《BONG報bong2選》

 | | | 轉寄

Tsi̍t-luí Muî-kuì-hue Ê Khé-sī

作者 Ko Ing-lâm 2007.10.07

Ū tsi̍t-uī sin-sū-hiaⁿ khì kàu tsi̍t-king hue-tiàm, i àn-sǹg beh kā hue-tiàm tīng tsi̍t-sok hue, sūn-suà tshiáⁿ hue-tiàm ê sin-lô kā hue sàng khì hō͘ i ê Ma-ma.

Tng i beh kiâⁿ ji̍p-khì hue-tiàm ê sî, khuàⁿ-tio̍h tsi̍t-ê tsa-bó͘ gín-á tsē tī mn̂g-kha-kháu, tsi̍t-ê lâng àm-àm-á tī hia tshngh. Sin-sū-hiaⁿ kiâⁿ uá kuè-khì, mn̄g hit ê tsa-bó͘ gín-á. “Me-me, lí nah ē tsi̍t-ê lâng tsē tī tsia teh háu leh?” Tsa-bó͘ gín-á ìn kóng, “Guá siūⁿ beh bé tsi̍t-luí muî-kuì-hue sàng hō͘ guá ê Ma-ma. M̄-kú, guá bô-kàu tsîⁿ.” Sin-sū-hiaⁿ thiaⁿ liáu tshiò-tshiò-á kóng. “Án-ni o͘h! Bô iàu-kín. Lâi!” Tsiū khan tsit ê tsa-bó͘ gín-á ê tshiú tâng-tsê kiâⁿ ji̍p-khì hue-tiàm.

Tīng hó beh sàng hō͘ a-bú ê hue-sok liáu-āu, koh-tsài līng-guā bé tsi̍t-luí muî-kuì-hue hō͘ tsit ê kó͘-tsui ê tsa-bó͘ gín-á. “Me-me, lí tuà tī toh? Guá sái-tshia tsài lí tńg-khì, hó bô?” “Tsin ê? Bô phiàn guá ho͘ⁿh?” “Tong-jiân mā-sī tsin ê!” “Bô, án-ni lah! Mâ-huân lí sàng guá khì guá ê Ma-ma hia tsiū hó. M̄-kú, guá ê Ma-ma tuà ê só͘-tsāi, lī tsia tsin hn̄g neh!” “Tsá nā tsai tsiū m̄ kā lí tsài ah!” Sin-sū-hiaⁿ kún-sńg-tshiò án-ni kóng.

Tsi̍t-tsuā lō͘ lò-lò-tn̂g, sin-sū-hiaⁿ hū-tsik sái-tshia, tsa-bó͘ gín-á jīn-tsin tshuā-lō͘. Tshia tshut tshī-khu liáu-āu, peh tsiūⁿ uan-uan khiau-khiau ê suaⁿ-lō͘, tsuè-āu lâi kàu tsi̍t-ê bōng-hn̂g. Tsa-bó͘ gín-á kā hit luí muî-kuì-hue khǹg tī tsi̍t-ê tú tâi bô juā-kú ê sin-bōng thâu-tsîng. “Guá ê Ma-ma tsāi-siⁿ ê sî, siōng ài muî-kuì-hue ah!” Tsa-bó͘ gín-á ná huê-ik ná kóng, hit ê thian-tsin ê bô͘-iūⁿ, hō͘ lâng bô huat-tō͘ kā pàng hō͘ buē-kì-tit.

Uī-tio̍h beh kā tú-á tsiah kuè-sin khì ê Ma-ma hiàn tsiūⁿ tsi̍t-luí muî-kuì-hue, tshian-lí-tiâu-tiâu, bô-ū puàⁿ-kù ê uàn-giân, sim-lāi kan-taⁿ ū kám-siā, siàu-liām, siūⁿ Ma-ma ê sim-tsîng. Sin-sū-hiaⁿ kā tsa-bó͘ gín-á sàng tńg-khì kàu tshù, suî-sî kho͘ huan-thâu ua̍t tò-tńg-khì hue-tiàm.

I khì tshú-siau tsìn-tsîng beh kiò lâng sàng hō͘ Ma-ma ê hue-sok, līng-guā koh-tsài bé tsi̍t-tuā-pé tshiⁿ koh suí ê hue. Sui-bóng ài sái 5 tiám-tsing ê tshia, mā beh tshin-tshiú kā hue sàng hō͘ i ê Ma-ma.

Sin-sū-hiaⁿ tuì tsit ê tsa-bó͘ gín-á tit-tio̍h hiáu-ngō͘. Pîng-iú, lí ū juā-kú bô kap Ma-ma kìⁿ-bīn ah? Puê I tsia̍h tsi̍t-tǹg-á pn̄g, á-sī kap I khai-káng kóng kuí-kù-á uē leh. Tsit-tsūn iáu ē-hù, siūⁿ tio̍h, ài kuáⁿ-kín khì tsò o͘h! Guān Siōng-tè só͘ siúⁿ-sù ê pîng-an siông-siông kap lí, guá, tāi-ke saⁿ-kap tī teh, Ing-lâm tī tsia tsiok-hok lín.