《BONG報bong2選》

 | | | 轉寄

Siá hō͘ lāu-su ê phue

作者 蔡氏清水 2008.02.10

Lāu-su, lí hó !

Tsiok-kú bô kā Lāu-su tshíng-an, tsin pháiⁿ-sè! Lāu-su iáu-sī khah bô-îng, koh sî-siông ū bûn-tsiuⁿ teh tâu-kó?

Tāi-sing, tsin kám-siā Lāu-su tuì guán Mah-mah ê kuan-sim, tān-sī Lāu-su kám tsai-iáⁿ? Tng guá tńg-khì Ua̍t-lâm ê lō͘-tíng, guán Mah-mah... í-king... óng-sing! Thiaⁿ-tio̍h tsit-ê siau-sit ê sî-tsūn, guá kui sin-khu lóng gōng khì, ba̍k-sái it-ti̍t lâu, guá tsin kiaⁿ-hiâⁿ, guá ê sim-tsōng tsi̍t-tsūn, tsi̍t-tsūn thiàu siuⁿ kín, ná-tsún ū lâng īng tshiú tsiok tuā-la̍t--ê teh tsūn hō͘ ta, tsiok thiàⁿ, tsiok thiàⁿ !

Kàu tsit-má, í-king kuí-nā-kò-gue̍h lah, tān-sī guá iáu-sī bô huat-tō͘ siong-sìn tse sī sū-si̍t, nah-ē án-ne? Guá it-ti̍t tsin tsū-tsik, jú siūⁿ jú siong-sim, jú m̄-kam. Tī ka-tîng lāi-té, guá sī siāng tuā-hàn, koh kè tsiok hn̄g, tsiok hn̄g ê só͘-tsāi, Mah-mah phuà-pīⁿ ê sî, bô huat-tō͘ tsiàu-kò͘, tsi̍t-tiám iú-hàu lóng bô, guá tsin-tsiàⁿ tsiok put-hàu ê tsa-bó͘-kiáⁿ. Guán Mah-mah ê lī-khui, tuì guá tsuân-ke, ti̍k-pia̍t sī guá ka-kī lâi kóng sī tsi̍t-hāng ki̍k-tuā ê táⁿ-kik kap sún-sit, mā-sī íng-uán ê thiàⁿ. Guá tsin hi-bāng tse kan-na sī “ ok-bāng” ! ! !

Kuè lâi Tâi-uân tsit-tuāⁿ sî-kan, guá ê sing-ua̍h tsin ut-tsut, tsi̍t-bīn, guá ài lâu tī Ua̍t-lâm puê-phuāⁿ guá ê Pa-pa, guá ê sió-muē, lâu tī koh ū guá tshin-ài ê Má-mah hîng-iáⁿ ê kí-liām ê só͘-tsāi; tsi̍t-bīn guá su-iàu kuáⁿ-kín tńg lâi tsia puê-phuāⁿ guá ê sian-siⁿ hām gín-á, tī tsia ū guá ê “ tsiong-lâi”. Tsit nn̄g ê só͘-tsāi, nn̄g ê ka-tîng, tuì guá lâi kóng, lóng tsin tiōng-iàu, guá lóng ài-hō͘ kap tin-kuì .Ka-kī ê sian-siⁿ, tshin-tsiâⁿ, pîng-iú...lóng an-uì guá:M̄-thang kuè-thâu siong-sim, ài bīn-tuì jîn-sing só͘ kóng ê “sing. lī. sí. pia̍t.” ê sū-si̍t, guá tsiah-ni̍h siong-sim tō pháiⁿ sing-thé, guán Mah-mah “tsāi thian tsi lîng” nā tsai-iáⁿ, i ē m̄-kam... ...Tse guá lóng ū thiaⁿ tio̍h, lóng bat tsiah-ê tō-lí, tān-sī guá iáu-sī tsiok pi-ai. Tsit-má, tī tsia nā khuàⁿ-tio̍h siáⁿ-mih só͘-tsāi ū pān song-sū, guá tō siūⁿ-tio̍h ka-kī ê ka-tîng tú tio̍h ê pi-ai, guá koh ē lâu ba̍k-sái, koh kan-khó͘. Guá mā kám-kak tsin pháiⁿ-sè, in-uì, kā Lāu-su kóng tsit-ê tāi-tsì hō͘ lí siū-tio̍h ka-kī ê bó-tshin ( Iah-sī, Lāu-su sī tsa-po͘ ê, pí guá lú-sìng khah kian-kiông, khah khuàⁿ ē khui ? ). Tse mā-sī tsiok kú guá bô kap Lāu-su liân-lo̍k ê guân-in!

Guá iáu-buē ū huat-tō͘ hui-ho̍k í-tsîng ê sing-ua̍h, iû-kî sī ha̍k-si̍p. Guá tsit-má Tâi-gí ê tîng-tō͘, koh bô pān-huat tsiong sim-lāi ê uē, uân-tsuân kóng hō͘ Lāu-su thiaⁿ, tān-sī, guá tsin-tsiàⁿ tsiok siong-sim...

Tsuè-āu, kìng-tsiok Lāu-su sin-thé kiān-khong, bān-sū jû-ì .

Ha̍k-sing Tshuà sī Tshing-tsuí Kìng-siōng

(作者是越南人)