《BONG報bóng選》

Sió Hioh-khùn--tsi̍t-ē

作者 Tân Siù-gio̍k

Tsá-sî bô-îng, àm-sî bô-îng! Tsi̍t-ji̍t jī-tsa̍p-sì tiám-tsing, lóng teh bô-îng! Sī ūi siánn-mi̍h? Sìng-king tíng-bīn kóng, “Iânn tio̍h tsûan sè-kài, suah sit-khì ka-kī ê sìnn-miā.” Án-ni kám ū kè-ta̍t?

Pîng-iú, sió hioh-khùn--tsi̍t-ē, tī an-tsīng tiong, tsù-ì thiann sim-lāi bî-sió ê siann-im, hōo thâu-khak tshing-tshínn, thang hó-hó-á su-khó, tī jîn-sing ê si̍p-jī-lōo-kháu, lán sī beh kiânn tùi tó-ūi khì?

Kui-ji̍t oo-pe̍h tsông, bô-îng tshih-tshih, tann khùann-kìnn hn̄g-hn̄g sîng-kong ê suann-niá, bô khùann-kìnn kē-kē sit-pāi ê suann-kok, tùi nn̄g-pîng bí-lē ê sè-kài, koh-khah khùann bē tio̍h.

Tán kàu ū tsi̍t-kang, lí bô tiunn-tî, huat-hiān sui-jiân tit-tio̍h tsûan sè-kài, tān-sī sit-khì sim-lāi ê pîng-an kap hí-lo̍k, ia̍h-sī jîn-lūi siōng pó-kùi, thian-sing lóng ū ê ” ài ” ê lîng-li̍k. M̄-tsai beh án-tsúann ài--lâng, iā m̄-tsai beh án-tsúann hōo lâng ài. Pîng-iú, kàu hit-sî, lí sī tit--tio̍h, iah-sī sit--khì? Hōo lí ka-kī khì súan-ti̍k.

Sìnn-miā sī tsin té, siánn-mi̍h lâng to bô huat-tōo khì pá-ak ka-kī ê bîn-á-tsài, tī múi-ji̍t tsiok bô-îng ê sî-tsūn, sió hioh-khùn--tsi̍t-ē, khì tshiau-tshūe sìnn-miā ê ì-gī kap kè-ta̍t, tsiah ū khùi-la̍t thang kè-sio̍k phah-piànn--lo̍h-khì.