《台語荒漠甘泉（全羅版）》

"Sin-uan"

作者 陳清俊 翻譯

listen

Jī ge̍h tshue-tsa̍p (Jī ge̍h tsa̍p ji̍t)

"bo̍h-tit ka-kī sin-uan," (Lô-má 12:19)
Ū tsin tsuē sî-tsūn, beh pó-tshî tsīng-tsīng m̄ kóng uē, pí jīm-hô ê hîng-tōng, sī su-iàu koh khah tuā ê gē-li̍k kap ióng-khì. Pó-tshî pîng-tsīng, bô sīu guā-lâi ê íng-hióng sī siōng tuā li̍k-liōng ê piáu-hiān. Tsú Iâ-soo, tngg tú-tio̍h siōng ok-to̍k, siōng tì-miā kong-kik ê sî, I pó-tshî tsīng-tsīng, m̄ kóng tsi̍t-kù uē. I ê an-tsīng sóo huat-tshut ê li̍k-liōng, hōo tāi-tsiòng, kap khòng-kò ê, lóng khí kiann. I tuì ki̍k-tuā ê lîng-tī, siōng tsân-jím ê tuì-thāi, lóng sī bô puànn siann, pó-tshî tiām-tiām. Kìnn-nā sīu kè bô kong-pînn ê khòng-kò, put-pîng ê thāi-gū ê lâng, lóng tsai pó-tshî an-tsīng bô tshut siann, hōo Siōng-tè khì sin-uan, sī su-iàu ki̍k-tuā ê gē-li̍k.

Lâng beh gōo-huē,
Tshē khang-phāng teh hue,
Kóng lí tshò kàu té;
Pó tiām-tsīng bô huê,
Sím-phuànn-kuann sī Ki-tok, m̄-sī in teh tsuè,
Bo̍h-tit kiann, kian-kiông sī pó-puè.

Sù-tôo Pó-lô kóng, "Nā-sī guá bô lia̍h sìnn-miā tsuè iàu-kín," (Sù-tôo hīng-tuān 20:24) tsīu-sī "bô tsi̍t hāng sū uē kā guá iô-tāng". I bô kóng "bô tsi̍t hāng sū uē hōo guá siong-sim." Siong-sim kap bô iô-tāng sī ū tuā-tuā ê tsing-tsha. Sìng-king kì-tsāi, Pó-lô īng un-jîu ê sim lâu ba̍k-sái, ( Sù-tôo hīng-tuān 20:19, 31) ing-hiông bô khin-ī lâu ba̍k-sái. Sìng-king iā kóng, "Iâ-soo lâu ba̍k-sái." (Iok-hān hok-im 11:35) I sī íu-sú í-lâi siōng kian-kiông ê lâng.
Pó-lô tuì tsuè tāi-tsì bô lia̍h sìnn-miā tsuè iàu-kín, bô khuànn sè-kan ê mi̍h tsuè pó-puè, iā m̄-kiann tànn juā tāng. Tsí-ū tsi̍t hāng i kuan-sim tsīu-sī tuì Ki-tok tiong-sim, sóo tsuè lâi hōo Ki-tok huann-hí. Pó-lô pí jīm-hô tsi̍t lâng, khah thé-giām tio̍h, tsuè Ki-tok ê kang sī i tē-tsīunn ê pò-síunn, tit-tio̍h Ki-tok ê huann-hí tsiah sī i thinn-ni̍h ê pò-síunn. --- Margaret Bottome

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw