《草地囝仔做牧師》

| | | 轉寄

靈命ê繼續kap成長

約翰一書一章5~10節

咱bat講過beh保tiâu「永生之道」,需要kap性命源頭ê主不斷來接觸,mā只有建立tī án-ne ê關係ê時,靈命tsiah會發揮伊ê無限ê價值。

主耶穌不斷要求屬祂ê基督徒必須ài kap祂有人格ê結合,siōng具代表--ê thang tuì約翰福音十五章主是真葡萄樹ê比喻了解。因為離棄了性命根源——主耶穌,會成做乾枯ê性命,成做hō͘人棄嫌、放sak ê kap hō͘人踏ê廢物。

咱kap主耶穌ê交往,to̍h是基督徒信仰生活中bē-tàng欠缺ê屬靈過程,必須經由基督徒kap人ê關係來見証基督徒kap主耶穌ê實際關係。

基督徒屬靈性命重要ê存在,to̍h是見證主耶穌,tī人ê社會中,將「永生之道」紹介tī現實ê社會中。當然現實ê人,in看bē-tio̍h性命之道ê主耶穌,in所ē-tàng看tio̍h--ê,只是基督徒而已。而且人ê性格是偏重tī現實ê狀況,一般人ê興趣,tī in所看會tio̍h ê世界,這to̍h是咱時常teh強調ê,基督徒是主耶穌ê見證人,咱ài hông看出主耶穌ê存在,就是ài hō͘主耶穌成做基督徒身上ê生活者。若想tio̍h tse,咱就必須用siōng謹慎ê心情來經營咱ê信仰生活。既然咱teh代表主耶穌,咱ê一舉一動lóng tio̍h活出有主耶穌價值ê內容。

雖然咱ê信仰是因信稱義,但是咱必須了解,咱ê生活是信仰ê siōng好解釋,這to̍h是約翰所講:「Buē-sái疼ē-tàng看見ê兄弟,若ē-tàng疼看buē-tio̍h ê上帝」。所以自稱是基督徒ê人,teh生活上ê表現,若是不法、惡質,kap人ê關係真惡劣ê時,相信伊ê基督教信仰,就buē受肯定kap認同,tī tsit種基督徒ê現實中,福音ê宣揚必定真困難。因為基督徒buē-sái得tio̍h人緣,就buē-sái吸引人,mā會hō͘人看輕,基督徒tī現實ê生活環境中,若無法度受人肯定,伊ê信仰生活就buē真理想,原因tī伊buē-tàng用生活來解釋信仰。咱tuì人類siōng早ê獻祭,「亞伯kap該隱」tsit-ê事實來說明人類ê悲哀以及信仰kap生活ê問題。

為何上帝只接納亞伯suah無接納該隱所獻ê祭物?因此來致使兄弟之間ê不幸。Mā可能有贖罪ê問題,但是siōng主要ê,to̍h是上帝向該隱所講e5hit句話:「你若行了好,kiám buē蒙悅納?你若行了無好,罪就phah tī門前」(創世記四章7節)。Tuì上帝所講ê咱thang了解一件事實,to̍h是獻祭kap生活是一致ê關係,無好生活配合ê獻祭,m̄是上帝所歡喜,祂所歡喜ê祭,是信仰者ê信仰kap生活一致,主耶穌tī馬太福音五章23、24節所講:「你tī祭壇上獻禮物ê時tsūn,若想起兄弟向你懷怨,就kā禮物留tī壇前,先去kap兄弟和好」。Mā to̍h是kap人ê關係iáu未解決好勢ê時,必須先kā祭物khǹg好,先去處理好kap人ê問題了後,你ê祭禮tsiah會hông悅納,mā to̍h是講,你必須先處理好人ê關係,然後tsiah去獻祭hō͘上帝,這是基督教信仰ê內容。

Tī-tsia主耶穌向咱提起禮拜ê先決條件,to̍h是先調整kap人有良好ê內容,koh再進一步入來kap上帝ê關係。因為上帝所歡喜ê禮拜,是建立teh用人間ê和樂做基礎。假使tsiah-ê向祂敬拜ê人kap別人ê關係真慘,試想上帝kám會歡喜?

用父母kap kiáⁿ兒ê關係來講,父母心目中可取ê kiáⁿ兒,必定是tī社會上、khang-khè上kap別人有良好ê表現,主耶穌tī馬太福音六章14~15節:「Lín饒赦人ê錯誤,lín ê天父mā一定會饒赦lín ê錯誤,lín buē-tàng饒赦別人ê錯誤,lín ê天父mā一定buē饒赦lín ê錯誤。」tuì tsia ē-tàng完全了解,主耶穌所教示ê信仰kap禮拜,以及信仰kap疼,tsit種倫理ê原則,是基督徒tī上帝面前「因信稱義」ê真理,是buē-sái分割--ê。因為基督徒白白領受上帝所賜豐盛恩典,同時必須ē記,上帝要求伊ê子民有純潔、善良ê心態,去對待伊生活kho͘-á中ê同胞,tī tsit-ê情形中,基督徒tsiah會真正發揮上帝ê恩典tī伊ê身上ê偉大ê效用。

教會ê存在mā是為tio̍h tse,伊ê關鍵tī信徒ê靈命,tī tsit-ê情況之下,基督徒屬靈ê性命,tsiah ē-tàng維持,tsiah ē-tàng成長,自然就有結實ê內容,但是ài如何達成?

