《BONG報bong2選》

 | | | 轉寄

Sió Hioh-khùn--tsi̍t-ē

作者 Tân Siù-gio̍k 2007.09.23

Tsá-sî bô-îng, àm-sî bô-îng! Tsi̍t-ji̍t jī-tsa̍p-sì tiám-tsing, lóng teh bô-îng! Sī uī siáⁿ-mi̍h? Sìng-king tíng-bīn kóng, “Iâⁿ tio̍h tsuân sè-kài, suah sit-khì ka-kī ê sìⁿ-miā.” Án-ni kám ū kè-ta̍t?

Pîng-iú, sió hioh-khùn--tsi̍t-ē, tī an-tsīng tiong, tsù-ì thiaⁿ sim-lāi bî-sió ê siaⁿ-im, hō͘ thâu-khak tshing-tshíⁿ, thang hó-hó-á su-khó, tī jîn-sing ê si̍p-jī-lō͘-kháu, lán sī beh kiâⁿ tuì tó-uī khì?

Kui-ji̍t o͘-pe̍h tsông, bô-îng tshih-tshih, taⁿ khuàⁿ-kìⁿ hn̄g-hn̄g sîng-kong ê suaⁿ-niá, bô khuàⁿ-kìⁿ kē-kē sit-pāi ê suaⁿ-kok, tuì nn̄g-pîng bí-lē ê sè-kài, koh-khah khuàⁿ bē tio̍h.

Tán kàu ū tsi̍t-kang, lí bô tiuⁿ-tî, huat-hiān sui-jiân tit-tio̍h tsuân sè-kài, tān-sī sit-khì sim-lāi ê pîng-an kap hí-lo̍k, ia̍h-sī jîn-luī siōng pó-kuì, thian-sing lóng ū ê ” ài ” ê lîng-li̍k. M̄-tsai beh án-tsuáⁿ ài--lâng, iā m̄-tsai beh án-tsuáⁿ hō͘ lâng ài. Pîng-iú, kàu hit-sî, lí sī tit--tio̍h, iah-sī sit--khì? Hō͘ lí ka-kī khì suán-ti̍k.

Sìⁿ-miā sī tsin té, siáⁿ-mi̍h lâng to bô huat-tō͘ khì pá-ak ka-kī ê bîn-á-tsài, tī muí-ji̍t tsiok bô-îng ê sî-tsūn, sió hioh-khùn--tsi̍t-ē, khì tshiau-tshuē sìⁿ-miā ê ì-gī kap kè-ta̍t, tsiah ū khuì-la̍t thang kè-sio̍k phah-piàⁿ--lo̍h-khì.