《巫義淵台語常用字》

 | | | 轉寄

常用字_47....「繳」

作者 巫義淵 2013.06.02

繳有三個讀音，這三個讀音除了聲韻無共，意思嘛一丈差九尺，有時陣會予人感覺漢字實在真費氣。台文界有一怪現象，就是不時聽着有人講，「按呢的讀音，若用聲韻學的觀點來看，是絕對無合」等的論調。雖然聲韻學是一門真深的學問，總是無法度解決漢字全部的問題，事實上漢字的演變過程，有部分確是以聲韻為基礎，有真濟卻是以實際使用的名詞來定音，這字真明顯就是後者。下面就將這三讀音紹介來佮大家分享，一方面了解聲韻學不是萬能的，一方面亦明白漢字確實真費氣。

重點字詞：
【繳】1.kiáu (攪) 2.tsiok (足) 3.hi̍k (惑)。
【繳納】[kiáu-la̍p] (攪臘)。
【袞繳】[kún-hi̍k] (滾惑)。
【矰繳】[tsing-tsiok] (爭足)。

用例：
古早人所穿的衫褲，攏是用手工一針一針慢慢仔紩[thīⁿ]，頷領抑是褲頭的所在為欲硬 tsiāⁿ 攏愛【袞繳】[kún-hi̍k]，就是咱所講的套 sín ，除了做衫以外，其餘的物件嘛是共款攏用手工，親像做弓箭就愛預備真濟種的器材，做好了後若欲發射，上重要的物件就是【矰繳】[tsing-tsiok]，是縛佇箭的索、抑是縛佇弓的細條索，它是射箭的彈索。弓箭古早人是用來做兵器，它的用途除了戰爭以外，大部份的百姓是用來扑獵，咱台灣早期的原住民，猶無火槍以前嘛是用箭咧扑獵。有一點無公平的就是扑獵免納稅，飼豬飼雞攏愛【繳稅】[kiáu-suê / sè]。