《草地囝仔做牧師》

| | | 轉寄

疼ê原則

箴言2十七章5節;哥林多前書十三章4~7節

一般ê人tī人生舞台頂,雖然無一定ē-tàng扮演主角,但是lóng有一個共同ê特點,to̍h是beh án怎建立屬於家己ê家庭ê完美kap理想,因此一般ê人lóng會盡siōng大ê 力量追求家庭生活ê充實tsiah享受幸福ê家庭生活,相信這是一般ê人想beh確立ê人生條件。

成做tsit-ê事實ê to̍h是人間ê疼,因此厝內ê人互相ê愛ê表現ē-tàng看出人生phah拼ê結果,這to̍h是保羅tī哥林多前書十三章所強調--ê:「比如taⁿ時常有ê有信、有望、有愛,這三項其中siōng大ê是愛」,確實tī咱ê人生中,四界lóng ē-tàng體會tio̍h tsit種仁愛對人生ê關係kap影響是guā喏仔深刻,若是tī人間hiah-ê不幸悲哀kap敗亡ê tāi-tsì,通常lóng是欠缺愛,mā to̍h是講欠缺愛tiāⁿ-tiāⁿ會造成負面ê人生狀況。

人ê一生中,家是siōng ē-tàng顯明愛ê實質內容。愛是tuì人心肝內所產生ê自然行為,m̄是外在條件所成立--ê,若將愛ê關係限定tī用外在條件為主ê時,tiāⁿ-tiāⁿ會有不良ê後果,「美國式ê離婚」Tsit部電影,說明一對青年tī文明社會中結婚了後,恩愛幸福,因為in用愛做婚姻ê基礎,共同奮鬥,經過十七年in有一個健康ê家庭,生活美滿koh舒適,翁婿mā做一間公司ê總經理,但是tsit時太太suah感覺悶悶不樂,不明原因,請教婚姻專家mā無結果,最後用離婚收suah,翁婿為tio̍h贍養費,生活真艱苦,太太mā無因此感覺快活,反倒tńg增加心裡ê壓力kap負擔,雙方了後雖然有異性朋友,但是暗中lóng一直懷念對方,tī一個偶然ê機會相tú,舊情復燃tsiah koh再結合,雖然iáu-kú有冤家kap問題,但是終其尾是因為愛對方tsiah願意共同生活。伊teh kā世人講,愛情固然是家庭ê基礎,但是久長ê翁仔某生活,除了愛情之外應該iáu有其他ê裝飾品……比如了解、體貼對方、溫柔ê性格kap互相尊重等等。若用建築做例,只有外殼ê基石堅固,無一定hō͘人有好看ê感覺,tī穩固ê地基kap外殼以外,ài hō͘人感覺tio̍h美觀ê家庭,tī厝內必須ài有相當ê室內佈置,mā to̍h是裝潢ê工夫,但是有ê時咱mā會看tio̍h店面非常美麗,但是若將裝潢拆開,是非常害ê建築。

由tsit-ê比喻,咱ē-tàng體會翁仔bó͘生活ê根本條件是用愛做根基,但是若欠缺翁仔bó͘生活中所必須具備ê裝飾品ê時,tiāⁿ-tiāⁿ會發生問題,為何tī真tsē恩愛ê翁仔bó͘中iáu有真tsē人離婚?

Tsiah-ê離婚ê人,in結合ê時是m̄是無意愛?為何會án-ne neh?是因為愛情以外koh需要一kuá重要ê裝飾品來kā伊美化,hō͘婚姻ē-tàng koh-khah完美kap理想,án-ne tsiah ē-tàng平衡,hō͘伊ē-tàng永遠保持。

美國有一位心理學者講:婚姻好親像汽車ê四ê輪仔。必須ài有真正 常平衡ê運轉tsiah安全,比如失去平衡就會發生真驚人ê問題,比如車禍、傷害等等。相信tsit種關係m̄是tī翁仔某關係上,甚至tī人生ê一切狀況lóng是tsit種--ê。

