beh去慈濟醫學院。上大ê原因，是「生命ê老師」這段故事，讀冊會ê朋友特別提出來分享。醫學院ê畢業生，大家攏會記得人体解剖ê時，ho͘h-ma-lin（formaline）ê重味，浮浮腫腫ê屍體，有人想beh吐，有人久久m̄敢食bah-tah（butter）。慈濟ê解剖科，每四個學生就有一具屍體實習，聽講是全世界醫學院上好ê比例。In 對屍體ê處理，無用ho͘h-ma-lin，用高科技ê方法，直接噴一層化學藥品，kā屍體包一層薄膜（coconing）。每一個解剖台攏用kuà khàm起來，頂面貼一張死者ê相片kap一生ê介紹。慈濟師生攏稱呼屍體「老師」，tī學期結束ê時，每一個學生攏寫一張批hō͘老師，報告in ê學習心得。Koh kā屍體一針一線thīⁿ（縫）倒轉去，最後用白布包起來，換清氣ê長衫，tī家屬ê面前由四位學生入木，一張批、一束花，tī學生感恩、崇敬kap祝福中火化。有一位太太講，甘願hō͘學生tī伊ê身軀劃錯一百刀，也無愛in將來tī病人ê身上劃錯一刀。伊koh講，當學生tī伊ê身軀劃第一刀ê時，就是伊心願圓滿ê時。慈濟是一個尊重生命ê所在，莫怪慈濟醫學院會tàng得著tsē tsē ê屍體捐獻，甚至西方國家也tuè bē著。

賴醫師是神經科ê專科醫師。Tī這本冊內底幾nā擺提起「癩癇病」，我對這個病無真清楚，心內想敢是bat聽過ê羊癲瘋」，後來koh看落去才知影kā癩癇病」kap羊，抑是其他ê動物連作伙是真無好，真藐視ê講法。賴醫師借用金恩博士（Dr. Martin Luther King）有名ê一句話「我有一個夢」講：「我有一個夢，tī我ê故鄉台灣，大家bē koh用「瘋癲」、「羊癲瘋」抑是「豬母癲」這種輕視ê字眼。大家攏叫這種腦神經病作「癩癇病」，也mài認為tse是遺傳病、精神病、抑是鬼魂附身，奪走癩癇患者ê社交機會」。Ti tsia咱看會出賴醫師m̄是kan-na醫病，伊mā醫病人ê心靈。伊認為幫助病人除去所受ê誤解kap排斥，kap hō͘病人正確ê治療，仝款重要。

「媽媽的臉兒」這篇文章，賴醫師回想伊ê老母，雖然是真平常ê故事，但是真有感情。文章內底有一首詩就叫做「媽媽的臉兒」，讀冊會ê阿惠特別愛這首詩。

猶會記得吳醫師the̍h這本冊借我ê時，伊講：「這本冊借你看，相信你會真愛，內底有真tsē雞湯。」確實tse是一本心靈雞湯ê冊，非常溫暖。賴醫師目前是慈濟醫學院kap人文社會學院副院長，相信伊轉去台灣，除了醫病、醫病人ê心靈，mā是台灣社會ê一股暖流，讀冊會ê朋友大家真歡喜讀著這本好冊。