《耶穌言行錄》

| | | 轉寄

Tē-60-tsiuⁿ,Lán tio̍h sià-bián lâng

作者 Ko Kim-sing. 2009.05.31

（Má-thài 18：20-35；Lō͘-ka 17：3，4）.
U7tsit8 ji̍t，Pí-tik mn̄g Iâ-so͘ kóng，"Tsú ah，hiaⁿ-tī tik-tsuē guá，guá sià-bián i，tio̍h kuí pái？Tshit pái thang mah？"Iâ-so͘ ìn kóng，"M̄-nā tshit pái，tsiū-sī tio̍h tshit-tsa̍p ê tshit pái. "

Iâ-so͘ tsiū īng tsi̍t ê phì-jū kā ha̍k-sing kóng，"Thian-kok tshin-tshiūⁿ jîn-kun kap i ê jîn-sîn sǹg-siàu，sǹg-siàu ê sî，ū lâng thua tsi̍t lâng lâi，khiàm tshing-bān niú gûn.Kì-jiân bô thang hîng，i ê tsú huan-hù tio̍h buē hit ê lâng，kap i ê bó͘-kiáⁿ，kap i só͘ ū ê lâi hîng.Hit ê jîn-sîn phak-teh pài i，kóng，"Tsú ah，tio̍h khuan-iông guá，guá tit-beh lóng hîng lí. "I ê tsú lîn-bín tsiū pàng i，sià-bián i ê tsè.Hit ê jîn-sîn tshut-khì，tú-tio̍h tâng-phuāⁿ khiàm i tsa̍p niú gûn，tsiū lia̍h i，ni̍h i ê nâ-âu，kóng，"Lí só͘ khiàm—ê，tio̍h hîng guá. "Hit ê tâng-phuāⁿ phak-teh，kiû kóng，"Tio̍h khuan-iông guá，guá tit-beh lóng hîng lí. "I m̄ in，kā i kuaiⁿ-kaⁿ，thìng-hāu i lâi hîng só͘ khiàm—ê. Saⁿ-kap tsuè jîn-sîn ê khuàⁿ-kìⁿ，tsiū tsin huân-ló，tsiong tsit ê tāi-tsì khì tuì tsú kóng-bîng.Tsú tsiū kiò i kóng，"Pháiⁿ ê jîn-sîn ah，lí só͘ khiàm—ê.kiû guá，guá tsiū m̄ kā lí thó͘；lí kiám m̄ tio̍h lîn-bín tâng-phuāⁿ，ia̍h ná guá lîn-bín lí mah？"Tuì hit-tia̍p i ê tsú siū-khì，tsiong i kau hō͘ kaⁿ ê tshe-ia̍h，thìng-hāu i hîng só͘ khiàm—ê.Lín tsìng-lâng nā bô īng sim sià-bián hiaⁿ-tī ê kè-sit，tsiū guá ê Thiⁿ-pē khuán-thāi lín ia̍h beh án-ni. "

Siōng-tè sī lán ê Tsú，lán tik-tsuē i buē sǹg-tit pái，I iáu-kú ìng-ún sià-bián；lâng tik-tsuē lán，lán kiám m̄ tio̍h huaⁿ-hí sià-bián i mah？Nā bô，kî-tó ê sî tsáiⁿ-iūⁿ uē kóng，"Sià-bián guán ê tsè， tshin-tshiūⁿ guán sià-bián lâng ê tsè？"

思羅安台語點字網站