《耶穌言行錄》

| | | 轉寄

Tē-98-tsiuⁿ,Iâ-so͘ tī Ka-lī-lī

作者 Ko Kim-sing. 2010.02.21

（Má-thài 28：16-20；Iok-hān 21：4-19 Sù-tô͘ Hīng-tuān 1：1-5；I Lîm 15：3-7）
Āu-lâi ha̍k-sing khì Ka-lī-lī，kàu Iâ-so͘ só͘ kóng ê suaⁿ.Ū tsi̍t ê-hng，tshit ê ha̍k-sing khì Ka-lī-lī hái thó-hî，thong-mî thó bô.Thiⁿ tit-beh kng，Iâ-so͘ khiā tī huāⁿ-nih，ha̍k-sing m̄-tsai sī Iâ-so͘.Iâ-so͘ kóng，"Suè-kiáⁿ ah，ū mi̍h-phè bô？"Ìn kóng，"Bô. "Iâ-so͘ kóng，"Pha bāng tī tsûn ê tsiàⁿ-tshiú-pîng thang tit-tio̍h. "tsi̍t-ē pha，tse bāng the̍h buē-tit-khì，sī in-uī hî tsuē ê iân-kò͘.Iok-hān kā Pí-tik kóng，"Sī Tsú lah. "Pí-tik thiaⁿ-kìⁿ sī Tsú，hâ i ê saⁿ，thiàu-lo̍h hái.Kî-û ê ha̍k-sing tsē tsûn-á thua hî-bāng kàu huāⁿ-nih.Tsiūⁿ-huāⁿ khuàⁿ-kìⁿ piáⁿ，sio hé-thuàⁿ ê tíng-bīn ū hî.Iâ-so͘ kóng，"Tú-á lia̍h ê hî the̍h kuí-bé hō͘ guá. "Pí-tik khì thua-bāng tsiūⁿ huāⁿ，tué tuā bé hî sǹg ū tsi̍t-pah gō͘-tsa̍p-saⁿ bé，hî sui-bóng tsuē，bāng buē li̍h.

Iâ-so͘ kóng，"Lâi tsia̍h. "Iâ-so͘ the̍h piáⁿ hō͘ tsìng-lâng，hî ia̍h sī án-ni.

Tsia̍h suah，Iâ-so͘ kā Pí-tik kóng，"Iok-ná ê kiáⁿ Se-bûn，lí pí tsiah ê tsìng-lâng khah thiàⁿ guá mah？"Pí-teh ìn kóng，"Tsú ah，tsai guá thiàⁿ Lí. "Iâ-so͘ kóng，"Tsiàu-kò͘ guá ê iûⁿ-ko. "Koh kóng，"Iok-ná ê kiáⁿ Se-bûn，lí thiàⁿ guá bô？"Pí-tik ìn kóng，"Tio̍h；Tsú tsai guá thiàⁿ lí. "Iâ-so͘ kóng，"Tsiàu-kò͘ guá ê iûⁿ. "Tsiū koh kóng，"Iok-ná ê kiáⁿ Se-bûn，lí thiàⁿ guá bô？"Pí-tik khuàⁿ saⁿ-pái mn̄g，tsiū iu-būn kóng，"Tsú bô tsi̍t hāng m̄-tsai，tsai guá thiàⁿ lí. "Iâ-so͘ kóng，"Tsiàu-kò͘ guá ê iûⁿ.Guá si̍t-tsāi kā lí kóng，"Lí siàu-liân ê sî，hâ io-tuà tshut-tsāi lí kiâⁿ，kàu lāu uē tshun-tshiú hō͘ lâng pa̍k，thua kàu m̄-ài khì ê só͘-tsāi. ""Kóng án-ni sī tsí Pí-tik uē tsáiⁿ-iūⁿ sí，lâi îng-hián Sōng-tè.Iâ-so͘ koh kóng，"Tè guá. "

Iâ-so͘ tsi̍t pái tshut-hiān hō͘ gō͘-pah-guā lâng khuàⁿ-kìⁿ.Āu-lâi hō͘ Ngá-kok khuàⁿ-kìⁿ.Lō͘-bé pái Iâ-so͘ tshuā ha̍k-sing kàu Kaⁿ-ná suaⁿ，tuì hia tsiūⁿ-thiⁿ.Hit sî Iâ-so͘ bīng-līng sù-tô͘ kóng，"Bo̍h-tit lī-khui Iâ-lō͘-sat-líng，tio̍h thìng-hāu Pē só͘ ìng-ún，tsiū-sī lín tuì guá só͘ thiaⁿ-kìⁿ，sī Iok-hān īng tsuí kiâⁿ sué-lé，to̍k-to̍k lín bô luā-kú，tsiū beh niá-siū Sîn ê sué. "

Iâ-so͘ tsi̍t pái kā sù-tô͘ kóng，"Thiⁿ-tuē lóng-tsóng ê kuân kau-hù guá；lín khì tsio bān-kok ê lâng tsuè ha̍k-sing，īng Pē，kiáⁿ，Sìng Sîn ê miâ kiâⁿ sué-lé；kà-sī in siú guá só͘ bīng-līng lín—ê，koh guá siông-siông kap lín tī-teh，kàu sè-kan ê lō͘-bé. "

思羅安台語點字網站