《台語kah魔術》

| | || 轉寄

1010國慶日

國慶日(台語文) Kok-khèng-ji̍t

十月初十是國慶 Tsa̍p-gue̍h tshe-tsa̍p sī kok-khèng
中國武昌起革命 Tiong-kok Bú-tshiong khí kik-bēng
推翻腐敗的滿清 Thui-huan hú-pāi ê Boán-tshing
台灣人民咧慶生 Tâi-oân jîn-bîn teh khèng-sing

會場外圍無平靜 Hōe-tiûⁿ gōa-ûi bô pêng-tsēng
愛國份子起神經 Ài-kok hūn-tsú khí sîn-king
吵吵鬧鬧真僥倖 Tshá-tshá-nāu-nāu tsin hiau-hēng
這種戲齣不如停 Tsit-tsióng hì-tshut put-jû thêng

十月初十唱國歌 Tsa̍p-gue̍h tshe-tsa̍p tshiùⁿ kok-kua
有人心情袂快活 Ū-lâng sim-tsêng bē khùiⁿ-ua̍h
有人氣甲一直掣 Ū-lâng khì kah phi̍h-phi̍h-tshuah
有人袂爽烏白喝 Ū-lâng bē-sóng o͘-pe̍h huah

有人恬恬像著痧 Ū-lâng tiām-tiām tshiūⁿ tio̍h-sua
有人內心像刀割 Ū-lâng sim-lāi to teh kuah
有人唱甲呸喙瀾 Ū-lâng tshiùⁿ kah phùi-tshùi-nōa
有人唱甲像苦旦 Ū-lâng tshiùⁿ kah tshiūⁿ khó͘-tòaⁿ

有人向天咧咒誓 Ū-lâng ǹg-thiⁿ teh tsiù-tsōa
永遠毋唱這條歌 Éng-oán m̄ tshiùⁿ tsit-tiâu kua
咱的國歌遮拖磨 Lán ê kok-kua hiah thua-bôa
吾黨所宗到遮煞 Ngó͘-tóng-só͘-tsong kàu-tsia suah