《耶穌言行錄》

| | | 轉寄

Tē-59-tsiuⁿ,Khiam-sùn

作者 Ko Kim-sing. 2009.05.24

(Má-thài 18：1-6； Má-khó 9：33-37；Lō͘ ka 9：46-50）
Iâ-so͘ ê ha̍k-sing taⁿ tsai Iâ-so͘ sī Ki-tok，tsiū-sī thian-kok ê Ông，tsóng-sī iáu-bē tsai thian-kok ê khuán-sit，sim-kuaⁿ iáu-kú ǹg sè-kan siūⁿ kè-thâu，him-bō͘ sè-kan ê îng-hián，ài tit-tio̍h thian-kok lāi ê tuā-uī，kuí-nā pái saⁿ-tsiⁿ gī-lūn tsit hō ê tāi-tsì.Iâ-so͘ khǹg in m̄-thang kiû sè-kan ê tsun-kuì，nā ài sîng-si̍t ê tsun-kuì，tio̍h tsīn-la̍t lī-ik lâng，ná tshin-tshiūⁿ tsuè tsìng-lâng ê tshe-īng.Ha̍k-sing tsi̍t pái mn̄g I kóng，"Tī thian-kok tsī-tsui7a2 tsuè tuā？"Iâ-so͘ kiò tsi̍t ê gín-ná hō͘ i khiā tī bīn-tsîng kóng，"Guá si̍t-si̍t kā lín kóng，Lín nā bô kué-uāⁿ tshin-tshiūⁿ suè-kiáⁿ，tsiū buē-tit thang ji̍p thian-kok，só͘-í tio̍h khiam-sùn tshin-tshiūⁿ suè-kiáⁿ，tsiū tī thian-kok tsuè tuā. " Suè-kiáⁿ ê sim sī ǹg pê-bú，ū kan-khó͘ ê sî liâm-piⁿ tshē pē-bú，tsai ka-kī bô tì-huī，ia̍h bô la̍t uē ka-ki tsiàu-kò͘.Lán tsuè Iâ-so͘ ê ha̍k-sing tio̍h o̍h tsit hō ê khuán-sit，sim tio̍h siông-siông ǹg Tsú；tshì-liān，bê-hi̍k，guî-hiám，kan-khó͘ ê tiong-kan，tio̍h kì-tit lán ê luán-jio̍k buē ka-kī pó-hō͘，ing-kai tio̍h khiam-sùn ê sim lâi thok-tiōng Tsú.

Suè-kiáⁿ tsai pē-bú put-tsí thiàⁿ i，lán tio̍h kì-tit lán Thiⁿ-pē ê thiàⁿ lán sī bān-pē khah iâⁿ pē-bú ê thiàⁿ-thàng，só͘-í bān-hāng ê tāi-tsì lóng-tsóng tio̍h thok-tiōng Siōng-tè，koh tio̍h tuì-tiōng Siōng-tè khah tuì-tiōng bān-lâng bān-mi̍h；tshin-tshiūⁿ Si-phian kóng，"Tû lí í-guā，tī thiⁿ-nih ū sim-mi̍h thang kui-uá；tī sè-kan bô sím-mi̍h hō͘ guá thang him-bō͘. "Lâng nā kó-jiân án-mi，Siōng-tè tik-khak sing-khí tsuè tuā.

思羅安台語點字網站