《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第九章

作者 巴克禮普世版小組 2013.02.03

Iâ-so͘ koh kā in kóng, " Guá si̍t-tsāi kā lín kóng, khiā-tī tsia ê ū-lâng iáu-buē sí í-tsîng, ē khuàⁿ-tio̍h Siōng-Tsú Kok-tō͘ tshiong-muá tuā kuân-lîng lîm-kàu."

Iâ-so͘ Kái-piàn Hîng-siōng (Mt 17:1-13; Lk 9:28-36)

2Kuè la̍k ji̍t āu, Iâ-so͘ kan-taⁿ tshuā Pí-tik, Ngá-kok kah Iok-hān, peh-tsiūⁿ tsi̍t-tsō kuân suaⁿ. Iâ-so͘ tī in ê bīn-tsîng kái-piàn hîng-tsōng.

3 I ê saⁿ pe̍h-siak-siak koh tshàn-lān. Sè-kan ê phiò-pò͘ sai-hū mā bē-tàng phiò kah hiah-ni̍h pe̍h.

4 In khuàⁿ-kìⁿ Í-lī-a kah Mô͘-se tshut-hiān, kah Iâ-so͘ teh kóng-uē.

5 Pí-tik tuì Iâ-so͘ kóng, " Lāu-su, lán tī tsia tsin hó. Guán lâi tah saⁿ-king liâu-á, tsi̍t king hō͘ lí, tsi̍t king hō͘ Mô͘-se, tsi̍t king hō͘ Í-lī-a."

6 Pí-tik án-ne kóng, sī in-uī tsin tio̍h-kiaⁿ suah m̄-tsai tio̍h án-tsuáⁿ kóng tsiah hó.

7Hit sî ū tsi̍t-phìⁿ hûn kā in tà teh, koh tuì hûn-ni̍h tshut-siaⁿ kóng, " Tsit-ê sī guá só͘ thiàⁿ ê Kiáⁿ, lín tio̍h thiaⁿ I ê uē."

8 In suî-sî khuàⁿ sì-tsiu-uî, bô khuàⁿ-tio̍h puàⁿ lâng, tsí-ū Iâ-so͘ kah in tī hia.

9 In lo̍h-suaⁿ ê sî, Iâ-so͘ bīng-līng in kóng, " Jîn-tsú iáu-buē tuì sí-lâng tiong koh-ua̍h, m̄-thang tsiong lín só͘ khuàⁿ-tio̍h ê tāi-tsì kā lâng kóng."

10Bûn-tô͘ tsiong Iâ-so͘ ê uē kì-tiâu tī sim-lāi, m̄-koh hō͘-siōng gī-lūn " tuì sí-lâng tiong koh-ua̍h", tsit-kù uē sī siáⁿ-mi̍h ì-sù.

11 Bûn-tô͘ koh mn̄g Iâ-so͘ kóng, " Sī án-tsuáⁿ King-ha̍k-kàu-su kóng, Í-lī-a tio̍h tāi-sing lâi-kàu?"

12 Iâ-so͘ ìn kóng, " Í-lī-a kó-jiân tāi-sing lâi tsiong it-tshè tîng-sin tsíng-tùn. Án-ne sī án-tsuáⁿ Sìng-king kì-tsài:: Jîn-tsú tio̍h siū tsin-tsē khó͘-lān koh hō͘ lâng khuàⁿ-khin?

13 M̄-koh guá kā lín kóng, tú-tú tsiàu Sìng-king só͘ kì-tsài, Í-lī-a í-king lâi ā, lâng tsiàu ka-kī ê ì-sù khuán-thāi i."

Iâ-so͘ I-hó Hō͘ Kuí Hū-sin ê Gín-á (Mt 17:14-21; Lk 9:37-43)

14Iâ-so͘ kah Pí-tik, Ngá-kok, Iok-hān, lâi-kàu kî-tha ê bûn-tô͘ hia, khuàⁿ-tio̍h kui tuā-tīn lâng kā in uî teh, mā ū king-ha̍k kàu-su kah in teh piān-lūn.

15 Kûn-tsiòng khuàⁿ-tio̍h Iâ-so͘ tsin tio̍h-kiaⁿ koh kî-kuài, suî-sî tsáu uá-lâi kā I tshíng-an.

16 Iâ-so͘ mn̄g in kóng, " Lín kah in teh piān-lūn siáⁿ-mi̍h?"

17 Tsìng-lâng tiong-kan tsi̍t-ê lâng ìn kóng, " Lāu-su, guá tshuā guá ê kiáⁿ kàu Lí tsia, i hō͘ kuí hū-sin suah piàn é-káu.

