《台灣諺語鹹酸甜》

三兄弟股一條瓊麻索

作者 Lahjih

瓊麻就是龍舌蘭，俗稱樹絲，因為伊樹葉ê纖維，韌koh m̄驚水浸，提來股索á，堅固耐用，是討海人ê重要工具，南部出產kài tsē。

用瓊麻股索á是m̄-bat看過，用黃麻絞索á，m̄但bat khùainn，囡á時代mā bat kap大人絞過，不過絞--è是兩股ê索á，絞三股--è就無迄款功夫。

過去生活tī庄腳ê作穡人，擔擔ê畚箕、米lûa ài縛索á，載貨、縛柴ài用索á liàu，牽牛、駕kha車、駛田、捆豬、拖車…步步lóng tio̍h用索á，索a2ti7田庄所在是生活必須品。細條索á用雙手撚，抑是tiàm腳頭u搓就會使tsit，大條索若無用家私頭á來股，是無可能ê代誌，過去作田人若有閒工，就三五個招--leh，互相tàu相仝，扑幾條á索a2khng3-lehthang用。

股索a2ai3用絞索á機，he是一套用木材做ê工具，前車是四角型ê框架，kah黏tī椅條頂，有三kâi孔，穿三支ㄣ字形ê鉸á，前面會凍結索á，後面用一塊竹phùe鑽三kâi孔，拄好lop-tī三支絞á，thiòng-á三支同齊股tín動；後車kan-nā一支柴柱，半人kûan ê所在mā戳一孔，仝款穿一支ㄣ字形ê絞á；另外有一粒羊á頭形ê tīng柴，刻三條溝，beh hōo三股ê黃麻khùa tī溝內，tsiah會凍平平順順、pênn-pênn正正股成一條索á。

股索á tio̍h-ài三個人，一個hūann前車，顧hit三支絞á ê運轉，絞正絞，一個固定後車，用倒手挽hit支柴柱hōo固定，kohtioh8用正手股絞á，而且ài倒絞，hūann羊á頭tsiah是師傅，索á絞會súi lóng tio̍h靠iê功夫kap指揮。

Tsit-mái開始beh絞索á--lòo：前車先絞一支絞á，師傅提黃麻皮套tiàm絞á頭，然後一皮一皮紡，紡一條五丈長ê無股ê索á，tsiah koh紡一條兩丈半--è,五丈--ē拗做兩ku̍eh，套tī後車，尾節套tī前車，tsit-má前車三支絞á縛三條索，後車一支絞á mā縛三條索，師傅掠羊á頭ùi前車hit旁套好勢，然後一聲開始，前後車股無停，師傅hūann羊á頭順索á股一直倒退lu，後車一直股一直hōo索á khiú晉前，手挽腳kīng，驚做索á傷līng，索á若傷līng，絞khit來ê索á一定phànn-phànn，bē堅固耐用。

後車哪會行晉前呢？因為索á愈絞愈ân suah愈絞愈短，本來是兩丈半，絞好可能tshun兩丈兩尺，kiu三尺算真正常。一條絞好即koh絞一條，beh大beh細，由在師傅斟酌suah黃麻，黃麻若suah tsē，索á自然大條，黃麻若suah少，索á當然細條，若是絞兩股ê索á就卡簡單，可惜bē勇mā卡pháinn看頭，he是師á工學絞，絞tshit-thô--ē。

「三兄弟股一條瓊麻索」，若有和協會齊，he是真簡單，團結就是力量，看田庄人絞索á就是上好ê證明，早當時阮田庄兄弟leh絞索á，無一定是親兄弟，卻是合作團結ê力量是無teh比，因為庄內ê厝邊隔壁lóng若親兄弟，過去ê庄腳人，m̄免去強調啥物『敦親睦鄰，守望相助』，庄頭ê安全就顧kah好勢好勢，時代leh變，社會一直變遷，古早味，古早ê人情味，使人懷念。

「三兄弟絞一條黃麻索」ê『團結力量』，會凍hōo無論是國民黨、民進黨抑是新黨ê兄弟做參考，「團結」ê團體，tsiah是有向望--ē。





【註解】：1.瓊麻：khîng-mûa。2.纖維：tshiam-ûi。3.韌：jūn。4.股：kóo。絞。5.索á：[繩子]。6.kài tsē：真tsē。7.擔擔：tann-tànn。8.米lûa：米籮。9.liāu：[纏繞tio̍h綁物]。10.kha車：駕牛ê器具。11.步步：逐項。12.撚：lián。13.腳頭u：[膝蓋]。14.搓：so。15.家私頭á：工具。16.khǹg-leh thang用：[放tio̍h備用]。17.kah黏tī椅條頂：[架在長板凳上]。18.三kâi孔：三個洞。19.竹phùe：[竹片]。20.lop-tī：套進在…]。21.thiòng-á：thìng-hó(聽好），可以。22.戳：tsha̍k，鑿。23.tīng柴：[硬木頭]。24.khùa tī：[擱置在…]。25.hūann前車：操作機器叫hūann。26.絞正絞：[右旋轉]。27.挽：bán,[用力挽住]。28.正手：[右手]。29.倒絞：[反轉]。30.無股ê索á：親像大條紗á。31.拗做兩ku̍eh：[折成兩節]。32.倒退lu：[倒退走]。33.khiú：giú、[拉]。34.手挽腳kīng：[手腳並用、穩住木柱]。35.傷līng：[太鬆了]。36.phànn-phànn：[鬆鬆的，不夠堅固]。37.an̂：[緊]。38.kiu：[縮]。39.suah黃麻：[一片一片加黃麻下去]。40.bē勇：[不堅固耐用]。41.和協會齊：[同心協力]。