《宋澤萊新著《天路拾穗》TOJ/台灣字版》 |
 |
 |
|
 轉寄 |
Tē it pō͘ Tsútê 1: Góa ūisiáⁿmi̍h beh sélé? _5 Kóaⁿ tsáu siâlêng
作者 Sòng Te̍klâi 2025.12.28
Tē it pō͘ Tshinggī titkiù
Tsútê 1: Góa ūisiáⁿmi̍h beh sélé? _5
5. Kóaⁿ tsáu siâlêng
Góa tsiongkîbóe tiòngsiâ! Kóng khí lâi lí m̄ sìn, m̄koh khiok sī tshiantsin-bānkhak ê.
Kóng tio̍h Lo̍kkáng tsitê ū miâ ê siótìn, i goânlâi ê siâⁿtìn iôngmāu tsá to̍h teh khoàisok káipiàn. 29 nî tsêng, tng góa lâi kàu tsitê lāu tìn, tsin tsē ê kó͘ tshù to̍h sòatsiap hông lu pêⁿ, tsin tsē ê tēhêng puttoān teh piànōaⁿ, tsitmá piàn kah liân góa lóng bô siáⁿ ē jīntit. Tsa̍p kúi nî tsêng, góa kah góa ê khantshiú tī kaugōa ê sin siākhu bé tshù, keh bô gōa hn̄g ê só͘tsāi, ū tsi̍t phiàn tōa kah hō͘ lâng m̄ káⁿ siongsìn ê bōng'ápo͘, huisiông khuah; kinkì góa só͘ khòaⁿ, i khímá tsûntsāi íking ū tsi̍t, nn̄g pah nî ísiōng, bōngpâi kah bōng’á tui jû-tshángtsháng bē khamtit, sinkū bô ittì, m̄tsai miâ ê tsa̍ptsháu kah iáhue seⁿ kah tsi̍t sìkè. Hit sî, tìn kongsó͘ kuatgī beh lu pêⁿ tsit phiàn bōng'ápo͘, kā i soktsō tsiâⁿtsò sin ê singua̍h khongkan, tôngsî ó͘ tsi̍t tiâu siōng tōa ê kelō͘, tùi tìn lâm kàu tìn pak, ti̍tthong kàu háipiⁿ ê Tâi tsa̍ptshit sòaⁿ.
Tsitê tōa kangtêng khaikang liáuāu, tìn bîn khaisí tī bōng'ápo͘ sìkho͘ûi tsoh tsè, ēng lâi tìnap pângtōa sò͘ba̍k ê bônglêng. M̄koh tī sikang ê kîkan, tìntiúⁿ hiônghiông phòa tāng pēⁿ, sí khì; tìntiúⁿ ê kiáⁿ pòaⁿmê sáitshia, hutjiân lòng tio̍h kelō͘piⁿ ê bo̍kmôan̂g, tāng siong; ūi tio̍h tse bú kah tìn siōng iâugiân móathiⁿpue. Tongjiân, kangtêng iáu sī tsiàu kî oânkang, hûnbōng phahm̄kiàn khì, tsi̍t tōa phiàn ê pêⁿtē tshuthiān, tsi̍t tiâu tōa tiám’áka lō͘ tsin khìphài koànthong lâmpak.
Tongsî, góa puaⁿ khì tìn kau bô gōa kú, tōa tsabó͘kiáⁿOántêng kantaⁿ tsi̍t hòe gōa, lingbú tòa tī hn̄ghn̄g ê Thianhō͘ Kiong piⁿ'á ê Kuehtshù lí ittài. Ta̍k kang tsákhísî, góa ittēng tio̍h tshōa Oántêng khì lingbú ê tshù, liáuāu tsiah khì siōngpan. Ūi tio̍h kóaⁿ sîkan, góa bô siūⁿ tio̍h kîtha; thàutsá, góa to̍h kā Oántêng khǹg tī otobái ê nâ'á ni̍h, ēng piotshia ê soktō͘, phuntsáu kingkòe tú tùi bōng'ápo͘ khaihuat tshut lâi ê hit tiâu tōa tiám’áka lō͘, tsi̍tlō͘ kàu lingbú ê tshù. Tú khaisí ê tsi̍t tōaⁿ ji̍ttsí, iáubōe huatkiàn ū siáⁿmi̍h bô tùitâng, m̄koh bānbān'á kòe tsi̍t tōaⁿ ji̍ttsí liáuāu, Oántêng khaisí kámmō͘, jîtshiáⁿ huatsio bē thè. Tôngsî góa huatkiàn tsíiàu siūⁿ tio̍h hit tiâu tiám’áka lō͘, góa ê ìsik ni̍h to̍h ē kámkak lō͘ ê nn̄g pêng ū tsin koân ê nn̄g phìⁿ ûitshiûⁿ, kā tiám’áka lō͘ kuiê gia̍p tiâu leh, hit nn̄g phìⁿ ûitshiûⁿ tī góa ê ìsik tiong ē singtióng; kahná jú lâi jú