《台文通訊精選》

 | | | 轉寄

自由ê光火

作者 Bruce McLeod 2007.11.25

＜羅益世出獄10週年慶祝會演講＞

真想bē到羅益世轉來加拿大已經有10冬ah！10冬ah...自從碧玲kap益世hō͘人tuì機場接出來... Tī hia歡迎ê布條寫講「歡迎加拿大ê民主、人權鬥士羅益世轉來」... Hit一日是禮拜日，in hō͘人直接送去教會... Tī pho̍k á聲歡迎了後，禮拜繼續進行，一位長老讀hit日ê經節，其中包括這句：「上帝已經拍折壓迫者ê拐」。

Tuì hit陣開始到taⁿ，已經有tsiah-nih tsē ê代誌發生... 本底tī土裡teh beh lian去ê脆弱ê民主草木，已經tī hit塊美麗島長大、開花。

Keysen、Cayton kap Serena已經出世。Kap所有ê gín-á仝款，in是上帝無放棄咱這個世界ê信號。In ê出世ná親像是teh預報一個koh khah好ê未來。

益世hō͘人剃光頭，kap一個老人做伙關tī一間細細ê牢房，一個水槽kap thàng光ê便所（toilet）... 電火24小時攏to̍h leh，每日kan-taⁿ 會tàng出去外口運動10分鐘，每禮拜只有5分鐘有電視銀幕監視ê探訪... Hia ê日子這陣來看ká-ná是一個惡夢，m̄-koh這種惡夢猶tī真tsē所在teh發生。

咱m̄ thang bē記得... 益世khiā tī烏暗中，烏暗並無拍倒光明... tī hit張真讚ê相片頂，伊ê面有一tsuā光...

碧玲ê面上（tsiūⁿ）kap內心也有一pha火... 伊每日fax消息去監獄，m̄驚厭siān... 親像耶穌ê故事內底hit個無停teh要求ê寡婦... 一擺koh一擺，攏無beh放棄... 伊去拜訪國會議員，有ê議員無親像Jue Clark（編註：當時ê加拿大外交部長）kā伊拒絕，in有回應... 伊繼續拍電話，推動請願書ê連署，來聯合教會總會ê大會... tī hia演講5分鐘，大家攏真感動... suah落來全場表示支持... koh來是恁送我親身the̍h聯合教會ê聲明去台北... 朱寶山保護我，hō͘我無去hō͘ “胡蠅（hô͘-sîn）”（編註：爪爬á）沾著。

這pha火tuì koh khah深ê所在照出來... 台北ê義光教會tō是tī hia照顧、滋養這pha火。這間教會ê牧師tī獄中kā益世洗禮...

這pha火也tuì台灣基督長老教會發光出來。雖然人數m̄是kài tsē，m̄-koh tī過去烏暗ê年月有發揮真大ê影響力... 1971年tī真危險ê情形之下，教會勇敢khiā出來發表「上帝賞賜人民有決定家己命運ê權利」... 台灣基督長老教會ná親像是鹽... 伊ê影響超過伊ê人數... 伊支持教會URM（城鄉傳道）非暴力抗爭ê訓練... 幾nā百人接受Ed File（編註：加拿大ê牧師兼社會學教授）ê訓練... tsia ê改變kap新生ê奇蹟之一 tō是無用著ĀK ê槍或是爆炸橋樑。無使用暴力...

這pha火也tī Toronto台灣聯合教會發光出來，tī hia台灣ê民主、人權一直受著關心。一個真好ê例tō是這間教會ê會友林哲夫教授ê人生... 伊ê信仰引tshuā伊tuì主日學老師kap聖歌隊隊員到轉去台灣以及世界各地。林哲夫慈悲ê精神hō͘伊不管去到tó位攏有留著一tsuā光明ê道路。

伊tō是34冬前來lòng我ê門ê hit個人，伊kā我介紹台灣民主ê花蕾tng teh開花、奮鬥ê情形。

伊tshuā施明德來我ê辦公室，hō͘我kap伊見面... 我聽著hō͘人著驚ê長期坐監ê故事，以及伊拒絕為著伊無犯ê罪來接受釋放... （因為伊認為，真正ê罪惡是in阻擋民主草木ê生長... 是in對伊侵犯，m̄是伊侵犯in）... Tī深坑ê所在繼續生長，行向khah好ê未來，結果施明德tī掠伊去坐監ê國家當選擔任公職...

林哲夫安排我kap前台灣基督長老教會總幹事高俊明牧師見面... 伊bat來Toronto kap Tutu主教做伙。後來我tī伊台灣ê辦公室kap伊見面... 伊親像鋼鐵hiah-nih堅強... 伊kā我講起伊tī一間細細ê牢房四冬ê情形... 因為伊拒絕講出hit位逃犯tī tó位... 我也有見著伊ê太太... 伊然後tshuā我去義光教會... 我永遠bē去bē記得ê一日。

Tī咱替羅益世慶祝ê這個暗暝，我回想所有tsia ê代誌...我真感動，我beh按呢問我家己kap我ê教會...

咱若是去坐監，咱是會為著啥物原因？是啥物原則對咱hiah-nih重要，咱敢會比一phiân石壁koh khah ngē，bē去受著感動？

有啥物光會hō͘咱有氣力來堅強khiā起？咱若hō͘兩位警衛掠tiâu leh，咱ê面頂敢會恬靜？Tī烏暗ê夢中，咱會寫出啥物詩？

高牧師tī獄中有寫這首詩：

「我求主hō͘我一束鮮花
M̄-koh 伊hō͘我一叢koh pháiⁿ看koh有刺ê仙人掌
我求主hō͘我幾隻美麗ê蝴蝶
M̄-koh 伊hō͘我真tsē koh bái koh驚人ê刺毛蟲
我著驚 我失望 我怨嘆！
但是 經過真tsē日子
我忽然看著hit叢仙人掌盛開真tsē鮮艷ê花
Hia ê刺毛蟲也變做美麗ê小蝴蝶 飄舞tī春風裡
上帝ê旨意是最美善ê ！」

所以tī聖誕節ê時陣，當咱想著hit pha火tī烏暗中teh to̍h，烏暗無kā伊拍hua... 咱用感恩ê心來回想益世tuì烏暗中轉來ê時，伊ê面上有一tsuā光。

Tī這個季節裡，咱祈求咱攏會tàng tuì這pha火學習著物件，也浸浴tī hin內底，hō͘這pha火經過咱ê努力愈傳愈遠，一直到這個自由ê花蕾tī台灣hit塊美麗島、tī加拿大這塊美麗ê土地、以及其他所在，tī hia花蕾ê球根猶koh tâi tī烏暗ê所在，會tàng真有尊嚴自由盛開，一直到上帝所疼惜但是受破壞ê世界變做一個家庭。

註：Bruce McLeod牧師是前加拿大聯合教會ê議長kap前加拿大教會協會ê主席。伊也是一位專欄作家，經常tī加拿大ê報紙寫專欄。McLeod牧師是台灣人長期ê朋友，非常關心台灣民主kap人權ê情形。1989年，羅益世轉去台灣為立法委員選舉助選ê時受掠，以違反國家安全法被判刑10個月。1990年，McLeod牧師代表加拿大聯合教會去台灣，要求國民黨政權釋放羅益世。這篇文章是伊tī 2000年12月初8慶祝羅益世出獄10週年ê演講，台文通訊編輯室翻譯做台文。