一、 體驗赦罪ê事實
上帝賜hō͘人ê性命,是祂親身賜予是有屬上帝ê完全性,tī創世記講:「人被造有上帝ê形像」,tsit-ê形像,是形成人ê價值kap偉大內容ê事實,人ê所以tī被造物中佔有真寶貴位ê主因,to̍h是tī人有上帝ê形像,mā to̍h是中國人所講「萬物之靈長」ê事實,因此tī被造物ê過程中,人是寶貴、有價值ê存在者,上帝koh將管理ê責任,交託hō͘人類,當然上帝mā要求人kap祂有靈ê交往,這是人ê權利kap義務,但是tsit種偉大ê價值,suah因為人ê自私kap叛逆犯罪hō͘上帝所棄絕!人類ê性命mā失落,靈性性命,雖然有上帝ê形像,suah hō͘罪惡所掩蓋,是無法度發揮靈性性命有價值ê內容。基督徒必定ē-tàng了解,一個iáu未受贖ê性命是何等ê悲哀,保羅tī羅馬書第三章to̍h是以弗所書第二章11節以下to̍h講tio̍h iáu未接受福音ê人性悲慘ê情形,或者咱mā ē-tàng tuì舊約中詩人講tio̍h hō͘上帝棄絕ê心靈,是何等空虛來了解,因此tsit種本來有上帝形像ê性命,因為罪來完全墮落,tsit種墮落ê性命,必須ài經由上帝完全ê赦免,tsiah ē-tàng回復上帝本來ê形像kap尊貴ê性命。因此,每一個人若beh把握tsit種屬靈ê性命(mā to̍h是上帝hō͘人類真正有上帝形像ê性命),伊必須ài經由耶穌基督ê救贖,tsit種恩典ê事實tsiah ē-tàng得tio̍h屬靈ê新性命。除了tse以外,無別條路。約翰福音第三章,耶穌kap尼哥底母講重生,尼哥底母是一位偉大人格者,無論tuì人格或者信仰方面,lóng是siōng完美ê人物,但是主耶穌suah慎重kā伊講,必須ài悔改重生,tsiah ē-tàng進入上帝ê國。咱若koh看保羅ê信仰告白,伊bat講:照律法ê義是無thang指責ê,是一位標準ê人格者,但是伊suah講:tī眾人中,伊是罪魁(siōng pháiⁿ ê人),tsiah-ê事實lóng teh kā咱講一件事實,to̍h是虧欠上帝榮耀ê人類,無法度自救!任何偉大ê道德kap修為,lóng無法彌補人tī上帝ê恩典來成做新ê存在者。

因此靈命繼續ê先決條件,是tī人必須ài體驗tio̍h上帝豐盛赦罪ê恩典,信仰ê生活就是ài無時無刻過認罪生活。

二、 行tī光明中(靈命ê根據)
一個犯罪ê性命必須經由上帝ê恩典,藉主耶穌救贖ê行為,來重新得tio̍h上帝所賜ê靈命,但是tsit-ê靈命必須ài有繼續ê成長,tsiah ē-tàng發揮靈命內在ê價值。

Tī-tsia,咱必須注意一件事實,to̍h是靈命ê繼續kap成長,因為伊是性命ê本質!這是咱所深知--ê。一個性命ê誕生,是一件喜樂ê tāi-tsì,tī台灣社會,過去有真tsē人,因為新性命來臨tsiah用演戲、請人客ê一kuá方式來慶祝。M̄-koh tsit-ê性命若buē成長,就會成做眾人ê一種負擔,會hō͘眾人tuì喜樂變做憂愁kap悲哀!相信tī咱日常生活現實中,lóng thang體驗tio̍h tsia種情形。一個buē-sái成長ê性命,以及有生長suah無內容ê人,伊ê存在對人類社會將無正面作用,顛倒危害人類!Hiah-ê歹徒,雖然mā一表人才,但是伊ê行為suah是不法kap惡毒,tsit種性命就是無價值ê性命。

基督徒屬靈性命ê原理mā是án-ne,靈命beh繼續,同時mā tio̍h成長。Tī咱現今ê教會生活中,有真tsē基督徒ê靈命,無法度繼續,甚至tī半途就失落了屬靈ê活命。Tsiah-ê基督徒to̍h是tī平常ê屬靈生活中,無吸取靈命所需要ê養分,tuì此thang知,靈命確實需要靈糧來維持。基督徒靈性若營養不良,是一件驚人ê tāi-tsì,伊無抵抗力來對付外來入侵ê攻擊者,真tsē人ê所以喪失性命,to̍h是tī in ê性命中,欠缺tsit種抵抗力所組成。因此咱知影,脆弱ê靈命,是基督徒ê致命傷,破病kap衰弱,對性命是一種威脅,是真驚人ê事實。但是約翰tī-tsia kā咱講,beh克服靈命脆弱siōng基本ê辦法,to̍h是行tī光明中,因為性命ê源頭ê上帝是光,因此一個屬上帝ê人,若行tī烏暗中,就無符合伊ê身分,約翰一書第一章5~6節「上帝是光,祂完全無烏暗,所以若咱講咱kap祂有團契,suah iáu生活tī烏暗中,咱to̍h是講白賊,無行真理。」kap上帝交往ê先決條件,to̍h是行tī光明中。

