《巴克禮普世版聖經(試讀本)》

| | | 轉寄

巴克禮普世版(試讀本) 使徒行傳第十六章

1 Thê-mô͘-thài Tuè Pó-lô kah Se-lah Khì Thuân-tō Pó-lô koh khì Ti̍k-pì kah Lō͘-su-tik, tú-hó tī hia ū tsi̍t-ê bûn-tô͘ miâ-kiò Thê-mô͘-thài, lāu-bú sī Iû-thài-lâng, lāu-pē sī Hi-lia̍p-lâng. 2 Lō͘-su-tik kah Í-ko-liām ê sìn-tô͘ lóng o-ló i. 3 Pó-lô siūⁿ beh tshuā i tsò-hué khì, tsiū kā i kiâⁿ kat-lé, in-uī hit só͘-tsāi ê Iû-thài-lâng lóng tsai i ê lāu-pē sī Hi-lia̍p-lâng. 4 In king-kuè tsiah-ê siâⁿ ê sî, tsiong Iâ-lō͘-sat-líng sù-tô͘ kah tiúⁿ-ló só͘ gī-kuat ê kui-lē thuân hō͘ in khì tsun-siú. 5 Tsiū án-ne, tsiah-ê kàu-huē ê sìn-sim ná kian-kò͘, lâng-gia̍h ji̍t-ji̍t ke-thiⁿ. 6 Má-kî-tùn ê Ho͘-siaⁿ In-uī Sìng-Sîn tsó͘-tsí in tī A-se-a-síng thuân tō-lí, in tsiū tuì Hut-lū-ka kah Ka-lia̍p-thài ê tē-hng king-kuè. 7 In lâi-kàu Muí-se-a ê pian-kài, siūⁿ-beh khì Pì-tshui-nî, m̄-koh Iâ-so͘ ê Sìng-Sîn m̄-tsún. 8 In tsiū se̍h tuì Muí-se-a king-kuè, lo̍h khì Ti̍k-lô-a. 9 Hit àm, Pó-lô khuàⁿ-tio̍h īⁿ-siōng, ū tsi̍t-ê Má-kî-tùn-lâng khiā-teh kiû i kóng, "Tshiáⁿ kuè-lâi Má-kî-tùn pang-tsō͘ guán!" 10 Pó-lô khuàⁿ-tio̍h īⁿ-siōng liáu-āu, guán suî-sî tsún-pī beh khì Má-kî-tùn. Guán khak-sìn tse sī Siōng-Tsú ho͘-tiàu guán thuân hok-im hō͘ Má-kî-tùn-lâng.

Lū-tí-a Kui Tsú
11 Guán tuì Ti̍k-lô-a tsē tsûn it-ti̍t khì-kàu Sat-mô͘-ti̍k-lat, keh-tńg-ji̍t lâi-kàu Nî-a-pho-lī. 12 Tuì hia lâi-kàu Hui-li̍p-pí, tsiū-sī Má-kî-tùn hit tē-khu ê thâu tsi̍t-ê siâⁿ, mā sī Lô-má ê si̍t-bîn-tē. Guán tī tsit-ê siâⁿ tuà kuí-nā ji̍t. 13 Tī An-hioh-ji̍t, guán tshut siâⁿ-mn̂g-guā lâi-kàu hô-piⁿ, siūⁿ-kóng tī hia ū kî-tó ê só͘-tsāi. Guán tsiū tsē lo̍h-lâi, kah tsū-tsi̍p tī hia ê hū-lí tâm-lūn tō-lí. 14 Ū tsi̍t-ê bē tsí-sik-pò͘ ê hū-lí miâ-kiò Lū-tí-a lâi thiaⁿ tō-lí, i sī Tshui-ngá-tshui-lat-siâⁿ ê lâng, pîng-sî kìng-pài Siōng-Tsú. Siōng-Tsú khui i ê sim, hō͘ i tsuan-sim thiaⁿ Pó-lô só͘ kóng ê uē. 15 I kah tshù-ni̍h ê lâng í-king siū sé-lé, tsiū kiû guán, kóng, "Nā lia̍h guá tsò tsin-si̍t sìn Tsú ê lâng, tshiáⁿ lâi guán tau tuà." I kiông-kiông kā guán lâu lo̍h-lâi tuà.

