《耶穌言行錄》

Tē-9-tsiunn,Phok-sū

作者 Ko Kim-sing.

listen



（Má-thài 2：1-12）
Iâ-soo tsuè Enn-á ê sî，ia̍h ū phok-sū lâi khuànn I .Tsiah ê phok-sū sī tuì hn̄g-hn̄g lâi，kiám-tshái sī tuì Pho-su kok，á-sī tuì tang-hngg ê sóo-tsāi lâi.In tshing-tsuè phok-sū，sī tshang-miâ，ia̍h ū siông-siông káng-kìu thian-bûn ê tāi-tsì. In ū tsi̍t hāng tsin hó，tsīu-sī kàen-uì Iâ-hô-hua.

Siōng-tè thuè in siat tsi̍t ê koh-īunn ê hong-huat，hōo in tsai Kìu-tsú lîm-kàu sè-kan，koh tshuā in khì ho̍k-sāi I；tsīu-sī hōo in khiànn-kìnn thinn- tíng ū tsi̍t-lia̍p put-tsí koh-īunn ê tshinn，sī piáu-hiān Iâ-soo tshut-sì，tsiong hit lia̍p lâi ín-tshuā in khì kìnn-tio̍h Iâ-soo.Phok-sū bîng-pi̍k tsit ê tāi-tsì，sim-lāi tsin huann-hí，liâm-pinn khì-sin khì Iâ-lōo-sat-líng pài Iâ-soo.Khì ê sî suà tuà in kok sóo tshut ê pó-mi̍h，n̂g-kim，jú-hiunn，bu̍t-io̍h lâi hiàn hōo Iâ-soo.

Í-king kàu Iâ-lōo-sat-líng，tsīu mn̄g kóng，"Tshut-sì tsuè Îu-thài lâng ê ông tī tah-lo̍h？guán tī tang-hngg khuànn-kìnn I ê tshinn，sóo-í beh lâi pài I . "

Lūn Iâ-soo tsin-tsiànn sī Ông，tsīu-sī bān ông ê Ông，bān tsú ê Tsú，sī tsiáng-kuán lâng ê sim，hōo lâng hâng-ho̍k tī I.Hi-lu̍t ông thiann-lìnn phok-sū lâi tshē Îu-thài ông，i kap i ê peh-sìnn tsin kiann，in-uī kiann-liáu tsing i ê ông-uī，m̄-tsai Iâ-soo ê kok m̄-sī sio̍k tī sè-kan，tsīu-sī sio̍k thinn-tíng.Hi-lu̍t ông kiò tsè-si，tha̍k-tsheh lâng mn̄g kóng，"Ki-tok ing-kai tī tah-lo̍h tshut-sì？"In tsīu kóng，"Pik-lī-hîng，in-uī Sìng-tsheh ū án-ni kì-tsài. "Yuì hit-tia̍p Hi-lu̍t àm-tsīnn tiàu phok-sū siông-sè mn̄g tshinn tshut-hiān ê sî，mn̄g láiu tsīu tshe in khì Pik-lī-hîng，kóng，"Lín tio̍h khûn-khûn tshē Enn-á，tshē-tio̍h，tio̍h lâi kā guá kóng，guá ia̍h beh khì pài I. "Hiah ê phok –sū thuann Hi-lu̍t ê bīng-līng tsīunn kiânn，hut-jiân tang-sì sóo khuànn-kìnn ê tshinn tsuè-thâu tshuā in kàu Enn-á sóo hioh ê sóo-tsāi.

Phok-sū khuànn-kìnn hit lia̍p tshinn huann-hí kàu buē-kòo-tit，tsīu ji̍p tshù，khuànn-tio̍h Enn-á kap lāu-bú Má-lī-a，phak-the pài Enn-á，khui pó-a̍h，īng n̂g-kim，jú-hiunn，bu̍t-io̍h lâi hiàn hōo I.Lán tha̍k phok-sū ê tāi-tsì，ū kuí-nā hāng lán thang o̍h.Tsīu-sī tio̍h khûn-khûn tshē Iâ-soo.M̄-sái kiânn hn̄g lōo lâi tshe，in-uī I sī ta̍k-uī tī-the ê Siōng-tè.Lán ia̍h m̄-sái tsi̍t-lia̍p tshinn lâi tshuā，in-uī ū tsiâu-tsn̂g ê sìng-tsheh，sī-pí tshinn put-tsí khah kngg，koh ū Sìng Sîn thang tsiò kngg lán ê sim，tsóng-sī lán ê sim kap sing-khu lóng-tsóng hiàn hōo Siōng-tè. Sìng-tsheh kóng，"Guá ê kiánn tio̍h tsiong lí ê sim hiàn hōo guá，"koh kóng，"Tio̍h hiàn lí ê sing-khu tsuè ua̍h ê tsè. "

思羅安台語點字網站