《耶穌言行錄》

| | | 轉寄

Tē-95-tsiuⁿ,Iâ-so͘ koh-ua̍h hō͘ hū-jîn-lâng khuàⁿ

作者 Ko Kim-sing. 2010.01.31

（Má-thài 28：1-9； Má-khó 16：1-11；Lō͘-ka 24：1-12）
Iū-thài lâng ê an-hioh-ji̍t liáu-āu，tshit ji̍t ê thâu-tsi̍t ji̍t，tsiū-sī lán hiān-tsāi ê an-hioh-ji̍t，phah-phú-kng ê sî，hiah ê hū-jîn-lâng tuà só͘ pī-pān ê hiuⁿ-liāu kàu bōng.Tī ō͘-nih saⁿ-kap kóng，"Tsī-tsiū-á uē thuè lán suá-khui bōng-mn̂g ê tsio̍h？"In-uī hit tè tsio̍h tsám-jiân tuā.Hn̄g-hn̄g teh khuàⁿ-kìⁿ，khuàⁿ-kìⁿ tsio̍h í-king suá.Ji̍p- bōng khuàⁿ-kìⁿ tsi̍t ê siàu-liân lâng tsē tī tsiàⁿ-tshiú pîng，tshīng pe̍h-saⁿ，hū-jîn-lâng tsin kî-kuài.Siàu-liân lâng kóng，"Bo̍h-tit kî-kuài；lín kiám m̄-sī tshē tìng si̍p-jī-kè Ná-sat-li̍k ê lâng Iâ-so͘？I í-king koh-ua̍h，bô tī tsia lah，thang lâi khuàⁿ bâi-tsòng ê só͘-tsāi.Tio̍h khì kā I ê ha̍k-sing kap Pí-tik kóng. "Khì pò ê lâng ê tiong-kan，tsi̍t ê tsiū-sī Bua̍t-tāi-lia̍p ê Má-lī-a.

Pí- tik kap Iok-hān thiaⁿ-kìⁿ tsi̍t ê siau-sit，tsiū tsáu khì bōng—nih.Iok-hān tāi-sing kàu，àⁿ-teh khuàⁿ，khuàⁿ iù-pò͘ tī-teh.Pí-tik lō͘-bé kàu，ji̍p-khì bōng-ni̍h khuàⁿ-kìⁿ iù-pò͘ tī-teh.Ū pau thâu-khak ê kun bô kap iù-pò͘ tī-teh，sī līng-guā tha̍h tsi̍t uī.Hit-sî ha̍k-sing tò-khì.Má-lī-a khiā tī bōng-guā thî-khàu.Thî-khàu ê sî，àⁿ-teh khuàⁿ bōng-lāi，khuàⁿ-kìⁿ nn̄g ê thiⁿ-sài tshīng pe̍h-saⁿ tsē tī Iâ-so͘ bâi-tsòng ê só͘-tsāi，tsi̍t ê tī thâu-khak，tsi̍t ê tī kha-nih.Thiⁿ-sài kóng，"Siáⁿ-sū thî-khàu？"Má-lī-a kóng，"Lâng the̍h guá ê Tsú ê sin-si，m̄-tsai hē tī tá-lo̍h？"Kóng-liáu ua̍t-thâu khuàⁿ-kìⁿ Iâ-so͘ teh-khiā，m̄-tsai sī Iâ-so͘.Iâ-so͘ mn̄g i kóng，"Siáⁿ-sū thî-khàu？Lí tshē tsī-tsuī？"Má-lī-a phah-sǹg sī kò͘-hn̂g ê lâng，tsiū kā I kóng，"Nā-sī lí kng lok tī tá-lo̍h，kiû lí kā guá kóng，guá beh khì siu. "Iâ-so͘ kóng，"Má-lī-a. "Má-lī-a ua̍t-thâu kóng，"Lia̍p-pho-nî，"（Ì-sù tsiū-sī sian-siⁿ）.Iâ-so͘ kóng，"Tio̍h khì kā guá ê hiaⁿ-tī kóng，guá tsiūⁿ thiⁿ kìⁿ guá ê Pē，tsiū-sī lín ê Pē，guá ê Siōng-tè，tsiū-sī lín ê Siōng-tè. "Má-lī-a tsiong khuàⁿ-kìⁿ Iâ-so͘，pìng kap Iâ-so͘ kóng-uē，khì kā ha̍k-sing kóng.

Āu-lâi Iâ-so͘ tú-tio̍h hiah ê hū-jîn-lâng，tī lō͘-nih ia̍h kā in kóng，"Guán lín pîng-an. "Hū-jîn-lâng tsìn-tsîng phō I ê kha，pài I.Iâ-so͘ kóng，"Bo̍h-tit kiaⁿ，tsuè lín khì pò guá ê hiaⁿ-tī tsai thang khì Ka-lī-lī，tī hia uē kìⁿ-tio̍h Guá. "

Hū-jîn-lâng tò-khì ê sî，pé-siú bōng ê ping ji̍p siâⁿ tsiong tsiah ê tāi-tsì pò tsè-si-tiúⁿ tsai.In kap tiúⁿ-lo saⁿ-kap gī-lūn，īng tsuē-tsuē gûn hō͘ ping，kóng，"Lín tio̍h kóng，"Guán teh khùn ê sî，I ê ha̍k-sing mî-sî lâi thau I khì. "Siat-sú tsóng-tok thiaⁿ-kìⁿ，guán tsiū khǹg i hō͘ lín bô sū. "Ping-ting niá gûn，tsiàu in só͘ huan-hù lâi kiâⁿ.

思羅安台語點字網站