《台灣諺語鹹酸甜》

一工寒，一工漏，半暝透風吹倒樓

作者 蕭平治

br>講起細漢ê故事，使人心情真鬱卒，想beh講hōo逐家聽，恐驚矣少年--ê會議論，親像tsit款狗屎乾，聽聽leh是beh創啥？

無講亦是真艱苦，拜託請lín小忍耐。

四十外冬前，台灣tú好降服後，日本á轉去in兜，國民黨tânn-á來到，萬項tng tín 動，向望生活變輕鬆，可惜四萬換一箍，生活艱難亂tshau-tshau。

食是蕃薯簽飯配菜脯，放屎放著tsiah大箍，穿是補了koh再補，beh穿鞋做你免孝孤，tùa --ê竹管厝，壁抹牛屎攪綿hu，厝頂khàm稻草，有人叫做草厝。

睏竹仔眠床，熱人真正涼，寒天就hiau-hīng，腳手凍kah痛，無暖氣，用火籠，草蓆下底tshu草tshinn，面頂tsiah 蓋十二斤ê 破棉被，阿爸、ī -- ā，大兄、二姊，我kap小弟，kheh-kheh做一夥，講án-ni khah燒烙，實在是不得已。

穿是穿bē燒，睏是冷ki-ki，厝頂若是àu--去，壁縫若是大裂，koh是tn̄g著十二月天，起北風，烏寒兼落雨，真正有影「一工寒，一工漏，半暝透風吹倒樓」。

少年朋友好佳哉，出世tī tsín ê 時代，食穿富足無煩無惱，m̄知影啥物是悲哀，奉勸各位少年兄，少年阿姊，人愛惜福，認真扑拼，認真讀冊才合理。

【註解】：1.狗屎乾：[陳年往事]。2.降服：kàng-ho̍k，日本投降。3.tânn-á來到：[剛剛]來到。4.tng tín動：[正在變動]。5.亂tshau-tshau：[亂七八糟]。6.四萬換一箍：大約1950年舊台弊四萬箍（元）換新台弊一箍。物資波動真厲害。7.免孝孤：免想，孝孤本來是講孝孤魂野鬼，借用做大食，粗魯食，無情願hōo人食ê pháinn聽話。8.tùa--ê：[住的]。9.綿hu：[棉屑，紙屑]。10.tshu草tshinn：[墊新鮮的稻草做墊被]。11.十二斤ê破棉被：古早流行大棉被。12.i7 --ā：阿母。13. àu--去：[腐壞]。14.kheh-kheh 做一夥：[擠在一起]。