因為kan-ta講是真實,真實是上帝,tsit種行tī光明中ê情形,to̍h是分別基督徒ê真偽性格。基督徒是屬上帝ê人,因此伊ê行為,必須ài有屬上帝ê真實性,亦to̍h是光明ê實在。一個人若肯行tī光明中,表示伊確實需要光明,mā深知人間ê烏暗面,mā只有主耶穌ê光,tsiah ē-tàng帶hō͘生活tī烏暗中ê人,有光明ê生活。這to̍h是屬靈眼光ê phah開,ē-tàng看出家己真正ê需要,koh靠上帝ê恩典kap能力,去實行光明中ê生活,mā to̍h是咱時常提起,「了解家己ê罪狀」。

Tī路加福音十八章法利賽人kap稅吏祈禱ê比喻,咱thang完全了解,一個罪人tī上帝面前ê情況!

罪人需要真光hō͘ in照射,tsiah ē-tàng辨別符合上帝旨意ê人間ê行為,伊ê主因tī上帝ê kan-ta講是辨別人間所有事物ê基準。人若有tsit種辨別事物ê準繩,生活就會符合主ê要求。這mā to̍h是約翰極力ài咱行tī光明中ê原由。行tī光明中,一方面是人kap上帝之間ê交往,另guā一方面是人kap人生活內底有光明ê表現。當一個人,ē-tàng行tī光明中kap上帝交往,koh ē-tàng tī人間建立光明ê狀況ê時,tsit種人生應該是上帝所要求ê人生。

三、 生存tī疼中:(靈命ê現實)
咱講tio̍h靈命ê根據,是人必須行tī光明中,mā知影「上帝是光,tī祂完全無烏暗」。因此,祂無願意屬祂ê人,行tī烏暗中,這是m̄免懷疑ê,mā是基督徒所應該ài有ê天性。但是基督徒(靈命ê持有人)ài確實了解,伊ê屬靈生活ê場所是人ê社會,雖然tsit-ê社會充滿tio̍h不幸、悲哀kap惡毒,但是基督徒buē-sái脫離tsit種現實。咱做光做鹽ê所在,是tsit-ê現實ê社會。但是社會環境是án怎?咱大家lóng真清楚。Tī-tsia現實中,基督徒beh如何發揮伊ê靈命ê內涵tī人間社會中,這是一個嚴肅ê課題。當然to̍h是hiah-ê人siōng ē-tàng接受ê疼ê行為。因為疼是上帝ê本質,伊mā是形成基督徒ê要件,基督徒是hông認為是siōng認bat上帝ê人,事實mā是án-ne,但是咱必須記tiâu約翰所講ê一句話,認bat上帝ê認定標準安在?受洗、讀經、祈禱、參加禮拜、事奉教會?Tsiah-ê約翰lóng無認定,伊所認定ê,to̍h是「疼」。因為伊講「無疼,就m̄-bat上帝」。所以認bat上帝確實ê根據,是tī hia-ê人身上是m̄是tshuē ē tio̍h疼,同時tsit種疼,ài生活化,實踐tī行為上,m̄是只有嘴講--講或者觀念;是實實在在將疼ê行為表現tī生活中,選美活動主題曲「美是心中有疼」實在無夠,聖經中所強調基督徒ê疼,應該是有行動ê疼,亦to̍h是tuì疼ê實際行動(比如疼所ē-tàng看tio̍h ê兄弟姊妹)來證明咱疼上帝ê生活(tsiah ē-tàng疼所buē-sái看tio̍h ê上帝),這是基督教信仰ê內容,上帝ài咱tsiah-ê體驗tio̍h祂ê疼ê人,ē-tàng將tsit-ê疼反應tī人間。

英國詩人但尼生(1809~1892)講:「拒絕愛ê人,會hō͘愛所拒絕」kap聖經真理相符合。接受上帝ê疼ê人,必須將tsit-ê愛kap人分享。德國學者歌德(1749~1832,世界三大詩人之一)講:「天有星,地有花,人有愛」基督徒必須了解,咱ê靈命ê繼續kap成長,是確立tī信徒疼ê生活中。因為上帝是疼,所以屬祂ê信徒,必須ài生存tī疼中。Mā因為上帝ê國伊ê本質to̍h是疼,伊是tuì疼來成立ê。

上帝國ê信仰是基督徒siōng大ê希望kap安慰,伊是建立tī人類ê被疼ê基礎上。

綜觀前述,基督徒靈命ê繼續kap成長,是基督徒生活中所buē-sái疏忽ê事實,咱必須用嚴謹ê心態,去體驗赦罪ê恩典;然後行tī光明中,活tī疼ê世界。因為in kap靈命有深切ê關係。