《耶穌言行錄》

| | | 轉寄

Tē-92-tsiuⁿ,Iâ-so͘ tìng sí tī si̍p-jī-kè

作者 Ko Kim-sing. 2010.01.10

（Má-thài 27：32-44；Má-khò 15：21-32； Lō͘-ka 23：26-43；Iok-hān 19：17-24）
Iâ-so͘ pē si̍p-jī-kè tshut-khì；káⁿ sing-khu ià-sian tòng-buē-tiâu，tsiū tú-tio̍h Kó͘-lī-nāi ê lâng miâ kiò Se-bûn，tsìng-lâng bián-kióng i pē Iâ-so͘ ê si̍p-jī-kè.Tī lō͘-nih ū tsuē-tsuē hū-jîn-lâng thuè Iâ-so͘ thî-khàu kap siong-sim.Iâ-so͘ ua̍t-thâu kā in kóng，"M̄-sái thuè guá thî-khàu，nā-sī in-uī lín ka-kī kap lín ê kiáⁿ-jî tsiū thang thî-khàu. "

Kiâⁿ kàu tsi̍t só͘-tsāi miâ kiò Kok-kok-thaⁿ，tī hia tìng I tī si̍p-jī-kè.Iâ-so͘ kóng，"Pē ah，tsìng-lâng m̄-tsai só͘ tsuè，tio̍h sià-bián in. "

Ū lâng īng io̍h-tsuí beh hō͘ Iâ-so͘ lim，I m̄ lim.

Ping-ting sì lâng í-king tìng Iâ-so͘，tsiū the̍h I ê saⁿ tsuè sì-hūn pun，ta̍k ê ping pun tsi̍t hun.Lāi-bīn ê saⁿ tíng-ē sī kui niá tsit—ê.Ping tsiū liam-khau khuàⁿ tsī-tsuī tit-tio̍h.Sìng-tsheh kóng，"In pun guá guā-bīn ê saⁿ，liam-khau guá lāi-bīn ê saⁿ，"ū ìng-giām.

Pí-lia̍p-to siá tsám-tiâu tah tī si̍p-jī-kè tíng，īng Ki-lī-nî，Lô͘-má，Hi-pik-lâi ê jī lâi siá kóng，"Iû-thài lâng ê ông. "Tsè-si bô huaⁿ-hí，kiû Pí-lia̍p-to tio̍h uāⁿ jī，siá kóng，"Ka-kī tshing-ho͘ Iû-thài ông. "Pí-lia̍p to m̄，kā in kóng，"Só͘ siá í-king siá liáu. "

Hit ji̍t ia̍h tìng nn̄g ê huān-lâng，tsi̍t ê tī Iâ-so͘ ê iū-pîng，tsi̍t ê tī tsó-pîng.

Iû-si-kuaⁿ kap tsìng-lâng ki-tshì Iâ-so͘ kóng，"I kiù pa̍t lâng；nā tsuè Ki-tok，Siōng-tè só͘ kíng—ê，tio̍h kiù ka-kī. "Ping-ting ia̍h hì-lāng，phâng tshò͘ hō͘ I，kóng，"Lí nā-sī Iû-thài lâng ê ông tio̍h kiù ka-kī. "

Kap I tiàu-teh nn̄g ê huān-lâng，tsi̍t ê ki-tshì kóng，"Lí nā tsuè Ki-tok，tio̍h kiù ka-kī kap guán. "Hit ê tē-jī ê tsik-pī tē-it ê kóng，"Lí saⁿ-tâng siū tsuē，tsáiⁿ-iūⁿ m̄ kiaⁿ Siōng-tè？Lán siū tsuē sī kong-tō，in-uī só͘ siū sī ha̍p lán ê só͘ kiâⁿ；nā-sī tsit lâng ê só͘ kiâⁿ bô tsi̍t hāng m̄-tio̍h. "Tsiū kóng，"Iâ-so͘ ah，lí tit-tio̍h lí ê kok lâi ê sî，tio̍h kì-tit guá. "Iâ-so͘ kóng，"Guá si̍t-tsāi kā lí kóng，Kin-á-ji̍t lí tik-khak kap guá kàu Lo̍k-hn̂g. "

思羅安台語點字網站