koântōa koh bênghián, tùi góa huattshut uihia̍p, ū beh apkài kòe lâi ê khoán. Góa ithiòng "m̄ sìn siâ", inūi sìn Iésu tsìntsêng, góa mā ū tsi̍tkóa sînpì ê thégiām, m̄koh tōa pō͘hūn lóng sī huisiông tsiàⁿphài bíbiāu ê kingle̍k, tsiônglâi lóng bô tú kòe tsiahni̍h siâkhì ê tāitsì. Tsiū ánne, góa thiaukò͘ì tsáu kàu tōa kelō͘ lâi, kiâⁿ khì lō͘piⁿ ka kiámtsa khòaⁿ māi, tshiûⁿ kiùkèng tī tóūi? Kiatkó ántsóaⁿ to tshâ bē tshut tsia ū tshiûⁿ ê hûnjiah, tsit tiâu kelō͘ kinpún to̍h sī tsi̍t phiàn khuikhuah pêⁿtháⁿ! M̄koh tán kàu góa ua̍t thâu m̄ khòaⁿ kelō͘, hit nn̄g tó͘ tshiûⁿ koh tī tōanáu ni̍h tshuthiān, huisiông kiankò͘ koântōa ê nn̄g phìⁿ tshiûⁿ! Tsitmá góa tsaiiáⁿ góa tiòngsiâ ā. Góa sing ūi tsabó͘ kiáⁿ kîtó, khúnkiû Iésu lâi tīliâu i ê kámmō͘, tsin kín i ê kámmō͘ tī bô tsia̍h io̍h tsi hā tit tio̍h i hó à; m̄koh, góa ê tsingsîn ni̍h ê hoànsiōng pēng bô káisiān!
Góa biánkióng simsîn lia̍h ho͘ tsāi, siūⁿ beh kā tōanáu ni̍h ê hoànsiōng kóaⁿ tsáu, m̄koh bô huattō͘ jûgoān, tsōnghóng suah jú lâi jú giâmtiōng ê khoán. Kàu siōng bóe, góa tsihtsài bē tiâu, ū tsi̍t kang beh khùn tsìntsêng, góa kîtó, tùi Iésu kóng góa ê tsōnghóng put biāu, góa tiòngsiâ ā, ū tsi̍t tiám'á kiaⁿ tsōnghóng bô huattō͘ khoán khí lâi, khúnkiû I lâi kā siâlêng kóaⁿ tsáu. Liáuāu, góa khùn khì; tī bînbāng tiong, góa khòaⁿ tio̍h hit tiâu tōa kelō͘ ê lâm pêng tshuthiān nn̄g ki kúi tsàn lâu koân ê kng thiāu tōa kha, thiàutōng ê kng ná tshintshiūⁿ tsúiian, gîn kng siámsih, m̄koh hō͘ lâng ê kámkak khiok khòaⁿ khí lâi sī unhô bôpí. Góa siūⁿ beh gia̍h thâu khòaⁿ tsitê lâng sī siáⁿlâng, m̄koh inūi I siuⁿkòe pângtōa, góa kantaⁿ ētàng khòaⁿ tio̍h I ê nn̄g ki kha, kîtha lóng khòaⁿ bē tio̍h. I tùi lâm pêng khaisí kiâⁿ khí, I ê khatsiúⁿ ta̍h tī tēbīn, siātshut tsi̍t tsūn tsi̍t tsūn ê kngbâng. Kantaⁿ suiàu nn̄g pō͘, to̍h kiâⁿ oân kui tiâu lō͘, tsin iông’ī to̍h hua̍h kòe hit phìⁿ khuahkhuah ê bōng'ápo͘, góa kámkak kuiê bōng'ápo͘ hòasin tsiâⁿtsò tsi̍t lia̍p tsin sèlia̍p ê tînai, hō͘ I ta̍h tī khatsiúⁿ ēté, siausit khì. Góa sûisî tshéⁿ khí lâi, tsē tī bîntshn̂g téng, bē bêngpe̍k tsitê bāng ê ìsù, kámkak ū tsi̍t tiám'á bo̍kbêng-kîbiāu. Góa koh khùn khì, tējī pái, tsitê bāng kohtsài tshuthiān, tsōnghóng kah tsêngtsiat oântsoân itbô͘-itiūⁿ, góa koh tshéⁿ khí lâi, tsē tī bîntshn̂g, iûgoân kámkak bo̍kbêng-kîbiāu; góa koh khùn, tēsaⁿ pái, kângkhoán ê bāng, kângkhoán ê tsōnghóng kah tsêngtsiat kohtsài tshuthiān, m̄koh tsit pái ê bāng tī teh beh siausit tsìntsêng, tōa kha ê tsi̍t pō͘hūn kngbâng hutjiân tòa ji̍plâi góa ê hingkhám, hō͘ kuiê lâng lóng kámkak unloán khí lâi. Tsit pái tshéⁿ khí lâi, góa kámkak tōanáu ni̍h ê tshiûⁿ phahm̄kiàn khì à, hutjiân to̍h liáukái kuiê bāng ê ìgī. Tùi tsitê bāng ni̍h ê tōa kha, góa ū tsi̍t tōaⁿ sîkan bô huattō͘ khaktēng sī Samūi-Ιtthé ni̍h ê tó tsi̍t ūi, m̄koh, góa phianhiòng jīnûi I sī Iésu, inūi tsitê hêngsiōng tsin tshintshiūⁿ "Khésīlio̍k" ni̍h só͘ biâusu̍t ê Tsú Iésu ê kha. "Khésīlio̍k" it tsiuⁿ 13 tsat ánne kóng,"Tingtâi tiongkan ū tsi̍t ūi tshintshiūⁿ Jîntsú ê, khiā tī hia, singkhu tshēng sôe kàu khaāuteⁿ ê tn̂gphàu, io ni̍h hâ kim tòa. I ê thâumn̂g tshintshiūⁿ seh, mā tshintshiūⁿ iûⁿmn̂g pe̍h siaksiak; I ê ba̍ktsiu tshintshiūⁿ hóeiām ánne siámsih; I ê kha tshintshiūⁿ kingkòe toànliān koh tshat kng ê tâng kng iàⁿiàⁿ ……." Ánne, tsitê ībāng ê tsintsiàⁿ ìgī iū koh sī siáⁿmi̍h leh? Tsitê ībāng to̍h sī SiōngTsú siūⁿ beh tùi góa kóng, "Lí piáubīn kétsò bô teh sìntáu, m̄koh góa tsaiiáⁿ lí ê simlāi gōani̍h kiaⁿ síbông, tsi̍tē kìⁿ tio̍h síbông to̍h kiaⁿ kah puttikliáu, iûkî sī khòaⁿ tio̍h tsiahni̍h tōa ê bōng'ápo͘, tsá to̍h m̄tsai jûhô sī hó! Inūi lí lia̍htsún lí ittēng ē sí, só͘í lí to̍h bô huattō͘ siámpī síbông ê koko-tîⁿ. Mā inūi ánne, lí to̍h hō͘ siâlêng ū thang pikhāi lí ê kihōe, siâlêng to̍h ēng síbông lâi khiónghat lí. Tsóngkiat lâi kóng, kiaⁿ síbông tsiah sī kinpún ê būntê. M̄koh, nāsī lí tsaiiáⁿ lí sī bē sí ê, ánne siâlêng to̍h koh khah ántsóaⁿ to bô huattō͘ koántsè lí. Lí khòaⁿ, síbông kám kóng ū tsiahni̍h tōa ê le̍kliōng? Síbông kám ū tsiahni̍h tōa ê koânsè? Lí tsitmá m̄ sī khòaⁿ tio̍h, síbông tī góa ê khaē tsí putkò sī tsi̍t lia̍p tînai, bô tapsap kám m̄ sī? Tī góa ê koktō͘ ni̍h bô síbông tsit khoán tāitsì!" Kámsiā SiōngTsú, I to̍h sī ánne kóaⁿ tsáu góa simlāi ê siâlêng, i hó góa náu ni̍h ê hoànsiōng; bānbān'á, góa píkàu khah ētàng bô kiaⁿhiâⁿ lâi bīntùi síbông, mā kámkak kakī ê hòesiū ē pí tsìntsêng góa kakī àmtiong só͘ kó͘kè ê ke 10 nî, góa tikkhak ū tsitê tsūsìn!
Tôngsî, tse sī góa kîtó sûisî ū hôeèng ê sūlē tsi it, i hiánsī SiōngTsú te̍kpia̍t ētàng hôeèng ū kínkip khùnlân ê lâng, iûkî sī hāmlo̍h tī sèⁿmiā kaukuan ê sî, tsíiàu lí kîtó, SiōngTsú sûisî to̍h ē hôeèng. Kàu taⁿ, tsit tsióng hiānsiōng iáu tī góa ê singkhu téng múipái tshì lóng bô tshatshò. Kin'áji̍t ū lâng kîtó tsóng sī bôhāu, goânin to̍h sī tshut tī o͘pe̍h kîtó, bô iàukín koh bô kèta̍t ê tāitsì mā the̍h lâi kîtó, sīmtsì sī bōngsióng kîkiû, kiatkó SiōngTsú tsi̍t nn̄g pái bô hôeèng, lí to̍h koài SiōngTsú, lia̍htsún SiōngTsú m̄ tsiàukò͘ lí. Kîsi̍t, kîtó tsísī tsi̍tê "sim" ê būntê, tng lí ê sim inūi piktshiat koh piàn kah huisiông tshimkhik ê sî, tsíiàu lí kîtó, SiōngTsú lóng ē sûisî hôeèng!
