《耶穌言行錄》

| | | 轉寄

Tē-94-tsiuⁿ,Bâi-tsóng Iâ-so͘

作者 Ko Kim-sing. 2010.01.24

（Má-thài 27：57-61；Má-khó 15：42-47； Lō͘-ka 23：50-54；Iok-hān 19：31-42）
Iâ-so͘ tìng si̍p-jī-kè ê ji̍t sī lán ê pài-gō͘.Iû-thài lâng ê an-hioh-ji̍t sī lán ê pài-la̍k，Jû-ua̍t-tsueh lāi ê an-hioh sǹg sī tuā An-hioh，só͘-í Iû-thài lâng put-tsí m̄-ài sin-si ji̍t kuì tī si̍p-jī-kè，tsiū kiû Pí-lia̍p-to huan-hù ping-ting khì kòng-tsi̍h tìng tī si̍p-jī-kè ê lâng ê kha-kut，hō͘ in khah kín sí，thang liâm-piⁿ pàng sin-si lo̍h-lâi.Ping-ting khì，tsiong saⁿ-kap tìng ê lâng tsi̍t-ê tsi̍t-ê kòng-tsi̍h kha-kut.Kàu Iâ-so͘，khuàⁿ-kìⁿ I í-king sí，tsiū bô kòng-tsi̍h I ê kha-kut，to̍k-to̍k īng tshiuⁿ tsha̍k I ê hing-ha̍h；huih tsuí lóng lâu tshut-lâi.Sìng-tsheh só͘ kóng，"I ê kut bô tsi̍h，"koh kóng，"Lâng beh khuàⁿ in só͘ tsha̍k ê "ū ìng-giām.Teh-beh àm，ū pù-lâng tsiū-sī A-lī-má-thài ê lâng，miâ kiò Iok-sik，tsuè tsun-kuì ê gī-sū，him-bō͘ Siōng-tè ê kok，sī Iâ-so͘ ê ha̍k-sing；tsóng-sī kiaⁿ Iû-thài lâng，siông-siông ka-kī ún-khǹg，taⁿ hó-táⁿ ji̍p-khì kìⁿ Pí-lia̍p-to，kiû Iâ-so͘ ê sin-si.Pí-lia̍p-to ún—i，suî-sî khì siu sin-si.Koh ū Nî-ko-tí-bó͘，bat mî-sî tsiū-kūn Iâ-so͘ ê lâng，tuà bu̍t-io̍h kiau lô͘-kuè iok-liōng ū tsi̍t-pah kun lâi.Tsi2nng7 lâng tsiong Iâ-so͘ ê sin-si īng iù-pò͘ tsham hiuⁿ-liāu lâi pau，hē tī tsio̍h tsha̍k ê bōng，kō tuē tè tsio̍h that bōng-mn̂g，tsiū khì.Hit ê bōng sī Iok-sak ê.Sìng-tsheh ū kì-tsài kóng，"Iâ-so͘ sí liáu kap pù-lâng saⁿ-kap bâi-tsòng，"án-ni ū ìng-giām.

Tsìng tsè-si-tiúⁿ，Huat-lī-sài lâng tsū-tsi̍p kìⁿ Pí-lia̍p-to kóng，"Guán kì-tit hit ê phiàn-lâng—ê ua̍h ê sî bat kóng，"Saⁿ ji̍t āu guá koh-ua̍h，"só͘-í lâi tshiáⁿ lí huan-hù tio̍h saⁿ ji̍t kò͘-siú hit ê bōng；kiaⁿ-liáu I ê ha̍k-sing mî-sî thau I，kóng I tuì sí koh-ua̍h. "Pí-lia̍p-to kóng，"Hō͘ lín pé-siú ê ping，tsuè lín khì tsīn sim kian-kò͘ siú. "Suî-sî khì kò͘-siú hit ê bōng，hong-tsio̍h siat-ping.

Tuì Ka-lī-lī kap Iâ-so͘ saⁿ-kap lâi ê hū-jîn-lâng kuí-nā ê khuàⁿ hit ê bōng，suà khuàⁿ sī tsáiⁿ-iūⁿ tsóng hit ê sin-si；tò-tńg khì pī-pān hiuⁿ-liāu kap hiuⁿ-iû；an-hioh-ji̍t tsiàu kài-lu̍t lâi hioh.

思羅安台語點字網站