今á日咱用疼ê原則來思考tsit-ê對人人lóng有深切關係ê人生問題。

一、 關懷是疼ê真諦
人若用幸福為題ê時,往往會想著愛ê問題。但是咱知影愛是抽象--ê,若無加共伊具體化,愛就buē-sái顯明tī人間,因此有人認為愛ê具體to̍h是先建立tī人關懷ê性格上。

確實,咱愛某某人,咱會表現出關懷ê情誼,tsit種感情,咱ē-tàng tuì實際ê生活中體會tio̍h。因為關懷是表示對對方感情ê流露。Ná親像父母對kiáⁿ兒ê態度,咱ē-tàng完全體會。或者年老ê父母kap kiáⁿ兒ê問題,m̄是只有生活條件ê滿足,mā是tī關懷父母ê存在,tsit種真實ê關懷,tsiah ē-tàng叫做有孝。通常tī愛ê境況中,人性ê態度往往是用佔有為主。咱buē-sái否認,愛有佔有ê成分,(過分ê佔有是自私,顛倒是傷害tio̍h愛ê本質),但是完美ê愛,m̄是只有佔有而已,伊同時mā是奉獻。Tī人生現象中,確實有tsit種為所愛ê人願意付出一切ê愛ê行為。因為tī真實ê愛內面,所想著ê只是對方ê一切ê生活。關懷所愛ê人,to̍h是愛ê真實內容。

關愛本身是表示咱對愛ê對象發出愛心ê行動,藉著tse,會hō͘咱所愛ê人有安全幸福ê感受,這to̍h是人生有價值ê生存內容。Hō͘人有安全kap幸福,tsit種是上帝所希求ê人生,伊是tī愛ê世界內tsiah ē-tàng成立--ê。

二、 人性ê基本需求--欣賞
愛ê偉大是uì內心本能ê意願,無負擔或者勉強,是uì心內所發出ê真誠心態。Tsit種愛ê形式時常tī人生生活中表現出一種欣賞ê性格。確實tī人性中,hō͘人欣賞是有相當正面ê啟發作用。咱若用人uì細漢e5gin2-á時期到老人ê世界來看,hiah-ê人lóng愛hông欣賞,父母若ē-tàng用欣賞ê態度去處理孩童ê tāi-tsì,對塑造孩童ê人格形成一定有正面ê作用,因此tī現代心理學中,儘量hō͘人去欣賞--人,適當ê欣賞確實是一件有意義ê tāi-tsì,因為tī-tsia,人基本需要ê愛會帶來適中ê滿足感,心中有滿足是人格形成中一件重要ê事。欣賞是表現愛ê方法之一。咱lóng知影愛是人生生活ê根本基礎,但是伊必須經過真tsē人生ê生活形式來kā伊表現出--來,若無伊只是一種抽象ê事實,對人生無什麼作用。

欣賞ê人生,就是beh將tsit種抽象ê愛,kā伊生活化kap具體化ê 一種積極ê作為,有學者用花草kap水份來比喻疼愛kap欣賞ê情形,美麗ê花草,若無水ê潤澤ê時,to̍h會lian去。

而且,愛若無用適當ê方法kā伊表現出--來ê時,往往無法度發揮伊無比偉大ê力量,但是必須ài tī適當ê狀況上表現,bē-tàng過分。

欣賞雖然是非常平常ê tāi-tsì,但是確實ē-tàng有非常大ê效果。有ê時對gín-á 一句關鍵性ê話kā伊表示你ê欣賞,有可能決定gín-á未來成功ê動力,tī人kap人ê間ê 一句欣賞ê話,有ê時會表現出真tsē人生ê快樂、溫暖kap幸福。Bat有一位青年講--著父母bē曉欣賞伊,考試成績好ê時,就講:無實力,死讀冊是無路用--ê,無讀冊ê時就講伊pîn-tuāⁿ,the讀冊ê時就講伊是teh讀hō͘父母看--ê。伊講:我無論án怎做lóng得bē-tio̍h欣賞,這是一位跤步踏差ê青年ê心聲。
Tī-tsia,咱ē-tàng明白tī人生現象中,人所追求kap phah拼ê美好ê人生,是teh愛ê表現kap會曉欣賞ê世界。若ē-tàng用欣賞ê人生做愛ê原則而且多多發揮ê時,咱ê人生必定有完美ê成果。

