《巴克禮普世版聖經(試讀本)》

| | | 轉寄

巴克禮普世版(試讀本) 提摩太前書第四章

Ké ê Kàu-su
1 M̄-koh Sìng-Sîn bîng-bîng kóng, tī āu-lâi ê sî-kî beh ū-lâng khì-sak sìn-gióng, ì-ài hiah-ê bê-hi̍k lâng ê siâ-lîng kah kuí-sîn ê kà-sī. 2 Tsit-khuán ê kà-sī sī tuì kóng pe̍h-tsha̍t ê lâng ê guī-siān lâi-.ê. In ê liông-sim í-king hō͘ Mô͘-kuí īng jia̍t ê thih-ìn ù tsò kì-hō lâi kui-sio̍k Mô͘-kuí. 3 In kìm-tsí kè-tshuā, kìm-kài tsi̍t-kuá tsia̍h-mi̍h, tsiū-sī Siōng-Tsú só͘ tshòng-tsō, beh hō͘ sìn koh liáu-kái tsin-lí ê lâng īng kám-siā ê sim lâi niá-siū-.ê. 4 In-uī Siōng-Tsú só͘ tshòng-tsō ê mi̍h lóng sī hó, nā īng kám-siā ê sim lâi niá-siū, tsiū bô tsi̍t-hāng sī kìm-khī. 5 Só͘-ū ê tsia̍h-mi̍h thong-kuè Siōng-Tsú ê uē kah lâng ê kî-tó tsiū tsiâⁿ-tsò sìng-kiat.

Ki-tok Iâ-so͘ ê Hó Tshe-īng
6 Lí nā tsiong tsiah-ê tāi-tsì thê-tshéⁿ hiaⁿ-tī tsí-muē, tsiū ē tsiâⁿ-tsò Ki-tok Iâ-so͘ hó ê tshe-īng, īng só͘ sìn ê tō-lí kah só͘ sūn-ho̍k hó ê kà-sī lâi tit-tio̍h puê-ióng. 7 Tio̍h khì-sak tsho͘-sio̍k ê uē kah bô-iáⁿ bô-jiah ê thuân-suat. Uī-tio̍h kìng-khiân ê sing-ua̍h, tio̍h kè-sio̍k tshau-liān ka-kī. 8 Tshau-liān sing-khu ū tām-po̍h-á lī-ik, m̄-koh kìng-khiân tuì ta̍k-hāng tāi-tsì lóng ū lī-ik, in-uī ū ìng-ín thang tit-tio̍h hiān-kim kah tsiong-lâi ê ua̍h-miā. 9 Tsit-kù uē lán thang siong-sìn, ta̍t-tit lán uân-tsuân tsiap-siū. 10 Uī-tio̍h tsit-ê bo̍k-tik, lán lô-khó͘ phah-piàⁿ, in-uī lán ê ǹg-bāng tsāi-tī íng-uán ua̍h-miā ê Siōng-Tsú, I sī jîn-luī ê Kiù-Tsú, ti̍k-pia̍t sī sìn-tô͘ ê Kiù-Tsú. 11 Lí tio̍h tsiong tsiah-ê tāi-tsì kā in khuàn-bián kah kà-sī. 12 M̄-thang in-uī lí ê siàu-liân hō͘ lâng khuàⁿ-khin, tio̍h tī kóng-uē, hîng-uî, thiàⁿ-sim, sìn-sim kah sûn-kiat tsò sìn-tô͘ ê bô͘-huān. 13 Tio̍h tì-ì tha̍k Sìng-king, khuàn-bián kah kà-sī, ti̍t-kàu guá lâi. 14 M̄-thang hut-lio̍k lí só͘ niá-siū sio̍k-lîng ê un-sù, tsiū-sī thong-kuè sian-ti ê uē kah tiúⁿ-ló-thuân ê huāⁿ-tshiú sù hō͘ lí-.ê. 15 Lí tio̍h tì-ì tsuan-sim khì tsò tsiah-ê tāi-tsì, hō͘ tsìng-lâng khuàⁿ-tio̍h lí ê tsìn-pō͘. 16 Lí ka-kī tio̍h kín-sīn, mā tio̍h tsù-ì lí ê kà-sī, siông-siông kuan-sim tsiah-ê tāi-tsì lâi tsò, in-uī án-ne tsò tsiah ē kiù lí pún-sin kah thiaⁿ lí ê kà-sī ê lâng.