《陳雷文選》

愷悅公主

作者 陳雷

「一百萬！一百萬！一百萬！…」鳳a大聲hiu，雙手gia̍h kûan概成teh huah萬歲。「一百萬！一百萬！…」俊a tùe伊hán，kā鳳a規身軀mooh起來se̍h。俊a人細hiunn，鳳a身肥thún，顛一下差一sut á siak倒。不過事實總數是99萬，算二擺a，kah無一百萬。Huah一百萬加真爽tō是。

「來！我tshūa你來去Soho買súi衫！據在你kíng，看beh幾十領…」kā鳳a kûi leh tsim，tsim kah 鳳a ngiau，gī-gī笑。He錢若金紙一把一把la̍k-la̍k iā，「一萬，二萬，三萬…」，規土腳攏是。

「你看！俊a！」鳳a huah大聲，指hit台電視。「你看！你lah！是你lah！」俊a驚一tiô，雙手kā鳳a ê腰放去。「Koh來特別報告，今á日下晡，天母東路玉山銀行搶劫案…」Koh放搶劫現場ê錄影。「查甫人，20 thóng歲，155公分，鼻頭一粒烏痣…」Tann害a，hit個進前，伊有去玉山銀行看幾nā擺，明明無看著有監視ê hip相機。夭壽oh，m̄知tī tó位去hōo hip去？趕緊hia ê錢khioh-khioh--leh，運動袋á袋一袋，安全帽tì leh，駛oo-too-bái走去永和鳳a in母a hia bih。

隔轉日成實載鳳a去Soho買súi衫。俊a驚hōo人認著，安全帽tì tiâu-tiâu，m̄敢thǹg落來。Oo-too-bái停tiàm Soho頭前，kā鳳a講：「你入去tō好。我tùa tsia等。」鳳a皮包á kūann leh，家己一個人入去，一樓到五樓，se̍h二點外鐘才出來。雙手kūann三個袋á tsiah大ê。

先穿一su pâng金花干烏ê禮服hōo俊a看，長長拖到土腳。Koh來換一套白波波ê洋裝，kah一領té-té-té ê迷你裙。續落來thǹg kah光光，mua一su粉紅á半通光ê內底衫裙，內面一領有le-suh ê細細e̍h-e̍h ê三角褲，「你看！愷悅公主陳金鳳！」一雙三寸kûan屐á se̍h一liàn，差一sut á uaihN一倒。俊a看kah坐bē tiâu，起狂peh起來腳來手來，ngia̍uh-ngia̍uh摸。鳳a m̄ hōo伊摸。「你家己講ê ，thàn錢發pōng，beh tshūa我去愷悅，tùa公主套房 」「明á tsài，明á tsài來去tùa。」Tō beh kap鳳a sńg。鳳a kā sak走，m̄ kap伊sńg。「明á tsài，明á tsài才拍算。」Súi衫súi褲收收起來。據在俊a七姑成八姑成，m̄ tō是m̄。

Hit幾日電視無新聞，天母東路玉山銀行搶劫案報幾偌擺。Ta̍k擺hip相出來，鼻頭一粒痣，正面、邊á面攏有，清清楚楚。俊a bih tī鳳a in母a hia，規日m̄敢出門，ná敢去tùa愷悅？！Kan-na早時oo-too-bái載鳳a ùi永和去台北上班，安全帽khàm密密，m̄敢thǹg起來。按呢過三禮拜，日時關厝內，暗時hōo鳳a刁古董創治，換súi衫súi褲hōo伊看，hiâu-hue使目尾，微微笑，kā伊siânn：「愷悅公主陳金鳳。」Tō是kan-na m̄ hōo伊摸。

按呢ta-sò koh生iau，tī hia受苦想無步。Tú好無外久和平病院病案爆發，台北市「殺死（SARS）」大流行。俊a看電視teh報，街á路、店裡四界攏隨人tah一個ma-su-khuh，面掩kah bā-bā，m̄敢喘khùi，驚hōo人ùe著「殺死」。一時想著一個好步，跳起來hiu：「鳳a，我tshūa你來去愷悅。」