三、 時常被疏忽ê禮貌kap尊重
人生ê愛,大部分是發生teh出世互相認bat ê人之間,但是teh熟識ê狀況中,人真簡單會疏忽tsit種tī人生生活中互相關係上另外一種非常重要ê禮貌kap尊重ê態度。阮tiāⁿ-tiāⁿ會想講是熟識ê人,to̍h m̄免行tsiah-ê禮數,這是咱tī生活上ê時常犯ê毛病kap缺點。

俗語講:厚禮人buē怪,著是講多多表示禮貌,tsiah buē疏忽suah hō͘人責怪,因為咱知影,tī人生社會中,禮貌是重要ê因素,伊ē-tàng hō͘社會和諧、安詳,咱看tio̍h台灣社會ê混亂,探討了伊ê原因著是人kap人之間欠缺tsit種維持社會ê安祥kap禮貌ê態度所造成。以交通ê情形來看,ta̍k位駕駛人若ē-tàng用禮互相對待,台灣ê交通一定buē tsiah-ni̍h亂,因為欠缺禮貌互相讓步tsiah造成塞車。無禮貌是無敬重對方,有自私ê心理,充滿主觀kap驕傲,人若有tsit種心態ê時,人生社會自然就會混亂,這to̍h是目前台灣社會ê亂源。

因為各人lóng用搶第一為主,驚hō͘人先得tio̍h,tsit種心態充分表露出人性ê自私kap驕傲ê特質,有tsit種人格ê人,tī社會中,無可能有完美kap理想ê人生狀況。關於禮,孔子公講:「M̄知禮無thang徛起。」伊mā提出人生中所有ê美德,若無禮ê配合會變做弊病「恭而無禮則勞,慎而無禮則葸,勇而無禮則亂,直而無禮則絞」,恭、慎、勇、直lóng是人生ê美德,若無禮ê配合to̍h變做勞(徒然勞苦)、葸(驚惶)、亂、絞ê弊病。

人生生活所追求--ê是完美kap理想ê美德,這是形成tī禮貌ê世界,因為伊mā包含tio̍h尊重人ê事實,所以禮貌kap尊重ná親像共同體,主耶穌講:「所以lín願意人án怎對待lín,lín mā ài怎樣對待人,因為這to̍h是律法kap先知ê道理」(馬太福音七章12節)。伊完全講出人生ê主題,主耶穌講tsit種心態是人生ê全部內容,每一個人若ē-tàng照tsit-ê原則經營人生,tsit種人間社會,就比如天國,這是人所希求,伊是建立tī人間充滿tio̍h禮貌以及互相尊重ê基礎上,mā to̍h是孔子公所講--ê克己復禮。

Tī咱ê社會中,時常用相敬如賓來祝賀新婚ê夫妻,to̍h是要求tsit種真熟識親密關係比如翁仔bó͘,生活mā必須用禮貌kap尊重來互相對待,tī-tsiah一定ē-tàng體會tio̍h人生ê喜樂kap幸福!

