《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第四章

作者 巴克禮普世版小組 2011.04.17

1) Hit sî, Iâ-so͘ hō͘ Sìng Lîng tshuā kàu khòng-iá, bueh siū Mô͘-kuí ê tshì-thàm.
2) Iâ-so͘ í-king kìm-tsia̍h sì-tsa̍p mê-ji̍t, āu-lâi tsiū iau.
3) Tshì-thàm-tsiá uá-lâi kā I kóng, Lí nā sī Siōng-tsú ê Kiáⁿ, tsiū kah tsiah-ê tsio̍h-thâu pìⁿ tsò piáⁿ.
4) Iâ-so͘ ìn kóng," Sìng-king ū kì-tsài kóng, Lâng ê ua̍h-miā, m̄-sī kan-ta uá-khò piáⁿ, sī uá-khò tuì Siōng-tsú ê tshuì só͘ kóng tshut-lâi ê muí tsi̍t-kù uē."
5) Mô͘-kuí tsiū tshuā Iâ-so͘ kàu sìng siâⁿ, hō͘ I khiā tī Sìng-tiān tshù-tíng siōng-kuân ê só͘-tsāi.
6) kā I kóng, "Lí nā sī Siōng-tsú ê Kiáⁿ, tio̍h tuì tsia thiàu lo̍h-khì; in-uī Sìng-king ū kì-tsài: Siōng-tsú ē bīng-līng I ê thiⁿ-sài lâi pó-hō͘ Lí. In ē īng tshiú kā lí hû teh, hō͘ lí ê kha bē tak-tio̍h tsio̍h-thâu.
7) Iâ-so͘ kā i kóng, " Sìng-king koh ū kì-tsài: M̄-thang tshì-thàm Tsú, lí ê Siōng-tsú."
8) Mô͘-kuí koh tshuā Iâ-so͘ khì tsi̍t-ê tsin kuân ê suaⁿ-tíng, hō͘ I khuàⁿ thiⁿ-ē bān kok kap in ê îng-huâ hù-kuì;
9) kā I kóng, "Lí nā phak-lo̍h pài guá, tsiah-ê it-tshè guá lóng bueh hō͘ Lí.
10) Iâ-so͘ tsiū kā i kóng, "Sat-tàn, kā guá siám-khui! Sìng-king ū kì-tsài: Tio̍h pài Tsú, lí ê Siōng-tsú; tsí-ū ho̍k-sāi I.
11) Mô͘-kuí tsiū lī-khui Iâ-so͘; suî-sî ū thiⁿ-sài lâi su-hāu I.
12) Iâ-so͘ thiaⁿ-tio̍h Iok-hān hō͘ lâng lia̍h-khì kuaiⁿ-kaⁿ, tsiū thè-khì Ka-lī-lī-síng;
13) I lī-khui Ná-sat-li̍k-siâⁿ, khì tuà Se-pò͘-lûn kap La̍p-tāi-lī tē-khu, Ka-lī-lī-ô͘ ô͘-piⁿ ê Ka-pik-lông.
14) Tse sī bueh ìng-giām tsá-tsîng thok sian-ti Í-sài-a só͘ kóng ê uē:
15) Se-pò͘-lûn ê tē, La̍p-tāi-lī ê tē, Iân hái-kîⁿ ê lō͘,Iok-tàn-hô ê hô- guā, Guā-pang-lâng teh tuà ê Ka-lī-lī-síng;
16) Tuà tī o͘-àm-tiong ê jîn-bîn, Ū khuàⁿ-tio̍h tuā kng; Tuà tī sí-ìm ê tē ê lâng ū kng tsiò in.
17) Tuì hit sî khí, Iâ-so͘ khai-sí suan-káng tō-lí, kóng: "Lín tio̍h hué-kái, in-uī Thian-kok teh-bueh lâi-lîm à."
18) Ū tsi̍t-ji̍t, Iâ-so͘ tī Ka-lī-lī-ô͘ ê ô͘-piⁿ teh kiâⁿ ê sî; khuàⁿ-tio̍h nn̄g ê hiaⁿ-tī-á, tsiū-sī kiò tsò Pí-tik ê Se-bûn kap i ê hiaⁿ-tī An-tik-lia̍t, tī ô͘-ni̍h teh pha-bāng, in-uī in sī thó-hî-lâng.
19) Iâ-so͘ tsiū kā in kóng, " Lâi tuè guá, guá bueh hō͘ lín tit-tio̍h lâng tshin-tshiūⁿ thó-hî-lâng tit-tio̍h hî.
20) In suî-sî kā hî-bāng-á pàng teh lâi tuè Iâ-so͘.
21) Iâ-so͘ kiâⁿ tsìn-tsîng, koh khuàⁿ-tio̍h nn̄g ê hiaⁿ-tī-á, Se-pí-thài ê kiáⁿ Ngá-kok kap i ê sió-tī Iok-hān. In kap lāu-pē Se-pí-thài tī tsûn-tíng teh pó͘ bāng, Iâ-so͘ iā tsio in lâi tuè I.
22) In suî-sî kā tsûn pàng hē teh, kap in ê lāu-pē sio-sî, lâi tuè Iâ-so͘.
23) Iâ-so͘ kā Ka-lī-lī-síng kiâⁿ thàu-thàu, tī hia ê huē-tn̂g kà-sī lâng, suan-káng Thian-kok ê Hok-im, i-hó bîn-tsiòng ta̍k tsióng ê pēⁿ-tsìng.
24) I ê miâ-siaⁿ thuân kàu tsuân Sū-lī-a. Lâng tsiū tsiong só͘-ū tài pēⁿ-thiàⁿ ê lâng, bô-lūn sī siâ-sîn hū-sin, iûⁿ-hîn, kap puàn-suī tíng-tíng, lóng tshuā lâi Iâ-so͘ hia, I tsiū kā in i-hó.
25) Hit sî, tuì Ka-lī-lī, Te-ka-pho-lī, Iâ-lō͘-sat-líng, Iû-thài, kap Iok-tàn-hô tuì-huāⁿ, ū tsin tuā tīn ê lâng lâi tuè I.