《BONG報bong2選》

 | | | 轉寄

Pe龍船

作者 Abon 2008.06.08

Tsina人kā台灣人講「pe龍船」是teh紀念Tsina古早ê「愛國詩人」，in講肉粽是beh khian落去水底hō͘魚á食，魚á tsiah bē食「詩人」ê肉！

Tsina人講ê tò-píng想就tio̍h a！我tsiok認真想mā想無台灣人是án-tsuáⁿ ài「pe龍船」，有飯m̄食tio̍h-ài縛做「粽」tsiah甘願食。

想幾nā冬án-tsuáⁿ想to想無。問gún母a,i mā講無路來，i kan-na 知iáⁿ自古早就leh縛粽，m̄-koh gún tsit庄m̄是5日節縛，是7月半縛。我害a，sa無tsáng koh加1條！

有1 kái我the̍h肉粽做研究，kā縛好ê粽khian入去魚櫥á飼魚，粽tìm落去水底，魚櫥á浮1 iân油，魚á看著粽suah bih到櫥á邊去，過tsi̍t-ē-á tsiah有2隻khah好膽ê uá來tok。

我tī魚櫥á看kui暗，魚á粽tok bē行，就當做櫥á加1塊石頭，hit工了kui禮拜lóng真無閒，尾á mā bē記得hit粒粽tī-leh櫥á內，尾á想著beh khǹg 1 隻船á hō͘魚á「pe」，驚iáu-buē到就鼻著臭臊味，驚jú uá jú臭。死a！魚á lóng píng肚a！Kui-kha魚櫥á臭mi-mo͘，我kā píng肚ê魚á hô͘起來，水làu hìⁿ-sak，內底nah會加1粒......M̄-tio̍h！hit粒粽koh tī hia hô͘-hô͘。魚櫥á拚好，我決定無kā「肉粽」kap「pe龍船」ê tāi-tsì bú hō͘通，無beh koh飼魚á。

我tsah hit粒「粽」去tshuē Banda，kā講我學Tsina人khian「肉粽」飼魚á，i 笑kah leh塗kha nuà。我講「tò-píng想」mā想無，i 笑kah拳頭母tǹg壁，tǹg kah隔壁ê死老猴tshoh-kàn-kiāu。

「你bē-sái好好á講o͘h！m̄知tsiah會來tshuē你a！」
「救人o͘h！寫台文ê信Tsina人ê siáu話lah！」
「好lah！相信Tsina人是我m̄-tio̍h，我kā你會失禮，緊kā我講lah！」
「台灣人真害，愛聽好聽話，連siáu話to信phak-phak，hông拖去tsing to m̄知！」
「緊講lah！」
我tuì Banda ê頭殼siâu taiⁿ落去！
「Kán！Tsiok疼neh！你kā我斟酌聽o͘！」
「好！」
「不管Tsina有幾個詩人，詩人án-tsuáⁿ死，kap台灣lóng無tī-tāi！」
「我知a！Tò-píng就是........ tse lóng是台灣人本tsiâⁿ就有ê！」
「講你gōng koh無iáⁿ juā gōng neh。」
「Oh ye！」
「龍船kap Tao ê 1款船á kài sîng，上大隻會sái坐20~30個人，m̄-koh tsit-má無柴無teh做a，古早in lóng kò船á去Philippines kap親tsiâⁿ sio-tshuē，tsit-má mā是koh有出海lia̍h魚á。」
「樹á lóng hō͘ Tsina人tshò了了a！」
「Tī日本人iáu-buē來tsìn前，台灣ê大條港lóng無橋，tuì台南行bē到淡水，坐船á khah tsē，hit-tsūn台灣人1塊枋á就會sái出海。等到日本人起ê縱貫線開通，大細條橋起好勢，台灣tsiah tsiâⁿ做1粒島，若無lóng是港kap港teh sio通。」
「我泅水lóng泅無siáⁿ會行kong！Án-ne我beh án-tsuáⁿ出海？」
「Bē-hiáu坐飛行機o͘h！你kā粽tháu開！」
「無愛lah，臭mi-mo͘！」
「緊tháu，若無，無愛講a！」
「好lah。」
我kā粽tháu開，粽ha̍h-á hìⁿ-sak，外口層ê飯ùn著水sio-khuá爛爛。
「Kā āⁿ peh出來。」
「OH NO！M-m......bē臭臭neh？」
「Án-ne知a ho͘ⁿh。」
「Siáⁿ！」
我kā粽khǹg tī桌頂，Banda用箸kā peh做2 kueh。