四、 愛ê siōng kuân表現--真誠kap容忍
一對翁仔bó͘時常因為日常tāi-tsì來冤家,自覺若是án-ne落去傷害家庭siuⁿ-tuā,有一工二人同齊去請教專家,最後專家kā in講:翁仔bó͘若無真誠對待,任何人lóng無法度幫忙解決問題。

相信咱ē-tàng體會tī人生生活中,真誠ê重要性,伊ê另外一面是欺瞞,瞞騙tī人間社會中,是真普遍--ê,尤其kap家己有利害關係ê時,人lóng會用tse來維護家己ê權益,像1994年台灣省議會議長ê選舉,差不多大多數人相信有賄選,一票uì五十萬到一千萬,但是當檢察官kā in叫去詢問ê時無一個人承認,lóng用瞞騙ê心態去應付伊。

咱知影瞞騙是真惡質ê品行,但是現代人lóng真普遍運用tī伊ê人生中,tsiah形成了社會亂象,失去真誠,處處表現出tsit種互相欺瞞ê狀況,uì政治環境講到sing-lí上ê來往,或者是社會中人kap人ê關係lóng用欺瞞互相對待,這to̍h是造成咱ê社會失去真誠ê原因,台灣支票ê退票率是世界冠軍表示台灣人ê 無老實。

基督徒ài明白,真誠是kap上帝建立關係ê唯一事實,因為咱ê主本身to̍h是慈愛kap誠實ê主,tī聖經中tiāⁿ-tiāⁿ用耶和華是誠心、老實來對人(撒母耳記下二章6節,十五章20節;詩篇二十五章10節)上帝所喜樂ê to̍h是內心老實人(詩篇五十一章6節),主耶穌本身mā教咱「上帝是一個靈,所以敬拜伊--ê,必須用心靈kap誠實去拜伊」(約翰福音四章)。

初代教會ê復興,原因之一to̍h是基督徒將in ê信仰kap生活建立tī誠實ê基礎上:「In ta̍k工同心合意,恆切ê tī殿內底,koh tī厝內擘餅,存tio̍h歡喜誠實ê心用飯。」(使徒行傳二章46節),使徒約翰mā kā咱講:「咱相愛,mài kan-nā tī言語kap喙舌頂,mā ài tī行為kap誠實上」(約翰一書三章18節)。

無論kap上帝ê關係或者人本身ê生活,lóng必須用真誠替主,tsiah ē-tàng真正屬於上帝,上帝是愛、是信實ê,屬於祂ê人,mā to̍h是疼kap信實ê存在,tsit種存在ê表現就是beh生活tī誠實ê世界,無欺瞞ê行為,tse是箴言所強調--ê:「當面ê責備強kan-nā背後ê愛情」,這是teh說明愛siōng需要ê是真誠,無論是對或者m̄-tio̍h lóng ē-tàng用真誠對待伊,(詩篇一四一篇5節)「我甘願接受義人愛心ê責phah,suah無願意惡質ê人尊敬我」(現代譯本)。當teh說明愛ê真誠,伊kap欺瞞ê心態是絕對無仝ê。

真誠是上帝ê屬性,屬於上帝ê基督徒mā應該有tsit-ê屬性,用真誠ê心態去經營人生,但是án-ne iáu無夠,因為tī人生確實有真tsē複雜ê狀況,必須ài有容忍ê心去面對,因為若buē-sái養成容忍ê個性ê時,生活必定tiāⁿ-tiāⁿ出現問題。Tī保羅所強調ê愛,容忍mā是重要因素,「愛是恆久忍耐,koh有恩慈,無怨妒……buē求家己ê好處,buē計算人家ê惡,愛是凡事ǹg望,凡事忍耐……」(哥林多前書十三章4~7節),因為tī人生中,容忍ê事實kap人生生活ê成敗有關鍵性ê關係,tī-tsia,咱看保羅teh講疼ê性質ê時,特別加強愛是恆久忍耐,凡事包容,凡事忍耐。

結論:咱ài會記,愛必須uì信心去完成伊,共同ê成長會hō͘愛koh-khah完美。改善你ê個性、價值觀kap思想,用khah積極ê心態去適應你ê人生環境,一定ē-tàng收成人生理想ê目標kap結果。切記!停頓不進會將愛teh死!人生就會烏暗無希望。