Tī Hui-li̍p-pí Tsē-kaⁿ
16 Āu-lâi guán khì kî-tó ê só͘-tsāi, guán tú-tio̍h tsi̍t-ê hō͘ pok-kuà ê sîn hū-sin ê tsa-bó͘ lô͘-lē, i kā lâng pok-kuà sǹg-miā, thè hiah-ê tsú-lâng thàn tsin-tsē tsîⁿ. 17 I tuè tī Pó-lô kah guán ê āu-bīn, tuā-siaⁿ huah: "Tsiah-ê lâng tsiū-sī tsì-kuân Siōng-Tsú ê lô͘-po̍k, beh tuì lín suan-káng tsín-kiù ê tō-lō͘." 18 I kuí-nā-ji̍t lóng án-ne huah. Pó-lô tsin thó-ià, ua̍t-tńg-sin kā hit-ê siâ-sîn kóng, "Guá hōng Iâ-so͘ Ki-tok ê miâ bīng-līng lí tuì tsit-ê lâng tshut-khì." Siâ-sîn suî-sî tuì hit-ê lâng tshut-khì. 19 Tsa-bó͘ lô͘-lē ê tsú-lâng khuàⁿ-tio̍h thàn tsîⁿ ê ǹg-bāng sit-lo̍h khì à, tsiū kā Pó-lô kah Se-lah lia̍h khí-lâi, kā in thua khì ke-lō͘ kìⁿ kuaⁿ-uân, 20 kau hō͘ Lô-má kuaⁿ-tiúⁿ, kóng, "Tsit nn̄g-lâng sī Iû-thài-lâng, lâi teh kiáu-jiáu lán ê siâⁿ, 21 thuân lán Lô-má-lâng bô ing-kai tsiap-siū á-sī tsun-siú ê kui-lē." 22 Tsìng-lâng mā khí-lâi kong-kik in. Kuaⁿ-tiúⁿ pak in ê saⁿ, bīng-līng lâng īng kùn-á kā in kòng. 23 Kòng tsin-tsē ē liáu-āu, kā in kuaiⁿ lo̍h-kaⁿ, huan-hù kò͘-kaⁿ ê lâng giâm-bi̍t kò͘-siú. 24 Kò͘-kaⁿ ê lâng siū-tio̍h bīng-līng, tsiū kā in kuaiⁿ ji̍p-khì lāi-kaⁿ, siang-kha pa̍k tuà tshâ-kê. 25 Tsha-put-to puàⁿ-mê ê sî, Pó-lô kah Se-lah kî-tó gîm-si, o-ló Siōng-Tsú. Kî-tha ê huān-lâng lóng tsù-ì teh thiaⁿ. 26 Hut-jiân khí tuā tē-tāng, liân kaⁿ ê tē-ki lóng iô-tāng, só͘-ū ê kaⁿ-mn̂g suî-sî lóng khui, huān-lâng ê kha-khàu tsuân-pō͘ lak khì. 27 Kò͘-kaⁿ ê lâng tshéⁿ khí-lâi, khuàⁿ-tio̍h kaⁿ-mn̂g khui-khui, siūⁿ-kóng huān-lâng lóng tô-tsáu liáu-liáu, tsiū pui̍h to beh tsū-sat. 28 M̄-koh Pó-lô tuā-siaⁿ huah: "M̄-thang siong-hāi ka-kī, guán lóng tī tsia." 29 Kò͘-kaⁿ ê lâng kiò lâng gia̍h ting-hué lâi, tsông ji̍p-khì, phi̍h-phi̍h-tshuah phak tī Pó-lô kah Se-lah ê kha-tsîng. 30 Jiân-āu tshuā in tshut-lâi, kóng, "Lāu-su ah, guá tio̍h án-tsuáⁿ tsò, tsiah ē tit-tio̍h kiù?" 31 Pó-lô kah Se-lah ìn kóng, "Tio̍h sìn Tsú Iâ-so͘, lí ê ke tsiū ē tit-tio̍h kiù." 32 In tsiong Tsú ê tō-lí kóng hō͘ i kah in tsuân-ke ê lâng thiaⁿ. 33 Hit mê, kò͘-kaⁿ ê lâng tshuā Pó-lô kah Se-lah khì sé in ê khang-tshuì. I kah tsuân-ke ê lâng suî-sî siū sé-lé. 34 I tshuā in ji̍p-khì in ê tshù, tsún-pī mi̍h-kiāⁿ hō͘ in tsia̍h. In sìn Siōng-Tsú liáu-āu, tsuân-ke lóng tsin huaⁿ-hí. 35 Keh-tńg tsá-khí, Lô-má ê kuaⁿ-tiúⁿ phài kíng-kuaⁿ, kóng, "Kā hit nn̄g-lâng pàng tshut-khì." 36 Kò͘-kaⁿ ê lâng tsiong tsiah-ê uē kā Pó-lô kóng, "Kuaⁿ-tiúⁿ ū kau-tài kóng beh pàng lín tshut-khì. Taⁿ lín thang tshut-lâi, pîng-an lī-khui." 37 M̄-koh Pó-lô kā hiah-ê lâng kóng, "Guán sī Lô-má-lâng, bē siū sím-mn̄g tsiū tī tsìng-lâng bīn-tsîng īng kùn-á kā guán kòng, koh kā guán kuaiⁿ lo̍h-kaⁿ. Taⁿ beh thau-thau-á kuáⁿ guán tshut-khì sī-bô? Án-ne bē-īng-tit, tio̍h kiò Lô-má kuaⁿ-tiúⁿ tshin-sin lâi tshuā guán tshut-khì!" 38 Kíng-kuaⁿ tsiong tsiah-ê uē kā kuaⁿ-tiúⁿ kóng. Kuaⁿ-tiúⁿ thiaⁿ-tio̍h kóng in sī Lô-má-lâng, tsiū tsin kiaⁿ-hiâⁿ. 39 Kuaⁿ-tiúⁿ tsiū lâi kā in khó͘-khǹg, tshuā in tshut-lâi, tshiáⁿ in lī-khui hit-ê siâⁿ. 40 Pó-lô kah Se-lah lī-khui kaⁿ-ga̍k, tsiū khì Lū-tí-a in tau, kah hiah-ê sìn-tô͘ saⁿ-kìⁿ, kā in kó͘-lē liáu-āu tsiah lī-khui hia.