「騙siáu ê！你ka-kī mā m̄敢bak著！Koh gia̍h箸peh！」
我笑iáu-buē煞，Banda就kā三層ngeh uì嘴nih。
「你teh tshòng siáⁿ！」
「Iáu koh好好，tse粽siáⁿ人縛ê?真好食neh！Tsit-tsām-á無現金thang食飯。」
Bangda kā粽sut了了。
「你害a！Ing暗你就知a！一定tshuah到bîn-á-tsài！」
「免驚，粽就是出海beh tsah ê便當lah！」
「正(tsiàⁿ)ê？浸水mā bē pháiⁿ去？」
「Tio̍h，粽ta-ta khǹg會sái khǹg 2~3禮拜bē pháiⁿ，kiⁿ粽會sái khǹg個外月！」
「張錫銘kap in細hàn ê phāiⁿ 3 kuāⁿ粽就會sái tī山頂bih到賊頭lia̍h bē著。」
「Tio̍h a！照Tao ê經驗，1 tsuā到Philippines ê Batan上緊半工就到a！Khah慢1工mā會到位。1隻船á 10個人半工食1頓，20粒就有夠，縛khah大粒ê 10粒就會飽。1 kuāⁿ 10粒會無tshái草索á，lín母a 1 kái lóng縛juā-tsē？」

「Gún母a tsiok大心肝，lóng縛tàu大粒ê，1 kái lóng縛7~8 kuāⁿ！」
「7~8 kuāⁿ？1 kuāⁿ幾粒？」
「無斟酌算neh，kan-na會記得縛好就sì-kuè分人，koh會縛kiⁿ粽，mā是7~8 kuāⁿ。」
「你知iáⁿ巷á口賣肉粽ê A-sáng 1 禮拜賣幾粒無？」
「我a̍h知，hit款粽pháiⁿ食kah beh死，tshap i 賣幾粒！」
「你hō͘ Tsina人uè了真嚴重，kan-na會hiáu食。」
「Nah有！我會hiáu寫台文neh！」
「我頂kái趣味去kā A-sáng tàu縛，i 1工縛2 kuāⁿ，1 kuāⁿ 30粒，1禮拜14 kuāⁿ 420粒，賣bē了lóng會tshun。準講lín母a縛7 kuāⁿ，1 kuāⁿ 25粒，lóng總175粒，上無會sái hō͘ 100個人食1頓，lín tau 6隻人，會sái食5~8工。」

「I lóng縛hō͘人，m̄-koh mā有人會kuāⁿ來hō͘ gún，ta̍k-pái beh食tio̍h-ài看粽ha̍h-á ioh是siáng tau ê粽。」

「若照Tao人ê速度，5工會sái kò到Philippines ê Manila，ǹg日本去會sái kò到Naha，lín tau ê船á真gâu走o͘h！」
「Tio̍h ah，大家lóng講gún母a是 '5 kha牛'，sì-kuè pha-pha走。」
「Koh有，tuì 5日節過就開始好天，海頂平平平，無像kuâⁿ天hō͘鬼á風siàn kah ná壁崩落來hit款大湧，tsit-tsūn出海上好！」
「Án-ne我知a！5日節是teh歡喜台灣人beh出海，縛粽是船á頂beh食ê，台灣真正是海洋國家！」
「Tsina人驚台灣人知iáⁿ台灣人自本就kap in無kâng，會hiáu peh山，會hiáu出海，kā台灣人山禁，koh tsuàⁿ講 'pe龍船' kap粽是uì in hia來ê，tsit款pe̍h-tsha̍t害台灣人kap狗kāng款看著水就驚，關tī台灣toh位to bē-sái去。」
「He我知lah，免上課a，lán mā來去kò船á，mua年kò來去日本tshit-thô。」
「你ta̍uh-ta̍uh-á kò，我坐飛行機tiàm日本等你！」