《巴克禮普世版聖經(試讀本)》

| | | 轉寄

巴克禮普世版(試讀本) 希伯來書第五章

1 Muí tsi̍t-ê tsè-si-tiúⁿ lóng sī tuì lâng ê tiong-kan kíng-suán tshut-lâi, siū siat-li̍p lâi thè lâng ho̍k-sāi Siōng-Tsú, thang uī-tio̍h in ê tsuē hiàn lé-mi̍h kah tsè-phín. 2 Tsè-si-tiúⁿ kì-jiân tsai ka-kī ū tsin-tsē luán-jio̍k ê só͘-tsāi, só͘-í ē-tàng thé-liōng bû-ti kah sit-bê ê lâng. 3 Só͘-í i ing-kai uī-tio̍h pún-sin tshin-tshiūⁿ uī-tio̍h jîn-bîn ê tsuē lâi hiàn-tsè. 4 Bô-lâng ē-tàng ka-kī tshú-tit tsit-ê tsun-kuì ê tsit-hūn, tsí ū tshin-tshiūⁿ A-lûn án-ne hō͘ Siōng-Tsú suán-tiàu. 5 Siâng-khuán, Ki-tok mā m̄-sī ka-kī tsing-tshú tsò tsè-si-tiúⁿ ê îng-iāu, huán-tńg sī Siōng-Tsú tuì I kóng, "Lí tsiū-sī guá ê Kiáⁿ, Guá kin-á-ji̍t seⁿ Lí.( tsù: SPh 2:7) 6 Tī pa̍t-uī Siōng-Tsú mā kóng: Lí tsiàu Bi̍k-ki-sé-tik ê pâi-pan sūn-sī íng-uán tsò tsè-si.( tsù: SPh 110:4) 7 Iâ-so͘ tsāi-sè ê sî-ji̍t bat tuā-siaⁿ huah koh lâu ba̍k-sái, ǹg hit-ê ē kiù I thuat-lī sí-bông ê Siōng-Tsú khún-kiû. Siōng-Tsú ū thiaⁿ I ê kìng-khiân kî-tó. 8 Iâ-so͘ sui-jiân sī Siōng-Tsú ê Kiáⁿ, iáu-koh ū tuì só͘ siū ê khó͘-lān lâi ha̍k-si̍p sūn-ho̍k. 9 Siōng-Tsú í-king hō͘ Ki-tok ta̍t-kàu uân-tsuân ê kíng-kài, I tsiū tsiâⁿ-tsò só͘-ū sūn-ho̍k I ê lâng íng-uán tsín-kiù ê kin-guân, 10 hō͘ Siōng-Tsú tsí-tīng tsiàu Bi̍k-ki-sé-tik ê pâi-pan sūn-sī tsò tsè-si-tiúⁿ.

Kíng-kài Puē-kàu ê Lâng
11 Kuan-hē Ki-tok tsò tsè-si-tiúⁿ ê tāi-tsì, guán ū tsin-tsē uē ài kóng, m̄-koh oh-tit suat-bîng, in-uī lín hīⁿ-khang tūn bē lí-kái. 12 Tsiàu-kóng lín tsá to̍h tsò lāu-su, m̄-koh lín iáu su-iàu lâng kā lín kà Siōng-Tsú sìn-sit ê ki-tshó͘, lín su-iàu tsia̍h-ling, iáu bē-tàng tsia̍h-pn̄g. 13 Eⁿ-á tsiah teh tsia̍h-ling, iáu bē-hiáu lí-kái sī-hui ê tō-lí. 14 Tuā-lâng teh tsia̍h pn̄g, in sio̍k-lîng ê sim-khiàu ū siū-kuè si̍t-tsè ê tshau-liān tsiah ē-hiáu hun-pia̍t hó-pháiⁿ.