18 bô-lūn tī siáⁿ-mi̍h só͘-tsāi, kuí nā hū-sin tsiū kā i siak-tó, i tsiū lâu-nuā, kā tshuì-khí-kin koh kui sing-khu ngē-khok-khok. Guá ū tshiáⁿ Lí ê bûn-tô͘ kā i kuáⁿ-kuí, in lóng bô huat-tō͘."

19 Iâ-so͘ ìn kóng, " Ai-ah, Tsit-ê sè-tāi ê lâng ná-ē hiah-ni̍h bô sìn-sim? Guá tio̍h koh kah lín tuà juā kú? Guá tio̍h koh jím-nāi lín juā kú? Tshuā lí hit-ê hō͘ kuí hū-sin ê kiáⁿ lâi Guá tsia."

20 In tsiū tshuā i lâi Iâ-so͘ hia. Hit-ê kuí tsi̍t-ē khuàⁿ-tio̍h Iâ-so͘, suî-sî hō͘ hit-ê gín-á tuā thiu-tshuah, kā i siak lo̍h-khì thô͘-kha, liàn-lâi liàn-khì koh lâu-nuā.

21 Iâ-so͘ mn̄g gín-á ê lāu-pē kóng, " I hō͘ kuí hū-sin juā kú à?" Hit-ê lāu-pē Kóng, " Tsū sè-hàn to̍h án-ne.

22 Kuí tiāⁿ-tiāⁿ kā i hiat-lo̍h hué, hiat-lo̍h tsuí, beh kā i hāi-sí. Taⁿ Lí nā tsò ē-kàu, kiû Lí khó-liân guán, lâi kā guán pang-tsō͘."

23 Iâ-so͘ kā i kóng, " Lí tsuáⁿ-iūⁿ kóng, ' Lí nā ē'? Ū sìn-sim ê lâng ta̍k-hāng lóng ē."

24 Gín-ná ê lāu-pē suî-sî tuā-siaⁿ huah kóng, " Guá sìn à; guá só͘ sìn nā bô kàu, Kiû Lí tio̍h pang-tsō͘ guá."

25 Iâ-so͘ khuàⁿ-tio̍h kui tīn lâng tsáu uá-lâi, tsiū tsik-pī hit-ê siâ-sîn kóng, " Lí tsit-ê é-káu koh tshàu-hīⁿ ê kuí, Guá bīng-līng lí lī-khui tsit-ê gín-á, m̄-tsún lí koh ji̍p-khì."

26Hit-ê kuí tuā-siaⁿ huah, hō͘ hit-ê gín-á tuā thiu-tshuah liáu-āu tsiah tshut-khì. Hit-ê gín-á piàn kah ná sí-lâng. Tuā-pō͘-hūn ê lâng kóng, " I sí-khì à."

27 M̄-koh Iâ-so͘ khan i ê tshiú, hû i khí-lâi. I tsiū khí-lâi.

28 Iâ-so͘ ji̍p-khì tshù-lāi, bûn-tô͘ thau-thau-á mn̄g I kóng, " Sī án-tsuáⁿ guán bô huat-tō͘ kuáⁿ hit-ê kuí?"

29 Iâ-so͘ ìn kóng, " Tsit tsióng kuí tio̍h khò kî-tó, tsiah ū huat-tō͘ kā i kuáⁿ-tshut."

Iâ-so͘ koh Ī-giân Ka-kī ê Sí-bông Kah Koh-ua̍h (Mt 17:22-23; Lk 9:43-45)

30Iâ-so͘ kah bûn-tô͘ tuì hia king-kuè Ka-lī-lī-síng, Iâ-so͘ bô ài lâng tsai I tī tó-uī.

31 In-uī I teh kà-sī bûn-tô͘ kóng, " Jîn-tsú ē hō͘ lâng tshut-bē, lâng ē kā I hāi-sí. Sí liáu saⁿ ji̍t āu ē koh-ua̍h."

32 Bûn-tô͘ bē bîng-pi̍k tsit-kù uē ê ì-sù, koh m̄-káⁿ kā I mn̄g.

Siáⁿ-lâng Siōng-tuā(Mt 18:1-5; Lk 9:46-48)
33Iâ-so͘ kah bûn-tô͘ lâi-kàu Ka-pik-lông, Iâ-so͘ tī tshù-ni̍h ê sî mn̄g in kóng, " Lín tī lō͘-ni̍h teh gī-lūn siáⁿ-mi̍h?"

34 Bûn-tô͘ tiām-tiām, in-uī in tī lō͘-ni̍h ū hō͘-siōng tsing-lūn siáⁿ-lâng siōng tuā.

35 Iâ-so͘ tsē lo̍h-lâi, kiò tsa̍p-jī sù-tô͘ uá-lâi kā in kóng, " Lâng nā ài beh tsò tē-it, tio̍h tsò tsìng-lâng ê lō͘-bué, mā tio̍h tsò tsìng-lâng ê tshe-īng."

