《巫義淵台語常用字》

 | | | 轉寄

常用字_16....「溺」

作者 巫義淵 2012.03.18

溺 有三个讀音：1.jiāu (尿) 2.jio̍k (辱) 3.li̍k (綠)。

這字佇新聞報紙不時出現ê字，總是真濟人對正確ê台語用法佮讀音攏無啥了解。第一個讀音：jiāu、是小便ê意思。通尿。例如：溺酸[jiāu-suan]＝尿酸[jiāu-suan ]。第二個讀音：jio̍k、是溪名。例如：溺水。第三個讀音：li̍k、有兩個含意。(1).陷入水中。例：溺水[li̍k-tsuí]。(2).無節制ê疼惜。例：溺愛[li̍k-ài]。一字真簡單ê常用字，卻造成真濟人ê困擾，這就是因為咱攏無受台語教育之緣由也。

重點字詞：
【溺】1.jiāu (尿) 2.jio̍k (辱) 3.li̍k (綠)
【溺水】[jio̍k-suí](辱媠)。
【溺酸】[jiāu-suan](尿酸)。
【溺愛】[li̍k-ài](力隘)。

用例：
佇中國西北酒泉有一條溪叫做【溺水】[jio̍k-suí]，這是這個地區ê人、兩千冬來重要ê生活水源，這個所在有出產夜光杯非常有名。佇西北ê嘉峪關嘛是佇酒泉市轄內，這個所在是倚近邊疆沙漠，菜蔬ê出產較少，因按呢生活飲食習慣佮咱無仝，三頓ê副食肉類特別濟，聽講近來患著【溺酸】[jiāu-suan ](尿酸)症頭ê人嘛真濟。 這幾十冬來台灣ê生活環境變遷，家庭倫理ê變化嘛真大，有兄哥死小弟、嘛有子女害死父母ê，這款倫理淪喪ê案例逐日都咧發生。俗語講：sīng 豬上灶，sīng 子不孝；父母若對子過頭【溺愛】[li̍k-ài]，這個囝仔將來對家庭社會，無一定是一個有路用ê人。人講，樹仔細欉若無雕，等大欉若欲 ka 改變、只有鋸掉ê辦法但定[nā-tiāⁿ]，若無、無法度改變。這是咧 kā 咱講、囝仔對細漢就愛管教，若行不著路就愛kā 伊指點導正，行入正途才有好ê未來。瑪竇福音第十三章記載，彼個時耶穌講一ê比喻：有一個人出去敥麥仔種ê時，有ê落佇路邊、被鳥仔來啄去(吃掉)。有ê落佇土真少ê石頭仔縫，因為土無若深、雖然有發芛，但是無若久、日頭出來就被曝乾去。有ê落佇刺仔欉(荊棘)中，生長起來往往嘛是被刺仔欉所困，無法度有好ê收成。若是落佇有肥ê好田地，就會結實幾若十倍、抑是百倍。這就是咧 kā 咱講、愛行正確ê道路，終歸尾才有好ê結果。