掛一個N95 ma-su-khuh，koh另外用紗布作一個大嘴掩，tú好大面khàm bā-bā，tshun hia̍h-á kap目睭。Oo-too-bái駛leh，來到Soho，大扮tō入去。買一su藍海ê西裝，金tauh-liú-á ê sia-tsuh，意大利絲á ne-khu-tái，koh一雙虱目á魚頭尖尖ê烏皮鞋。

二個人穿穿好勢，he查甫ê雖罔無性感男星Gary Cooper ê派頭，人講衫撇人tō ian，mā有三、四分青春男星柯俊雄ê扮勢。He查某ê雖罔無公主明星Grace Kelly ê風度，人講kûan屐三寸io̍h，kha-tshng頭tō有風，mā有四、五分大膽藝人X曉丹ê姿勢。二人N95兼紗布ê ma-su-kuh tah leh，tha-khu-sih坐leh，sáng-sáng勢勢來到愷悅。

Tùa五星愷悅大飯店公主套房，食ê是法國式西餐，牛油tshi-suh，gia̍h刀gia̍h tshiám，lim ê是黃金甘tinn ê siang-phíng，phih-phih pho̍k-pho̍k pù-phok-á，khin-khin khiang-khiang 酒杯á;穿ê是半通光ê紗網掛le-suh，看起來inn-inn iánn-iánn，khah常是摸摸so-so，thǹg kah光光；睏ê是tah báng-tà ê皇后眠床，倒落去nńg-nńg sìm -sìm，搖搖tshi̍k-tshi̍k，歡歡喜喜，規暝免睏。

二暝二日頭到尾全程lum sa-bi-suh（room service），一步免踏出公主房間ê門。Hit日中晝離開五星愷悅，he少年boo-i（boy）穿一身紅絨牽金絲制服，tì一頂雞卵糕kûan帽，khàm一個N95 ma-su-khuh，khiā正正tī大門口等。帽á thǹg起來，kā in tàm大禮，講：「Thank yoo，多謝光臨。」俊a停一腳步，行úa去，tu一張一千khoo ê tsih-puh hōo伊，講：「Very good。 」He boo-i koh áu一個大禮，ia̍t一下手，hut一下 tha-khu-sih tú來到面頭前。

一路hi-hi哈哈，笑轉來到永和。巷á口khiā二個警察á teh等。Hâ短槍、穿擋槍tsí ê衫，掛『抗殺死』ê ma-su-khuh，伸手遮leh m̄ hōo in過。「請恁tsit-má暫時m̄通過。」「Ai-ioh，是啥物代誌？」鳳a假仙問。「巷á內teh掠人。」「真正ê?掠啥物人？」鳳a假仙驚。「搶銀行ê，有槍危險。」「Ûa，beh驚死人！」二個趕緊溜suan。

過來拜一俊a載鳳a來到愷悅大門口，tú好一對a-tok-á手牽手ùi內面出來。查甫ê剃光頭、掛耳鉤，查某ê穿牛á褲、mua短衫、現肚臍。Hit個穿紅絨牽金絲ê boo-i khiā直直，雞卵糕帽á thuh起來行大禮，講：「Thank yoo！Come again。」He a-tok-á概成無看著也無聽著，ma-su-khu掛tiâu leh，tī大門口lám leh相tsim，teh講bye-bye。鳳a ùi愷悅員工出入ê後壁門入去。這日上班，照常掃土腳清房間，到暗時十點下班，規日bi-bi-á笑。款hit間公主套房ê時，摸he眠床nńg-nńg sìm-sìm，搖搖tshi̍k-tshi̍k，嘴ná念：「愷悅公主陳金鳳…，Bóng稀罕lah。」