36 Iâ-so͘ tsiū tshuā tsi̍t-ê gín-á lâi hō͘ i khiā tī in tiong-kan, kā i phō khí-lâi, tuì bûn-tô͘ kóng,

37 Lâng nā uī-tio̍h Guá ê miâ lâi tsiap-la̍p tsi̍t-ê tsit-khuán ê gín-á, tsiū-sī tsiap-la̍p guá; tsiap-la̍p Guá ê lâng, m̄-sī tsiap-la̍p Guá, sī tsiap-la̍p tshe Guá lâi ê Hit-uī."

Bô Huán-tuì Lán Tsiū-sī Tsàn-sîng Lán (Lk 9:49-50)

38 Iok-hān kā Iâ-so͘ kóng, " Lāu-su, guán ū khuàⁿ-tio̍h tsi̍t-ê lâng hōng Lí ê miâ teh kuáⁿ-kuí. Guán kā i tsó͘-tòng, in-uī i bô teh tuè lán kiâⁿ."

39 Iâ-so͘ kóng, " M̄-thang kā i tsó͘-tòng, in-uī bô-lâng hōng guá ê miâ kiâⁿ sîn-jiah, suî-sî huán-tńg lâi kóng guá ê pháiⁿ-uē.

40 Bô huán-tuì lán ê lâng, tsiū-sī tsàn-sîng lán.

41 Guá si̍t-tsāi kā lín kóng, in-uī lín sio̍k Ki-tok, bô-lūn siáⁿ-lâng īng tsi̍t pue tsuí hō͘ lín lim, tsit-ê lâng it-tīng ē tit-tio̍h pò-siúⁿ."

Ín-khí Lâng Huān-tsuē (Mt 18:6-9; Lk 17:1-2)

42Iâ-so͘ kóng, "Bô-lūn siáⁿ-lâng hō͘ sìn guá ê lâng tiong-kan bî-sè ê tsi̍t-ê huān-tsuē, hit-ê lâng lîng-khó hō͘ lâng īng tuā tsio̍h-bō pa̍k tuà ām-kún, hiat lo̍h-khì hái-ni̍h.

43Lí ê tsi̍t-ki tshiú nā ín-khí lí huān-tsuē, tio̍h kā i tsām hiat-ka̍k. Lîng-khó kiám tsi̍t-ki tshiú phuà-siùⁿ lâi ji̍p-khì íng-uán-ua̍h, pí siang-tshiú hó-hó lo̍h tē-ga̍k hō͘ bē hua-khì ê hué sio khah hó.

44 Tī hia teh kā in tsia̍h ê thâng bē sí, teh kā lín sio ê hué mā bē hua-khì.( tsù: Ū-ê tshau-pún bô tsit tsat)

45 Lí ê tsi̍t-ki kha nā ín-khí lí huān-tsuē, tio̍h kā i tsām hiat-ka̍k. Lîng-khó kiám tsi̍t-ki kha phuà-siùⁿ lâi ji̍p-khì íng-uán-ua̍h, pí siang-kha hó-hó lo̍h tē-ga̍k khah hó.

46 Tī hia teh kā in tsia̍h ê thâng bē sí, teh kā lín sio ê hué mā bē hua-khì.( tsù: Ū-ê tshau-pún bô tsit tsat)

47 Lí ê tsi̍t-luí ba̍k-tsiu nā ín-khí lí huān-tsuē, tio̍h kā i ó͘ hiat-ka̍k. Lîng-khó kiám tsi̍t-luí ba̍k-tsiu phuà-siùⁿ lâi ji̍p-khì Siōng-Tsú ê kok-tō͘, pí nn̄g-luí ba̍k-tsiu hó-hó lo̍h tē-ga̍k khah hó.

48 Tī hia teh kā in tsia̍h ê thâng bē sí, teh kā lín sio ê hué mā bē hua-khì.( tsù: Ū-ê tshau-pún bô tsit tsat)( tsù: ISA 66:24)

49 In-uī ta̍k-lâng lóng tio̍h īng hué lâi liān, tshin-tshiūⁿ īng iâm sīⁿ.

50 Iâm pún-sin tsin ū lō͘-īng, m̄-koh iâm nā sit-khì i ê kiâm-bī, beh īng siáⁿ-mi̍h lâi huê-ho̍k i ê bī? Lín ê lāi-bīn ing-kai tio̍h ū iâm ê tsok-iōng, tāi-ke tio̍h hō͘-siōng hô-hó."