《耶穌言行錄》

| | | 轉寄

Tē-99-tsiuⁿ,Iâ-so͘ tsiūⁿ thiⁿ

作者 Ko Kim-sing. 2010.02.28

（Má-khó 16：19；Lō͘-ka 24：50，51； Sù-tô͘ Hīng-tuān 1：6-14，2：1-47）
Iâ-so͘ tit-beh lī-khui ha̍k-sing tsiūⁿ thiⁿ，hit sî kā in kóng，"Sìng Sîn kàng-lîm ê sî，lín tsiū ū tsâi-lîng，ia̍h in-uī guá tī Iâ-lō͘-sat-líng lâi tsuè kan-tsìng，ia̍h tī thong Iû-thài kok，Sat-má-lī-a ê tuē-hng，kàu put-tsí ki̍k hn̄g ê só͘-tsāi，lóng tsuè kan-tsìng. "

Iâ-so͘ kóng suah，tsiūⁿ-thiⁿ；tsìng-lâng kia̍h thâu khuàⁿ-kìⁿ，ū hûn jia—tio̍h，tsiū khuàⁿ Iâ-so͘ bô kìⁿ.

Tsìng-lâng siông-sè teh khuàⁿ thiⁿ，ū nn̄g lâng tshīng pe̍h-saⁿ khiā tī I ê sin-piⁿ tsiū kóng，"Ka-lī-lī lâng ah，siáⁿ-sū kia̍h thâu khuàⁿ thiⁿ teh khiā？Tsit ê Iâ-so͘ lī-khui lín tsiūⁿ-thiⁿ，tsiàu lín só͘ khuàⁿ-kìⁿ án-ni tsiūⁿ thiⁿ，āu-lâi tik-khak beh án-ni lo̍h-lâi. "

Sù-tô͘ tuì Kaⁿ-ná suaⁿ tò-khì Iâ-lō͘-sat-líng，tsiū peh tsiūⁿ lâu-tíng，tsi̍t sim tsuan-bū kî-tó.Hit sî ha̍k-sing tsū-tsi̍p ū iok-lio̍k pah-jī lâng，tī in ê tong-kan ū kuí-nā ê hū-jîn-lâng，Iâ-so͘ ê lāu-bú Má-lī-a，kap Iâ-so͘ ê hiaⁿ-tī ia̍h tī-teh.

Koh tsa̍p ji̍t ū tit-tio̍h Iâ-so͘ só͘ ìng-ún ê sué，tsiū-sī Sìng Sîn ê kám-tōng.Sù-tô͘ kóng tō-lí，tsuē-tsuē lâng huaⁿ-hí tsiap-la̍p i ê uē lâi niá sué-lé，hit ji̍t ke-thiⁿ saⁿ-tshing lâng.Tāi-ke huaⁿ-hí o-ló Siōng-tè，Tsú tsiong tit-kiù ê lâng ta̍k ji̍t ke-thiⁿ tī kàu-huē.

Tuì Iâ-so͘ tsiūⁿ-thiⁿ ê ji̍t kàu taⁿ，kàu-huē ná tuā，m̄-nā tī Iû-thài kok，ta̍k pang-kok ia̍h ū.

思羅安台語點字網站